euskal diaspora eta kultura
2015/11/13
Miren Agur Meabe idazlearen "Kristalezko begi bat" eleberria Estatu Batuetan argitaratuko da udan, ingelesera itzulita eta "A glass eye" izenburuarekin. Egunotan AEBetan dira Meabe eta Amaia Gabantxo itzultzailea, liburuaren aurkezpen bira zabal bat egiten. Hilaren 21a arte New Yorken egongo dira, literatura eta itzulpengintza mintegi batean parte hartzen eta ondoren Mendebaldeko Kostara jauzi egingo dute, Kalifornia, Nevada eta Idaho bisitatzeko.
2015/11/13
HABEk, FEVAk, Euskadiren Argentinako ordezkaritzak eta bertako euskal etxeek gonbidaturik, Argentinako euskararen lagun guztiek har dezakete parte osagai akademiko eta jolasgarriak ere dauzkan proposatutako programan. Jarduerak azaroaren 16an hasi eta abenduaren 3ra arte luzatuko dira, besteak beste honakoak lagun izango dituzten jardunaldietan: HABEko teknikari eta Euskara Munduan programaren arduradun Kinku Zinkunegi; Eusko Jaurlaritzaren Hizkuntza Politikarako sailburuorde Patxi Baztarrika, eta Joseba Lozano Santos, Herri Administrazioetan Hizkuntza Normalizatzeko zuzendaria.
2015/11/13
100dik gora testuk hartu zuten parte Buenos Airesko Iparraldeko Euskal Etxeko Kultur batzordeak antolatutako “Euskal Emakumeak” izenburuko Literatur Lehiaketan; lanen kalitateagatik sari eta aipamen bereziez gain, hamalau diploma ere banatuko dituzte antolatzaileek idazleen artean. Sari-emanaldia azaroaren 21ean izango da, erakundearen egoitzan.
2015/11/12
Bi urtez behineko ekitaldi gisa sortu zen, ustez, Berlingo Euskal Zinemaldia, baina azkenaldiko euskal zinemagintzaren uzta hain izan da oparoa, Berlingo Euskal Etxeak urtero urtero antolatu duela jaialdia. Eta aurten, gainera "iaz baino jende gehiago" izan da emanaldietan, Ainhoa Añorga elkarteko presidentearen esanetan. "Loreak" filmaren saioan, esaterako, zinea jendez lepo omen zegoen.
2015/11/12
Egunean zehar, jolastu ez ezik, askaria hartu, lagunekin konpartitu eta euskal kultura ezagutu ere egingo dute herriko haurtzaindegietako neska-mutikoek. Gaurko aktibitatea iragartzeaz gain, Udalarekin batera euskal etxeak eraiki eta dohaintzan eman zuen etxearen berri ere badatorkigu Ayacuchotik.
2015/11/11
Euskal musika tresnak oinarri, eta orkestrek eta umeen abesbatzek lagunduta “Magnificat” obraren hiru emanaldi eskaini zituzten Noe Fernandez, Gaspar Jaurena, Alex Garate eta Agustin Alonso musikariek Mendozan, Tucuman eta Cordoban, tokian tokiko koruak lagun. Orain, lana zabaldu eta beste hainbat lekutan aurkezteko asmoz obraren difusio bideo bat prestatu dute.
2015/11/11
Guillermo Larregui euskal etxeak antolaturik, argentinarren talde berri bat abiatuko da datorren urtean Euskal Herrira Hegoalde zein Iparraldeko leku esanguratsuenak bisitatzeko asmoarekin. Bidaia 2016ko irailean izango da eta bi astez luzatuko da. Antolatzeko bilerak urtarrilean hasiko dira; hala ere hamabost bat lagunek eman dute jadanik izena.
2015/11/11
40 urte betetzen ditu aurten Pariseko Gazteria euskal dantza taldeak, eta ospakizunen artean data bat dute gorriz markatuta egutegian: abenduaren 19a eta 20a, egun horietan Euskal Herrira ekarriko baitute Parisen sortu eta ekoitzitako "Makila" ikuskizuna. Lapurdiko Luhuso herrian izango da ikusgai, 50 dantzari, kantari eta musikarik taularatuta.
2015/11/10
Oscar sarietarako lehia berri onak ematen ari da aurten euskal zinemarentzat, bi euskal filme baitabiltza burubelarri sartuta. Batetik, "Loreak", AEBetako zinematan ikusgai dagoena (aste honetan Washington-en) eta kritika bikainak jasotzen ari dena. Bestetik, "Minerita" laburmetraia, dagoeneko azken hautagaiak aukeratzeko erabiliko den zerrenda murriztu edo "shortlist" delakoan sartu dena.
2015/11/10
Saltoko Euskaldunen Taldea euskal etxeak deiturik, ‘XXI. Mendea. Uruguaiko Euskaldunen Biltzarreko Lehen Bilera’ izeneko Foruaren lehenengo elkarretaratzea Salto hirian egin da, bost elkarte partaide. Bilkuran Uruguaiko euskal elkarteen gaur egungo egoera eta euren arteko eta Eusko Jaurlaritzarekiko harremanei buruz mintzatu ziren. Antolatzaileak gustura daude ekintzaren emaitzekin, “Foroa osatu dugulako eta parte hartu duten elkarteak gaur egun aktiboak direnak direlako”, adierazi du ekimenaren bultzatzaile nagusietako bat den Luis Zaldua Saltoko Euskaldunen Taldeko lehendakariak..
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
