euskalkultura.eus

euskal diaspora eta kultura

Albisteak rss

Arrakasta politaz bukatu da Caracasen Euskadiko Ikasleen Orkestrak (EIO) Venezuelara egin duen bidaia

2010/05/03

Euskadiko Ikasleen Orkestrak kontzertu arrakastatsua eskaini zuen Caracasen, bertako Gazteen Sinfonikoarekin batera
Euskadiko Ikasleen Orkestrak kontzertu arrakastatsua eskaini zuen Caracasen, bertako Gazteen Sinfonikoarekin batera

PUBLIZITATEA

Arrakasta handi legez aipa daiteke larunbatean, Maiatzaren Lehenean, Caracasen emandako kontzertuarekin Euskadiko Ikasleen Orkestrak amaitu zuen astebeteko bira venezuelarra. Bertako Francisco Miranda Orkestra Gaztearekin eman zuen larunbatean kontzertua EIOk. Iker Sanchez zuzendari, 12 eta 18 urte arteko musika ikasleek osatzen duen orkestrak Francisco Escuderoren 'Dantzari baten ametsa' eskaini zuen, Nerea Gurrutxaga dantzaria laguntzaile. Venezuelako Francisco Mirandak, berriz, Rosini, Samuel Aparicio bakarlari. Bi orkestrek --170 jole orotara-- elkarrekin ekin zioten kontzertuko azken zatiari, publikoaren esku-zarta handiak eurenganatuz. Emanaldiaren ondotik Kolonbia eta Venezuelarako Euskadiren Ordezkari den Iñaki Martinezek Lehendakariaren gutun bat eman zion espedizioari. Bertan Patxi Lopezek musikak "kulturak elkarrekin lotzeko tresna" gisa duen balioa azpimarratu, eta musikari gazteek eurek "Euskadiko enbaxadari gisa" egiten duten lana eskertzen du.

Caracas, Venezuela. Bukatu berria du joan den larunbatean Caracasen EIOk (Euskadiko Ikasleen Orkestra) Venezuelara astebetez egin duen bira laburra, honen barnean bi emanaldi egin dituelarik, joan den asteartean bata, apirilaren 27an, Humboldt Kultura Elkartearen aretoan, Tchaikovsky, Dvorak eta Francisco Escuderoren obrak jendaurretuz, eta iragan larunbatean bestea, Maiatzaren Lehenean, Musikaren Gizarte Ekintza Zentroan, besteak beste Francisco Escuderoren 'Dantzari baten ametsa' eskainiz, eta agertokia Venezuelako Francisco de Miranda Gazte Orkestra Sinfonikoarekin partekatuz. Izan ere, emanaldiko azken zatian, bi orkestrak elkarrekin aritu ziren, bildutako jendearen txalo eta esku-zarta handi eta entusiasmatuak bilduz.

Kontzertuko publikoaren artean Caracasko Eusko Etxeko eta euskal gizataldeko ordezkariak eta Euskadiren Kolonbia eta Venezuelako Ordezkaritzako buruak zeuden, eta baita Espainiako Enbaxadakoak ere. Ekitaldia amaitutakoan, Iñaki Martinez Eusko Jaurlaritzako Kolonbia eta Venezuelarako Ordezkariak Lehendakariak sinatutako gutun bat pasatu zion espedizioarekin zetorren Hezkuntza Saileko Marcelino Hernandez Eskoletako zuzendariari EIOko partade bakoitzari bana emateko. Bertan Patxi Lopezek musikak "kulturak elkarrekin lotzeko tresna" gisa duen balioa azpimarratzen du, "eragozpen guztiak gainditzen dituen lengoaia" gisa balioetsiz, aukera probestuz zorionak emateko eta eskertuz musikari gazteei musikaren bidez Venezuelan "gizarteen arteko zubia eta desberdinen arteko lokarri apurezin bat" eraiki izana, eta aitortuz baita ere oro har "Euskadiren enbaxadari bezala" eta "musikarekiko zaletasuna, adiskidantza eta lanarekiko dedikazioa" zabaltzearren orkestrak egiten duen lana.

Agertokiko zereginak amaitu ondoren, bi orkestra gazteetako musikari eta buruzagiak Caracasko Las Terrazas de Las Mercedes jatetxera bildu ziren lagunarteko afari bat egiteko, Venezuelako Haur eta Gazte Orkestren Sistema Nazionalak egindako gonbiteari segituz.



Komentarioak

  • Oharra - 2010/05/03 19:30

    Eusko Jaurlaritzak Kolonbia eta Venezuelarako Bogotán duen Ordezkaritzatik zehaztu egin da aurretik emandako informazioa, haren arabera Euskadiko Ordezkari Iñaki Martinezek banan bana emana bailioke EIOko gazte musikarietako bakoitzari Lehendariak sinatutako gutun bat, testuak aipatzen duen gutuna hain zuzen.

    Oharrak zehazten du azkenean Lehendakariaren gutun horiek espediziokide etorri zen Hezkuntza Saileko Marcelino Hernandez Eskoletako zuzendariari eman zizkiola Iñaki Martinezek, eta Marcelino Hernandezek hartu zuela gazteetako bakoitzari gutuna pertsonalki helarazteko ardura.

    Informazioa zuzenduta dago jadanik testuan.

    EuskalKultura.com erredakzioa, 2010/05/03 21:07

« aurrekoa
hurrengoa »

Erlazionatutakoak

PUBLIZITATEA

PUBLIZITATEA

PUBLIZITATEA

PUBLIZITATEA

PUBLIZITATEA

Irakurrienak

Azken komentarioak

© 2014 - 2019 Basque Heritage Elkartea

Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus

jaurlaritza gipuzkoa bizkaia