euskalkultura.eus

euskal diaspora eta kultura

Albisteak

Euskaltzaindiak eta Euskal Herriko Unibertsitateak (EHU) elkarlanerako lankidetza-hitzarmena sinatu dute

2010/06/23

Andres Urrutia euskaltzainburua eta Iñaki Goirizelaia EHUko errektorea

Andres Urrutia euskaltzainburuak eta Iñaki Goirizelaia Euskal Herriko Unibertsitateko errektoreak izenpetu dute bi erakundeen arteko elkarlana indartzeko asmoz egindako hitzarmena. Ikerketen arloari bultzada ematea du xede akordio berriak eta bi erakundeen arteko lankidetzaren bitartez euskarazko argitalpen gehiago lortu eta ikerketa euskaraz sustatzea bilatzen dute. Aldi berean, bi urtean behin Euskarazko Tesien Koldo Mitxelena saria deitzea ere adostu dute.

Gehiago irakurri...

Bigarren Mendeurrenaren baitan, Argentinako siriar-libanoar eta euskal komunitateen erakusketa B. Blancan

2010/06/22

Argentinako siriar-libanoar eta euskal komunitateetako dantzariak

Lan handia darama Bahia Blancako Union Vasca Euskal Etxeak gizataldeen arteko ekitaldiak antolatzen. Kolektibitateen Liburutegien Topaketaren bultzatzaileetako bat izateaz gain, iazko irailean hamazazpi kolektibitateren ordezkariak jaso zituen Gizataldeen Liburutegien I. Erakusketan. Orain, eta Maiatzeko Iraultzaren ospakizunen testuinguruan, siriar-libanoar eta euskal komunitateen topaketa eratu dute Union Vasca-ko kideek. Ekainaren 5ean, bi kultura hauen mota askotako adierazpenak ikusi ahal izan dira euskal etxearen egoitzan, tartean dantzak, musika, dokumentalak eta gastronomia. 'Garrantzi handiko ekimena izan da', azaldu dio Nerea Grassi Union Vasca-ko Joxe M. de Barandiaran Liburutegiaren arduradunak EuskalKultura.com-i. 'Kolektibitate bietako ordezkariok anitz gauza ikasi ditugu elkarretaratzean'.

Gehiago irakurri...

Bilera egin du Jaurlaritzak Bruselako euskaldunekin, Belgikan euskal etxe bat sortzeko aukera aurkeztuz

2010/06/22

Badirudi pausoak ari direla ematen hiriburu europarrak berriz ere euskal etxea izan dezan

Eusko Jaurlaritzak bilera egin zuen atzo Bruselan, hiriburu belgikarrean eta herrialde europar horretan bizi diren euskaldunak deiturik. Euskadik Belgikan duen Ordezkaritzako buru Marta Marin eta Kanpoko Euskal Herritar eta Gizataldeentzako zuzendari Julian Celaya zuzendu zitzaizkien bildutakoei, azalduz, besteak beste, Jaurlaritzak euskal etxe baten sorrera ofizialki onartzeko eskatzen dituen betebeharrak eta zer nolako lege testuinguru eta sostenguak har ditzakeen Euskal Herritik kanpo euskaldunen biltoki eta euskal kultura zabaltzeko sortzen den euskal elkarte batek. Duela urte gutxi arte Bruselak euskal etxea izan badu ere, gaur egun ez dago euskal etxerik Europar Batasuneko hiriburu honetan.

Gehiago irakurri...

Bertsoen poesia eta metaforak film batera bildu nahi dituzte Txintxua Films ekoizetxekoek

2010/06/22

Ez da aise azaltzea bertsolaritza ezagutzen ez duenari, are gehiago euskara mintzatzen ez duenari, zertan datzan eta zer daukaten bertsolaritzak eta bertsoek Euskal Herrian astero-astero hainbeste jenderen arreta erakartzeko, izan telebistaz, izan Euskal Herriko geografian barrena antolatzen diren emanaldi eta hitzorduetan. Seguruenik lagungarri izango da langintza horretan Asier Altuna bergararra errodatzen eta egiten ari den 'Bertsolari' filma. Besteak beste San Frantziskoko Euskal Etxean ere filmatu du. Orain arte lortu dituzten irudiak eta egin duten muntaia ikusgarriak dira. Emaitza horrek bultzatuta 'Bertsolari' filma finantziazio bila dabil orain eta proiektua zertan den ikusteko hamabi minutuko muntaia jarri dute interneten. Minutu batzuk badituzu, merezi du begiratua ematea.

Gehiago irakurri...

Guridiren 'Mirentxu' estreinatu da Bilbon, ekainaren 26ra arte ikusi ahal izango den bertsio eguneratuan

2010/06/21

'Mirentxu' obraren birmoldaketa honen protagonistak Arriagan egindako aurkezpenean (argazkia Oskar Martínez)

Jesus Guridiren (Gasteiz 1886, Madril 1961) obrarik garrantzitsuenetakoa da 'Mirentxu', eta Emilio Sagi zuzendariaren birmoldaketa honek Maria Bayo sopranoa, Andeka Gorrotxategi tenorea --joan den urrian Bahia Blancako Euskal Argentinar Euskal Astean aritu izan zena-- eta Marifé Nogales mezzosopranoa hautatu ditu protagonista. Bere jatorrizko estreinutik 100 urte betetzen ari den urtean plazaratutako bertsio honetan, obrak duela mendebeteko ikutu bukoliko eta "kursia" saihestu nahi izan du. Jantziak Miriam Ocariz diseinatzaileak atondu ditu eta musika Euskadiko Orkestra Sinfonikoari zor zaio, David Gimenez zuzendari. Bilboko Arriaga antzokian ikusi ahal izango da datorren larunbatera arte.

Gehiago irakurri...

Abian da Gazteria Ikerketarako Masterraren 2. edizioa, Eusko Jaurlaritzaren eta EHUren eskutik

2010/06/18

Eusko Jaurlaritzaren Kultura Sailaren eta Euskal Herriko Unibertsitatearen arteko elkarlanaren ondorioz, datorren urrian abiatuko da Gazteria Ikerketarako Masterraren 2. edizioa. Masterra bereziki interesgarria izan daiteke gazteen egoeran interesa duten lizentziatu berrientzat, bai eta gizarte zientzietako ikertzaileentzat, psikopedagogoentzat, pedagogoentzat, psikologoentzat, soziologoentzat, hezkuntzaren eta gizarte-lanaren arloko profesionalentzat eta abarrentzat.

Gehiago irakurri...

Argentinako La Platak gaur ospatuko du Pello Mari Otaño bertsolariaren heriotzaren mendeurrena

2010/06/18

Pello Mari Otañoren heriotzaren mendeurreneko omenaldiko egitaraua

Duela hilabete burutu ziren Euskal Herrian, Zizurkil bere sorterrian, Pello Mari Otañoren heriotzaren mendeurreneko ospakizunak. Euskal Herrian jaio eta Santa Feko Rosarion hil zen itzal handiko bertsolari honi bere seme-alaba eta ondorengoen herrialdeak egingo dio oraingoan omenaldia. Hitzordua gaur --ekainaren 18an--, eta lekua La Plata hiria. Ekitaldia bi zatitan gauzatuko da. Lehenengo, arratsaldeko 4etan, La Platako kanposantuan, Otañoren hilobian; bigarrena, iluntzeko 6etan, La Platako Unibertsitate Nazionalean. Bi zeremonietan, eta Zizurkil herriaren izenean, Julian Arrastoa eta Joxin Azkue Gabilondo izango dira. Susana Ardanaz Otaño “Txuri” olerkariaren biloba, Europako ekitaldietan egon ondoren, La Platara gerturatuko da ospakizunetan parte hartzeko.

Gehiago irakurri...

Galdutako dantza tradizionalak berreskuratuko ditu Oskorrik Zugarramurdiko Sorgin Egunerako

2010/06/18

Kantari jarri zituen Oskorrik zale eta adiskideak, eta orain dantzari jarri nahi ditu ikusleak. Hitzordua bihar izango da, ekainaren 19an, Zugarramurdin, udako solstizioa ospatzeko antolatutako ekitaldi magiko, esoteriko eta festa girokoan. Dantzak ikastea erreaztearren, ekimena Youtuben sartu da eta bideoak jarri dira sarean Oskorri Dantzak izenarekin; gauzak animatu eta dinamizatzeko ekimen beraren baitan, Oskorri Dantza Kluba izenekoa ere sortu du musikari talde bizkaitarrak, honi buruzko informazioa egokiro eta garaiz banatzearren.

Gehiago irakurri...

Lurra otxotea bihar Bordeleko Operan eta 'Musikaren Besta' astelehenean, Bordeleko Eskual Etxearen eskutik

2010/06/17

Musikaren Eguna dela-eta hainbat ekitaldi antolatu dira han-hemenka munduan eta horiekin bat egingo du helduden astelehenean Bordeleko Eskual Etxeak 'Musikaren Besta' izenaz antolatu duen egitarauarekin. Hor arituko dira arratsaldeko sei t'erdietatik aurrera Kantuz taldea, Xitoak eta Biltzarra dantzariak eta Bestalariak korala, eguna dantzaldi batekin bururatzeko. Lehenago, eta zintzurra bustitzeko aurrekari gisa, emanaldi bat iragarri da bihar ostiralerako, Euskal Etxeari lotutako Lurra otxoteak kantu euskaldun emanaldi bat eskainiko baitu, Bordeleko Operak eraturik.

Gehiago irakurri...