euskalkultura.eus

Buenos Aires, Argentina. Hemezortzi urteko jarduera du dagoeneko Buenos Airesko Alkartasuna Koralak. Bi hamarkada hauetan zehar, Argentinako hiriburuko hainbat aretotan aurkeztu da eta behin baino gehiagotan beste musika talde batzuekin konpartitu izan du agertokia.

Abesbatza sortu zenetik, Gure Echea Euskal Etxea izan da Alkartasuna Koralak izan duen elkartzeko lekua eta aurten ere Pte. Peron kaleko 2143. zenbakian dagoen tradizio handiko euskal etxe hori izango da koralaren entseguen egoitza. Saioak ostiralero izango dira, iluntzeko 7etatik 9etara.

Belen Romano zuzendariaren eskutik, hurrengo aurkezpenak prestatzen ari dira jadanik abeslariak. Romano soinujolea denez, musika tresna hori ere entzun ahal izango da kontzertuetan. Une honetan, bestalde, ahots berrien bila ari da korua. Ahotsak oro, baina kontraltoak, baxuak eta tenoreak bereziki ongietorriak dira taldean. Informazio eskuratu edota kantatzeko gogoa edo interesa izan dezaketenek, entsegu egunean agertu edo, telefonoz, Olga Barandalla Sagastibeltzarekin kontaktuan jar daitezke (tel. 4952-0975).