euskal diaspora eta kultura
2010/06/28
Euskadiren Kolonbia, Venezuela eta Ertamerikarako ordezkaria, Iñaki Martinez, Antioquia departamendu kolonbiarreko gobernadore Luis Alfredo Ramosekin eta Nekazaritza idazkari Edgar Arrublarekin bildu zen joan den astelehenean, ekainaren 21ean, Medellinen, ikuspuntuak trukatzea eta Euskadiko eta Kolonbiako eskualde horretako enpresek gara ditzaketen ekimen posibleak aipatzea helburu zuen elkarretaratzean; zehatzago esateko, itsasoarekin eta arrantza munduarekin zerikusia zeukaten gaiak aipatu zituen, hain zuzen.
2010/06/28
Urrundik Euskal Elkarteak antolatuta, nazioarteko dantza elkarretaratzea egin da Paranán, elkarte antolatzaileko dantza taldea eta Uruguaiko Montevideo hiriburutik gonbidatuta propio ekarritako Haize Hegoa Euskal Etxeko Eusko Indarra taldea partaide. Hogeita hamar bat dantzari eta kide euskal-uruguaitarrek osatu zuten ekainaren 4 eta 5ean, larunbat eta igandez, bi eguneko bilerara Haize Hegoatik etorritako ordezkaritza, beti ere bi elkarte eta hirietako euskal komunitateen arteko loturak indartu eta areagotzearren, Urrundik elkartearen hamargarren urteurrenean, eta Argentinako Maiatzeko Iraultzaren Bigarren Mendeurreneko ospakizunen testuinguruan.
2010/06/25
Bi euskal ardo mota edo izendapen hauek maite dituztenek aukera izango dute Londresen egingo den erakustaldi eta dastaldian parte hartzeko. Ekimenaren helburu nagusia bertakoei Euskal ardoaren inguruko ezaguera eskaintzea da, izan ere, kanpoko zale askok 'Espainiar ardoen' inguruko ezagutza duten arren, gutxik daukate euskal ardoen berri. 'Seek the Sensational' izenburupean, ardo erosle, kritiko, zale, eta ostalaritza zein aisialdiko langile eta txikizkako zein handizkako bezeroak bilduko ditu ekitaldiak.
2010/06/25
Argentinarrentzat garrantzi handia duten bi gertaera nazional ospatu dituzte Zazpirak Bat Euskal Etxeko kideek ekainaren 12an eta aurretik maiatzaren 29an. Lehenik, Maiatzeko Iraultzaren urtemuga ohoratu zen beste hainbat herritan bezala, zegokion elkarretaratze eta jaiarekin; bestetik, Rosario hiria ikur argentinarraren sorlekua izanik, Argentinako Banderaren Eguna ere oroitu zuten euskaldun rosariotarrek. Bi festetan, Euskal Herriko eta Argentinako aireak, dantzak eta koloreak nahastu ziren Zazpirak Bat-en egoitzan, bi herrialde hauen arteko lotura berriro ere azpimarratuz.
2010/06/24
Nahia eta bokazioa baditugu, ahalak, ordea, beti eskas, eta nahikeria handia lagun jarduten dugu. Dena den, teknologiaren eta komunikatzeko aro berri honetan, aldaketa sorta ekarri nahi izan dugu EUSKALKULTURA.COMera, lehio berriak zabalduz munduari. Egunero lantzen dugun informazioa bestelako bideez banatu eta barreiatzeko, Facebook sare sozialeko profila berreskuratu dugu. Horrekin batera, kontu bat ireki dugu Twitter-en, egunero argitaratzen ditugun albisteei oihartzun berria emateko geure webguneraino etorri nahi ez duten lagunentzat. Irakurle eta lagunekiko harremana estutu nahi izatea da xedea. Komentariorik baduzu, idatz iezaguzu lotsarik gabe.
2010/06/24
Bogotako Euskal Etxeari lotutako 'Munduko Umeak' abesbatzaren emenaldiak eta Kepa Pinedo musikari euskaldunak emango dituen hitzaldi eta ikastaldiak izango dira gaur hasita eta datorren igandera arte Kolonbiako hiriburuan egingo den 'Bogota Internacional Espectacular 2010' kultur azoka eta elkarretaratzeak bere barnean bilduko dituen euskal osagaiak. Iaz ere euskal partaidetza bildu zuen hitzordu honek 115 kuskizun --tartean dantza, abesbatza, musika, antzerki, gastronomia eta beste zenbait arlotako eskaintzak-- programatu ditu, Kolonbian ordezkaritza duten 34 herrialderi dagozkienak.
2010/06/24
Donostiako Koldo Mitxelena Kulturguneko ekitaldi aretoa izan da 'Euskal Dantza Balioan' jardunaldia gauzatzeko hautatutako egoitza. Aipatzekoa, Sabin Bikandik eta Oier Araolazak, txosten bana aurkeztuta, euskal dantza tradizionalaren hezkuntza sustatu eta sendotzeko ezinbestekotzat jotzen dituzten lan ildoak finkatu eta jebdaurretu zituztela, dantzaren irakaskuntzarako curriculumaren zirriborroa marraztuz.
2010/06/24
Mariann Váczi antropologo hungariarra munduko txapelketara bildu da “Athleticen fenomenoa” azaltzera, Hego Afrikako East Londonen antolatu duten soziologia eta kirolari buruzko batzar batera. Bere curriculumean, euskara Iparraldeko hezkuntza sisteman gaiari buruzko landa-lan bat egin duela nabarmendu daiteke, besteak beste.
2010/06/23
La Platako 14 eta 58 kaleetan dagoen Euzko Etxearen egoitzak topaketak egiteko toki berri bat du ekainaren hasieratik. 'Lagun Artean' txoko edo elkarteak 90 metro koadro ditu, polikiroldegiaren gainean eraiki da, eta erakundeko kideek topaketak eta elkarretaratzeak antola ditzaten dago pentsatuta. Lekuaren inaugurazioa pasa den ekainaren 4ean gauzatu zen, eta euskal etxeko lehendakariaren esker oneko hitzen ondoren, lagunen arteko afaria --Argentinan hain tipikoa den asadoa-- partekatu zuten erakundeko lagunek. “Espero genuen bezala, hurrengo egunetan anitz bazkidek izan zuten elkartea erabiltzeko gogoa eta aukera”, aipatu dute euskal etxeko arduradunek. “Hor bertan egin zen Mus Txapelketaren azken bazkaria eta jadanik euskal etxeko andreek, pilotariek, dantzariek eta Athletic-en Laguntaldeak eskatu dute beren txanda elkarte berrian biltzeko”.
2010/06/23
Madrilgo Euskal Etxearen bazkide fundatzaileetakoa da Maritxu Abaitua Churruca, pertsona aktiboa oso eta lan handia egin duena hiriburu espainiarreko euskal elkartearen alde. Ekainaren 16an Euskal Etxearen Urrezko Entseina jaso zuen Maritxuk Jon Zaballa elkarteko lehendakariaren eskutik, Euskal Etxean bertan egindako ekitaldi xume eta hunkigarri batean. Aukera baliatuta, Julio Elejalde Euskal Etxeko idazkariak denbora hartu zuen omenduarekin bildu eta elkarrizketa interesgarri bat egiteko. Datozen lerroetan horrekiko sarbidea eskaintzen dugu, ezagutzea ondo merezi duen pertsona baita Maritxu Abaitua.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
