Cipolletti, Argentina. Duela hiru urte aurkeztu zuen ofizialki, bizileku duen Argentinako Patagonian, 'Txalaparta, cosas de vascos' liburua, Pedro Mario Arana Urionabasterretxeak, Cipolletti-ko 2019ko Liburu Azokan hain zuzen. ‘Baskos de la Confluencia’ euskal etxeko kide eta sortzaileetakoa denak leku bera aukeratu du aurten liburuaren bigarren argitaraldi emendatua jendaurretzeko, urrian beraz, azokaren baitan. Dagoeneko gonbidapena jaso du bertaratzeko eta bere partaidetza baieztatu die poz handiz, EuskalKultura.eus-i adierazi dionez.
Gogora dezagun liburuak, euskal etxeak euskal kultura ardatz duela Arana bera ekoizle sustatzen duen irratsaiorako prestatutako testu eta gaiak hartzen dituela oinarri. Aranaren hitzetan, "Zalantzarik gabe, nire gurasoek eta nire familiak, guztiak euskal jatorrikoak, konturatu gabe euskal kutsuaz markatu zuten nire haurtzaroa. Gainera, nire bizitzako hainbat epealditan Euskal Herrian bizi izan naiz, eta bertako kultura eta ohiturekin kidetasun handia sentitu izan dut, agian nire haurtzaroan jasotakoagatik".
"Faktore hauek, eta Txalaparta irratsaioak berak eragin dute liburua, saioan gai ezberdinei buruzko galderak errepikatu egiten baitziren, eta horien erantzunak gordetzen hasteak ekarri zuen liburu gisa ateratzeko proiektua, jende gehiagok baliatu eta jakinmina duten euskaldunen zaleei eta ondorengoei asetzeko asmoz", baitetsi du.
Lehenengo argitaraldia agortuta dagoela, berri honetan beste bi gai, tabernak eta trainerak, gehitu ditu. Igurikatzen duenari dagokienez, ‘Euskal komunitatearentzako erreferentzia eta kontsulta liburua bilakatzea nahi nuke’ esaten digu egileak, Euskal Herrira egingo duen hurrengo bidaia ziur aski inspirazio iturri izango zaiola.
Lagun bati bidali
Komentarioa gehitu
