euskalkultura.eus

Buenos Aires, Argentina. 'Jendez gainezka dago etxea' izan zen joan den asteko asteazkenean Buenos Airesko Mexiko kaleko euskal egoitzan gehien entzuten zen esaldia. Izan ere, 150etik gora lagunek baiezkoa eman zioten Eusketxek luzatutako gonbiteari eta arratsaldeko zazpiak aldera ez zegoen jadanik lekurik etxeko areto nagusian.

[Jendeak Eusketxeren egoitza gainezkatu zuen (argazkia EuskalKultura.com)]

Egitarauari jarraituz, dantzariek eman zioten hasiera gauari. Dantza talde gisa ia sortu berria den Ekin Dantzari Taldeak hartu zien segida eta egin dituzten aurrerapenak erakustearen gain, euren jantzi berriak ere luzitu ahal izan zituzten.  Euskal kantak, berriz, Euskaltzaleak-eko Abesbatzaren eta Alkartasunaren Otxotearen eskutik etorri ziren. Koru bakoitzak bere errepertorioa eskaini zuen, baina hondarraldean elkarrekin abestu zuten Agur Jaunak kantu tradizionala.

'Florencio de Basaldúa, un vasco argentino' liburua

'Florencio de Basaldúa, euskal argentinarra' izeneko liburuaren aurkezpena ere gauzatu zen. Juan José Guaresti arduratu zen aurkezpenaz, eta Horacio Reggini liburuaren egileak berak ere hitz batzuk esan zituen. Biak bat etorri ziren esaterakoan Basaldúak historia argentinarrean leku garrantzitsua izan zuela eta bere lanak nazioa eraikitzen lagundu zuela. 'Izen batzuek monopolizatu egin izan dute gure historia', adierazi zuen Regginik, 'eta beste batzuk, ostera, ez dira hain ezagunak izan, baina azkarki eta jakitatez jokatu zuten iragana. Horietako bat da Florencio de Basaldúa euskal argentinarra'.

[Juan Jose Guaresti Florencio de Basalduari buruzko liburua aurkezten (argazkia EuskalKultura.com)]

[Horacio Reggini, Florencio de Basalduari buruzko liburuaren egilea bere obraren aurkezpenean (argazkia EuskalKultura.com)]

Ekitaldiaren balantzea egiteko garaian, María Elena Etcheverry, konforme eta asebete azaldu zen. 'Jende berri asko etorri da. Batzuk lehenengoz zetozen gure egoitzara eta zeharo harritu dira bizi dugun giroa ikustean. Daukagun giro ona eta abegikortasuna begi bistan geratzen direla esan didate, eta hori entzutea guretzat ezin da pozgarriagoa izan. Eusketxeko kide guztiek eta Buenos Airesko euskaltzale guztiek jakin behar dute zertan ari garen. Horrela jendea gehiago hurbilduko zaigu eta honelako ekintzak maizago egin ahal izango ditugu, lankidetzan. Hori da gure asmoa'.

Bukatzeko, Etcheverryk, Eusketxeren izenean, baliatu nahi EuskalKultura.com-ek eskaintzen dion aukera hau bere esker beroak emateko Euskal Ikasketen Institutu Amerikarreko lehendakari orde Juan José Guarestiri, eta baita Euskaltzaleak erakundeko kideei ere, emandako laguntza baliotsuagatik.