Salt Lake City, AEB. Euskal tripota edo odolkia egitea tradizio da AEBan, bereziki Kalifornia, Idaho, Nevada eta Utah bezalako estatuetako euskal komunitateetan. Euskal Herritik ekarritako ohitua honek bizi-bizirik jarraitzen du eta txerrikiak estimu handia dauka, izan odolki edo tripota, edo txorizo edo lukainka gisa. Hainbat euskal komunitatetan euskal etxeen inguruan egiten diren produktuez gain, mozkinak euren kontura egiten dituzten ekimenak ere badira. Baina gaurkoan, irudi hauek bidali dizkigutelarik, Utahko Euskal Etxeak biziarazten duen tradizioa aipatuko dugu.
Izan ere, iazkoa COVIDak galerazi ondoren, bihar larunbata ospatuko dute Utahko Euskal Etxeko lagunek urteroko euren 'Odolki Jatea'. Izenak adierazten duenez, biharkoa jatea izango da eta lehenago egindako lanari etekina ateratzea, aldez aurretik Euskal Herrian odolkia/tripota/mortzila esaten zaion produktu gustagarri hau egin egin behar izan baita, eta horixe da ondoko irudi hauek islatzen dutena, odolkia egiteko lana, Utahko Euskal Etxeko lagunek auzolanean gogotsu eta umorez gauzatua.
Euskal odolkia, Utah-nko euskaldunek auzolanean egina
Irudiak ikusirik, ongi pasa biharkoan esatea baino ez zaigu geratzen. Eta partekatutako lanak zein parrandak onenak direla esan ohi dutenez, hala izan dadila bihar ere. Ederra da ikustea nola mantentzen diren bateko eta besteko euskal tradizioak gure diasporako komunitateetan.
Eutsi horri Utahko lagunok!
Lagun bati bidali
Komentarioa gehitu
