Vitoria-Gasteiz. Eusko Jaurlaritzak, astearte honetan egindako Gobernu-Bileran, munduan barreiatutako euskal gizataldeetan premia larrian daudenei laguntzeko 2021eko deialdia onartu du. Ohi denez, dirulaguntza hauek Euskal Etxeak bitartekari bideratuko dira, eta orotara iazko kopuru bera, 202.000 euroko zuzkidura izango dute. Atzo onartutakoa datozen egunetan argitaratuko du EHAA buletin ofizialak, eta hortik aurrera hilabeteko epea zabalduko da eskabideak aurkeztu ahal izateko.
Eskatzaileek euskal gizataldeko kide direla eta atzerrian bizi direla egiaztatu beharko dute; eta dauzkaten beharrei edo premia larriko egoerei aurre egitea ahalbidetzen duten ondasunik edo diru-sarrerarik ez dutela; etxe partikularretan bizi beharko dute, araudi edo estatutuengatik laguntza eman behar dieten talde, komunitate edo erakundeen kide izan gabe.
Buletin Ofizialean argitaratu arte ez da indarrean sartuko, baina egoera honetan bazaude, egon erne, zeure euskal etxearekin edo hurbilen duzunarekin beharko baituzu kontaktatu, edo, argibide eta xehetasun bila, hurbilen duzun Euskadiren Ordezkaritzarekin edo zuzenean Kanpoan den Euskal Komunitatearentzako Zuzendaritzarekin (euskaletxeak@euskadi.eus).
Lagun bati bidali
Komentarioa gehitu
