euskal diaspora eta kultura
2007/10/01
Santa Fe hiriko Gure Etxea elkarteak bostgarren urtez jarraian parte hartu zuen joan den ostegunean Café Literario ekitaldian, kroaziar komunitatearekin batera. Ekitaldia Santa Fe probintziako Kultura Idazkaritzaren egoitzan egin zuten, Argentinar Idazleen Elkartearen babesarekin. Oraingo honetan gaia honokoa izan zen: 'Antzerkia munduan, bere egileak, pertsonaiak eta bere historia'. Euskaldunen aldetik parte hartu zutenak María Carmen Lasarte, Silvia Regoli Roa eta semea, Catalina Villanueva eta Matías Garat Ortiz izan ziren.
2007/10/01
Galiziar Kulturarako Xeito Novo Fundazioak antolatutako ekimena da, 'normalean isilpean dauden kultura eta hizkuntza jardunen hedapenerako', espazio bat sortzearren. Helburu honen baitan, bertako herrien, immigranteen eta immigranteen ondorengoen ordezkariak bilduko dira, baita hizkuntzalariak, akademikoak eta hizkuntzetan adituak diren pertsonal ere, euskera, gaelikoa, galiziera, qom (toba), quichua eta ukraniera ordezkaturik. Biltzarra Urriaren 9tik 12ra artean egingo da Etorkinen Hotel zaharrean, Buenos Airesen.
2007/09/29
Finlandiako Turku hirian egiten ari den bilera orokorrean Migrazioen Europar Elkarteak (AEMI) Eusko Jaurlaritza elkarteko kide gisa onartzea erabaki du. Elkarte honek emigrazio prozesuaren inguruan ikerketak bultzatzen dituzten museo eta erakundeak biltzen ditu. Eusko Jaurlaritza Emigrazioaren Euskal Museoa sortzeko lanetan ari da.
2007/09/29
Villegas-ko Euskaldunak-ek Euskal Etxeari egiten dioten ekarpen baliosa ikusarazi nahi izan die bere dantzariei --guztiak neskak-- eta hala adierazi die ozenki eta jende aurrean, banan bana heien izenak aipatuz: 'Zorionak, guztiei, dantzari bakoitzari, Maite Recarte-ri, Linda Nouveliere, Celina Tellechea, Estibaliz Belloso, Damaris Labarta, Clarita Llamedo Ballari, Karen Suárez, Martina Bernadó eta Agueda Trecco-ri, eta Martina Barroso eta Lara Latorre txikitxuei. Guztien zuzendari, Euskal Etxeko dantzarien irakasle den Nieves Castillo. Zorionak!', adierazi die.
2007/09/28
Bihar hasiko dira Rosarion Argentinako Euskal Aste Nazionalari bidea egiteko prestatu dituzten ekitaldiak: pilota partidak antolatu dira sarrera gisa, bihar eta etzi Zazpirak Bat Euskal Etxean. Ondotik, astelehenean hasiko da zazpi eguneko Euskal Astea eta hurrengo igandea bitartean Argentinako euskaltzale ugari --eta Euskal Herritik heldutako lagunak ere-- bilduko dira deialdira. Ohi bezala, EuskalKultura.com ere bertan izango da: Sabrina Otegi eta Maialen Gonzalo Aranbururen lana medio hitzordu garrantzitsu honek emango duenaren berri idatziko dute. Hona Euskal Astearen behin-betiko egitaraua.
2007/09/28
Teknologia berrietan euskararen erabilera erraztu eta sustatzeko tresna ugari eskaintzen ditu Eusko Jaurlaritzak bere webgunean. Doako software-ak dira, saretik erraz jaitsi daitezkeenak, ordenagailua euskaraz erabiltzeko bidea emanez. Sistema eragileak, hiztegiak, zuzentzaile ortografikoak... denak xagu kolpe batez eskuragarri. Honoko artikuluan zeintzuk diren eta nondik jaitsi daitezkeen azaltzen dizugu.
2007/09/28
Etengabeko hedatze eta ekintzaz beteriko urte batean, Buenos Aireseko Iparraldeko Euskal Etxeak eta hiri bereko Euskaltzaleak elkarteko ikasle talde batek Iparraldea, bertako jende, historia eta ohiturak ezagutzeko interes berezia duten pertsonei zuzendutako jarduera bat antolatu zuten joan den astean, 'Mintza gaitezen Iparraldeaz' izenburupean. Hitzaldiak ekimen desberdinak bildu zituen: bideo emanaldi bat, joku eta kantak eta bukaeran mokadutxo bat hartzeko aukera. Jende ugari bildu zuen ekimen hau pasa den asteazkenean, Irailaren 19an, egin zen, Buenos Airesen, Iparraldeko Euskal Etxearen egoitzan, Moreno 1370 helbidean.
2007/09/27
Artzain Mundua elkarteak Ameriketan ibilitako artzainak omentzeko egin zuen deialdiak erantzun aparta jaso du. Hitzordua datorren asteburuan Alduden eta astelehenean Gernikan izango da. Bertara bilduko dira Euskal Herriko lau muturretatik heldutako artzainak eta baita Ameriketatik etorritako batzuk ere. Ekitaldi jendetsua izango dela aurreratu daiteke: omenaldiko kontzertu, mintzaldi eta dokumental emanaldietara gerturatuko direnez gain, bazkarietarako tiketak dagoeneko erabat agortu egin direlako, guztira bostehun Alduden eta beste hainbeste Gernikan.
2007/09/27
Euskal Herriko enbaxadore hoberenak izan dira. Hala diote Artzain Mundua elkarteko kideek. Ameriketan ibili diren euskal artzainak omenduak izanen dira heldu den asteburuan, Baigorrin, Alduden (Baxenabarre), eta Gernikan. Zeremonia, diploma, oroitarri eta guzti. Euskal artzainak aipatuta, gizon zuzenak, leialak eta langileak direla erraten da anitzetan. «Euskal gizarteak luzaz ahantzi ditu euskal artzainak». Ttale Urret artzaina da bera ere, eta omenaldiaren antolatzaile bat. Euskal artzainek denbora eman dute Amerikako mendietan nola bizi izan diren aitortzeko. Mila, edo bi mila buruko artalde bat zaindu behar. Hartzak, koioteak ardiak harrapatu nahian. Hotza, gosea. «Eta bakardadea. Nik uste hori izan den artzainen etsairik handiena».
2007/09/27
Ez da bizibide erraza izan Ameriketara artzain joan ziren euskaldunena. Denborak, batzuetan, une gaiztoak ahantzi arazi eta une goxoak ekar arazten dizkigu memoriora. Gazi-gozoak tarteko, badira ongi pasatu ziren ixtorio eta kasuak eta badira Ameriketan geldituz edo berriz ere Euskal Herrira etorriz euren pasarte amerikanua nekez gogoratu nahi dutenak. Eta bitarte horretan galdu direnak. Guztia Ameriketako euskal esperientzia honen parte. Xan Airek, bera ere Ameriketaratutako frango dituen familiakoa, emana du argitara Gratien Ernaut urepeldarrari eginiko elkarrizketa hau Berria egunkarian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
