Bularreko Minbiziaren Kontzientziazio Hilabetearen barruan, ilea emateko ekimen bat egingo da urriaren 21ean, asteazkena, 15:00etatik 20:00etara, Cañuelasko Denak Bat Euskal Etxean.
Ekimena "Ale Aitaren legatua" taldeak antolatu du, "Amak" emakume-taldearekin elkarlanean. Bildutako ilea minbiziaren tratamenduen ondorioz ilea galtzen duten emakumeentzako ileordeak egiteko erabiliko da.
Kanpainak gaixotasuna bizi dutenei laguntzea du xede eta ekarpena egitea euren ongizateari "Urri Arrosa" delakoaren baitan; izan ere mundu mailan, hilabete hau bularreko minbiziaren inguruan kontzientzia pizteko dago izendatuta.
Ilea eman nahi dutenek kontuan izan behar dute gutxienez 25 zentimetroko luzera behar duela izan. Ilea tindatuta edo ile-zuriz beteta egon daiteke, eta ez dago adin-mugarik parte hartzeko. Antolatzaileek komunitatea inplikatu nahi dute, eta ahalik eta jende gehienari erraztu nahi diote kausa honetan laguntzea.
Ekitaldian ilea zaintzeko eta ileordeak egiteko materialak ere bilduko dira. Eskatzen diren materialen artean daude, besteak beste: turbanteak eta ileordeetarako barruko forruak egiteko oihalak, kotoizko eta poliesterrezko hariak, eta xanpu zein egokitzaile neutroak, nacpopcañuelas-pkb.com webguneak hedatu duenez.
Zalantzak argitzeko edo informazio gehiago lortzeko, deitu 2226-68-5896 zenbakira.
Lagun bati bidali
Komentarioa gehitu
