Viedma, Argentina. Rio Negroko Viedma hiriburuak Picassoren Guernica margolanaren mural bat aurkeztuko du, Juan Marchesi artista ezagunak eta bere lantaldeak egina, bertako gobernuak koordinatutako jarduera batean. Udalarekin sinatutako hitzarmen bati esker, Viedma-Patagoneseko Aberri Etxea Euskal Etxeak proiektu bat garatuko du muralaren inguruan, Picassoren lan enblematikoa azalduz eta lan pedagogikoa bat garatuz Gernikari buruz eta koadroaren sinbologiaz.
Proiektua 2017an hasi zen mugitzen, orduan gobernadoreordea zen eta gaur egun hiriko intendentea den Pedro Pesattik Aberri Etxeko agintariei jakinarazi zienean Guernica ospetsuaren bertsio bat egiteko asmoa zuela hiriko kostaldeko paseoan. Ferreira Parkeko lanek aurrera egin zuten, eta proiektua 'Gizateriaren Lorategiak' izeneko pasealeku berrira ekarri zen. Gaur egun, bertan egiten ari dira murala, munduko historiako gertakari garrantzitsuenetako batzuen oroimena bizirik mantentzeko eta sentsibilizatzeko xedez.
Irakaskuntza: artea, historia eta memoria
Margolana amaitzen denean, Aberri Etxeko Kultura Saileko koordinatzaile Rubén Suárezek mintegiak eskainiko dizkie turismo arloko funtzionariei, irakasleei eta, oro har, ikasleei, obraren hurbilketa artistikoa eta historikoa eginez, eta euskal komunitatearen historia eta memoria lantzeko. Proiektuak, halaber, eskualdeko komunitate juduaren laguntza ere izango du, talde arkitektonikoa handitu egingo baita Shoa-ri buruzko instalazio bat sartuta.
Muralaren arduraduna Juan Carlos Marchesi da, margolari, ilustratzaile eta eszenografo ezaguna. Artista Buenos Airesen jaio bazen ere, lau hamarkada dira Patagonian bizi eta irakasle ibili izan dela. Marchesiren bertsioak Picassoren muralaren jatorrizko neurriak errespetatuko ditu, koloreak, berriz, aldatu egin dizkio, eta berak sortutako beste elementu batzuk ere ari zaizkio emendatzen. Hiru hilabete barru bukatzekotan dira.
Lagun bati bidali
Komentarioa gehitu
