euskal diaspora eta kultura
2012/07/13
Datorren asteko astelehenetik ostiralera garatuko da Ziotza-Bolibarren 'Udako Unibertsitate Bolibartarra' 2012, astelehen goizeko estreinatze-ekitaldian bertako alkate Joxe S. Azpiazu, Bizkaiko Foru Aldundiko ordezkari bat eta Jose Maria Unzueta Unsain arituko direla, azken hau ekimena antolatu duen Bolivartiar Ikaskuntza Elkarteko presidente den heinean. Ekitaldiak euskaraz zein gaztelaniaz egingo dira, hizlariaren arabera, eta aztertuko diren gaien artean aipa daitezke ALBA, CELAC, irakaskuntza gaur, Akitania zaharra, software librea, Nafarroa eta baita ekonomia eta matematika gaiak ere. Itxaso Paia kazetariak jardungo du moderatzaile. Amaiera-ekitaldian Esteban Antxustegi EHUko irakaslea. Tomas Urzainqui historialaria eta Patxuko Abrisketa Bogotako Euskal Etxeko presidentea arituko dira, Azpiazu alkatearekin batera, iragarri dute antolatzaileek.
2012/07/13
Asteburuan bukatuko dira Iruñean San Fermin jaiak, baina Diasporako euskal etxe askok iragan asteburuan ospatu zuten euren festa, batzuk "entzierro" eta guzti. Londresen, adibidez, aurten ere Estafeta izena jarri zioten euskal etxe inguruko kale bati, Iruñeko kale mitikoaren omenez. Mexikon eta Sydney-en ehun lagundik gora bildu ziren eta Venezuelako Carabobon ere jendetza bildu zen bazkariaren osteko bigantxen ikuskizunaz gozatzeko prest. Aurreko egunetan Argentinakoen berri eman ostean, honako artikulura munduko beste zenbait festa horietako argazki sorta eta bideo bat bildu dugu.
2012/07/13
'Centro Vasco Argentino de Chascomús - Primera época (1952-1962)' liburua joan den ostiralean, San Fermin bezperan, aurkeztu zen Chascomus bertako ‘Domingo Faustino Sarmiento’ liburutegian, ehun bat lagunen aurrean. Obra Chascomuseko aurreneko euskal erakundearen 60. urteurrena ospatzen den urtean argitaratu da eta Cesar Arrondori zor zaio. Zingirako Euskaldunak-ek aukera baliatzen du gogoratzeko euskal etxearen proposamenek segitzen dutela zintzo demonio, eta hurrengoen artean aipatzen ditu Ikurrinaren Eguna, sukaldaritza ikastaroa, ‘Nafarroa 500 urte’ dokumentalaren emanaldia eta San Inazioren omenezko dantza ikuskizuna.
2012/07/12
Teknologia berriei esker, zuzenean eta minutuz minutu jarrai daitezke gaur egun Sanferminak munduko bazter guztietatik. Baina segimendu soil hori ez da nahikoa Diasporako euskal eta nafar etxeetako lagunentzat eta ospakizun propioak antolatzen dituzte San Fermin jaietan murgildu eta festa ahalik eta bizien biziarazteko, Nafarroako patroiaren omenezko jaiaren izpirituari eutsiz baina beti ere tokian tokiko estilo edo ñabardurei segituz. EuskalKultura.com-eko artikulu honetan, gure erredakziora heldu diren Argentinako Sanfermin ospakizunetako batzuen laburpen eta irudiak.
2012/07/11
Donostian egoitza duen 'Basque Culinary Center' Sukaldaritza Fakultutateko arduradunak Mexikon izan dira eta mexikar hiriburuan aurkeztu dituzte gastronomia alorreko ekimen berritzaile eta innobatzaile honen errealitatea, planak eta asmoak, hain zuzen ere munduan gastronomia alorrean lehen mailako sukaldaritzaren ospea daukan herrialde honetako sukaldaritza eremuko profesional, sukaldari eta adituen aurrean. Izan ere, ekarpen eta lankidetza mexikar zabalagoa nahiko luke BCCek bere baitan eta halaxe esan zuten azteken hiriburuko Biko jatetxe euskaldunean joan den ostiralean egindako ekitaldian Jose Mari Aizega BCCko zuzendariak, jatetxeko Bruno Oteiza eta Mikel Alonso chef euskaldunak anfitrioi egindako aurkezpenean.
2012/07/11
Lourdes Auzmendi igandean iritsi zen Mexiko hiriburura Nevadako Elko herritik, Estatu Batuetako NABO euskal etxeen federazioak bertan egindako Biltzar Nagusiaren aurrean mintzatu eta 'Elko National Basque Festival' delako euskal elkarretaratzean parte hartu ondotik. Hiriburu mexikarrean sailburuak zenbait kontaktu eta bilera izan ditu erakundeekin eta hizkuntza indigenez arduratzen diren politikari, teknikari eta ikertzaileekin, mintzatu delarik, besteak beste Antropolgia eta Historiako Eskola Nazionalean eta bilduz, baita ere Mexikoko Euskal Etxeko eta komunitateko ordezkariekin eta Emprebask-ekoekin. Julian Celaya, Jaurlaritzako Euskal Herritar eta Gizataldeentzako zuzendaria lagun izan du Auzmendik Elkon zein Mexikon.
2012/07/11
Orain dela zazpi urte Estatu Batuetara etortzeko erabakia hartu zuenean, Aitor Inarra donostiarrak ezin zuen imajinatu non bukatuko zuen: euskara irakasle eta aktore Nicole Kidman bezalako izar baten ondoan. Euskal Herritik "atsedena" hartzeko asmoarekin emigratu zuen Inarrak baina, urteak igaro eta herrimina sentitzen hasi zenean, San Frantziskoko Basque Cultural Center-eko euskara irakasle lanean buru-belarri engaiatu zen. Euskal elkartearen bidez heldu zitzaion zineman aritzeko lehen aukera: iragan maiatzean HBO kateak estreinatu zuen "Hemingway & Gellhorn" filmean Nicole Kidman eta Clive Owen-ekin aritu da.
2012/07/11
Alaitasun eta atxikimendu handiz bertakotzen dira Euskal Herriko jaiak gure diasporan eta hori dela eta hiri eta herri askotako euskal zein nafar etxeak gorriz eta zuriz jantzi ziren joan den asteburuan. Beste kasu batzuetan, astebete atzeratu da deia eta datozen larunbat eta igandean, 14 eta 15ean egingo da, ahalik eta jende gehien biltzeko asmoz. San Fermin dela-eta antolatutako hitzaldi eta afariarekin batera, Buenos Airesko Eusko Kultur Etxeak arte erakusketa bat inauguratuko du bere egoitzan. Ayacuchoko Eusko Odola euskal etxeak, berriz, meza eta bazkari batekin ospatuko du nafar jai ospetsua. Hona bi erakundeen gonbidapenak.
2012/07/10
Iragan asteburuan, Iruñean San Ferminak pizten ziren aldi berean, Nevadako Elko herriak bere urteroko Basque Festival edo Euskal Jaialdia ospatu zuen. Jai hauek ezagunak dira Estatu Batuetan, elkotarrek ere entzierroa egiten baitute, benetako zezenekin. Aurten jaiarekin batera NABO Ipar Amerikako Euskal Etxeen fedederazioak Bilkura egin zuen Elkon, eta elkarteen ordezkari asko ere bildu ziren Elkora. Eurekin batera izan ziren ere Lourdes Auzmendi Kultura sailburuordea eta Euskal Herritar eta Gizataldeentzako zuzendari Julian Celaya.
2012/07/10
EuskalKultura.com-ek garaiz eman zuen joan den martxoan Txileko Santiagon egindako Mercomus 2012 txapelketaren berri, bertan txapela irabazi zuen Limako Euskal Etxeko Lopez-Lombardiren garaipena barne. Aste eta hilabete batzuk joan dira eta, posible izan denean, Limako Euskal Etxeak, ongi-etorri eta omenaldi ekitaldi polita egin die Santiagoko mus norgehiagokan bere izenean parte hartu zuten bi bikote perutarrei. López-Lombardi eta Olalla-López bikoteek zinez eskertu dituzte bazkide eta lagunen txaloak, eta hiriburu txiletarrean egin zuten ibilbidea kontatu zieten xehetasunez euskal etxearen egoitzara bildutakoei. Elkarte euskal-perutarrak, bestalde, irailerako iragarri du euskal etxe barruko mus txapelketa irekia; eta aldi berean 2013an Mercomus-eko txapela bertan antolatzeko asmoa iragarri du, horretarako batzorde antolatzailea berehala sortuko duelarik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
