Chivilcoy, Argentina. Gernika eta Gernikako Bonbardaketan hil ziren lagunak omentzeko Beti Aurrera Euskal Etxeak urtero antolatzen duen Literatura Lehiaketa bere hamargarren ediziora iritsi da aurten. Txapelketa elkarrekin antolatzen dute Chivilcoyko Euskal Etxeak eta hiriko SADE-Idazleen Argentinar Elkarteak, eta sarraskiarenn 84. urteurrenarekin bat eginez aurkeztu dute bi elkarte antolatzaileetako ordezkariek.
Lehiaketaren gaiari dagokionez, ‘Gernikako Arbola’ eta Arbolarekin lotura duen sarraskia edota herria dira. Lanak bidaltzeko epea irailaren 7an bukatuko da.
Emaitzak hilabeteko epean jakinaraziko dira eta sariak –plaka eta dominak– abenduan emango zaizkie irabazleei, COVID-19ari aurre egiteko neurriek hala gomendatzen badute bederen, Euskal Etxeko aretoan egingo den jai batean. Oinarri guztiak, hemen.
Banderak eta herriko hedabideak
Bonbardaketaren 84. urteurren eguna gogoan izateko, bestalde, ikurrina eta Argentinako banderak jarri zituzten joan den asteko astelehenean Beti Aurrera-ko lagunek Euskal Etxearen egoitzan eta egoitzaren aurrean dagoen Gernika enparantza txikian.
Apirilaren 26an bertan, gainera, Gernikari buruzko testu bana argitaratu zituzten herriko La Razón eta La Campaña egunkarietan eta telebistako 7. Katean elkarrizketa egin zioten Luis Goicochea Euskal Etxeko erreferenteari.
Lagun bati bidali
Komentarioa gehitu
