euskalkultura.eus

Salta, Argentina. 'Salta Ederra' edo 'Salta, la linda' izenarekin ezagutzen da Argentinako Iparraldeko probintzia hau. Eta jaio berria den 'Gure Etxea' euskal etxeak kulturaren arloan eskainiko duen ekarpenak 'edertasun' hori handitzeko balio izango du dudarik gabe.

Urtebete baino ez du euskal etxeak, baina makina bat proiektu. 2010. urtea hasi bezain laster ekin diete Saltakoek programatuta zeuzkaten ekintzei. Otsailean Euskal Herritik etorritako Elu Reynozo eta Fernan Molina Ugarte senar-emazteak hartu zituzten. Ondoren Virginia Larrazak euskal etxeko beste kideekin konpartitu zituen Necocheako Euzko Etxean bizi izan zituen esperientziak. Beste alde batetik eta Emakumeen Nazioarteko Eguna aldarrikatzeko, Nieves Beatriz Vizcarra de Eckardt euskal komunitateko 'Emakume Nabarmenena' izendatu zuen euskal etxe berriak. Vizcarra andreak garun-paralisia pairatzen duten umeekin lan egiten duen HIRPACE instituzioaren sortzaileetako bat da. Baina horretaz gain, eta herriko komunitateari begira, Gure Etxeak babesa planak dauzka ahalmen bereziko haurrak biltzen dituen Tobar Garcia Eskolari laguntza emateko. Proiektu hau bideratzeko egin den bileran, Eduardo Oláiz erakundeko lehendakariordea, Jorge Saracho Bianchi lehendakaria eta Guillermo Echazú kultur batzordeko ordezkaria hurbildu ziren eskolara.

Ekintzak urte osoan zehar

Hurrengo aktibitatea Aberri Eguna ospatzeko ekitaldia izango da. Susana Mirandek euskal kulturari buruzko hitzaldi bat emango du eta ondoren janari tipikoaz eta musikaz gozatu ahal izango dute gonbidatuek. Etorkizunari begira, apirilean Salta hiriaren sorrerako desfilean hartuko dute parte euskal etxekoek. Euskal zine zikloa gauzatuko da maiatzean eta ekainean. Uztailean, berriz, Ander Blasco musikari bizkaitarrak bisitatuko du hiria eta kontzertu bat emango du; ondoren, irailean, Cesar Arrondok hitzaldi bat eskainiko du. Beste alde batetik, laster Irrati Nazionalean "La Hora de los Vascos" irratsaioa emititzen hasiko da. Aldi berean, liburutegi eta bideoteka jarriko da abian.

'Orain arteko balantzea ona baino hobea da', azaldu dio Saracho Bianchik EuskalKultura.com-i. 'Poz handia dugu bakarrik ez gaudela ikustean. Hemengo Udaletxe, FEVA, eta Euskal Herriko erakunde batzuen laguntza, baita beste euskal etxe batzuena ere, jasotzen dugu egunero. Orain lortu behar duguna egoitza bat da. Eskaera baino, gehiago asmoa da Saltako euskaldunentzat. Elkartzeko leku baten beharra gero eta handiagoa da. Horren behar du izan hurrengo urratsa', adierazi du euskal etxe gazteko lehendakariak.