euskal diaspora eta kultura
2012/07/19
Argentinako neguko oporren ostean, abuztuaren 10ean hain zuzen, eta hainbat musikariren lana bilduz, berriro ere ekingo zaio Buenos Airesko Euskal Echea Institutuko Organo Kontzertuaren 2012ko zikloari. Proposamena Ana Paula Segurola organo-jotzailearen eskutik dator eta kari horretara, kontzertuetako errepertorioaz eta oro har euskal musika klasikoari buruz mintzatu gara kontzertista eta irakaslearekin. “Euskal Echea elkarteak eta hemengo Udako Euskal Unibertsitateak aurrera daramaten proiektu honek musika klasikoa eta bereziki organoarena zabaltzeko paregabeko aukera ematen digute eta hori oso baliagarria da” adierazi dio EuskalKultura.com-i jardunbide handiko musikari engaiatu honek.
2012/07/18
Arrokiaga herrian 3.500 lagun espero dituzte hil honen hondarrean Jose Mendiague bertsolariari buruzko pastoralaren emanaldia ikusteko. Diasporan aski ezaguna da Mendiague (Aldude 1845), euskal kulturaren aldeko lan handia egin zuelako Ameriketan eta Hegoamerikako euskal etxeetan itzal handiko pertsonaia izatera iritsi zen. Bertsolari, olerkari eta euskaltzalea, Mendiague 18 urterekin Ameriketara joan eta Argentinan, Txilen eta Uruguain bizi izan zen. Pastorala datorren uztailaren 29an aurkeztuko da eta bigarren emanaldi bat egingo da abuztuaren 5ean.
2012/07/18
Etxepare Euskal Institutuak euskal kultura kanpoan zabaltzeko aurtengo diru-laguntzen bigarren eta azken epea ireki zuen astelehenean. Laguntza hauek euskararen eremu geografikotik kanpo urtean zehar egin edo egingo diren jarduerak babestuko dituzte. Deialdi honetara aurkez daitezkeen jarduerak honakoak izango dira: arte plastiko eta ikusizkoak, musika, arte eszenikoak eta literatura. Eskabideak aurkezteko epea datorren irailaren 14ean itxiko da.
2012/07/18
Hamaika ospakizun burutu dira azken egunotan Diasporako nafar eta euskal etxeetan eta erakunde argentinarrak ez dira salbuespen izan. Izan ere, uztailaren 6an hasita eta joan den igandera arte, San Fermin garaian lagun biltzaile diren bazkari, dantza emanaldi, mus txapelketa eta txupinazoak festen ardatza bihurtu ziren. Urtebete behar da itxaron orain zezenak beriiro ere kalera daitezen; baina bizi izandakoak lagunduko gaitu 2013ko Iruñeko txupinazoa berriro entzun arte. Hona hemen Rauch, Bahia Blanca, Tandil, La Plata eta Ayacuchoko euskal etxeetan baita Mar del Plata eta Buenos Aireseko Nafar Etxeetan ere egindako jaien laburpena.
2012/07/17
EuskalKultura.com-ek atzo iragarritako oharrean jakinarazi zuen "Euskera para dummies" liburua zozketatuz uztailaren 31ean eta irailaren 5ean egingo diren saioetan parte hartzeko jarraipideak. Nolanahi ere, ikusiz dagoeneko iritsi zaizkigun parte hartzeko izen-emateetan akats ugari dagoela, jende askok bere izena bakarrik emanda edo daturen bat ahaztuz idatzi baitu, erabaki dugu berriz ere aipatzea zozketotan parte hartzeko eman behar diren pausoak. On egin eta zorte on!
2012/07/17
Milaka lagun eta kolektibitate anitz bildu zituen uztailaren 9ko Cordobako desfileak, tartean gizatalde euskalduna Gure Txokoa euskal etxeko kideak ordezkari. Argentina bertako adierazpen kulturalez gain, ikurrinak eta euskal dantzak ere ikusi ahal izan zituzten probintziako hiriburuko herrigune berrira bertaratu ziren ikusleek. Joan den asteburuan, berriz, Nafarroako patroikidearen omenezko jaia burutu zuten Gure Txokoa-koek, paella eta guzti. Datozen aste eta hilabeteei begira, dantzari eguna eta San Inazio ospatuko dituzte cordobatarrek eta topaketak egingo dituzte, dantzariak Euskal Astera joateko dirua bil dezaten.
2012/07/16
Editorial Para Dummies argitaletxeari esker, EuskalKultura.com-ek "Euskera para dummies" liburuaren bost ale zozketatuko ditu uztailaren 31ean eta irailaren 5ean. "Euskera para dummies" oinarrizko euskara eta euskarazko esaldi erabilgarriak ikasteko gida azkarra da gaztelania abiapuntu. Ez da berez hizkuntza ikasteko metodoa, baina irakurleek eguneroko egoeretan elkarrizketa sinpleak mantentzeko adina ikasiko dute. Liburua 2009an Frantzian argitaratu zen "Basque pour les nuls" (Euskara zozoentzat) lanaren itzulpena da. Jean Baptiste Cuyos euskaltzaina eta Jasone Salaberria izan ziren egileak. Ale bat nahi al duzu edo norbaiti oparitu? Lagun bat harpidetzea (aurretik bere onespena lortuz) eskatzen dizugu. Gure buletina jasotzea harentzat mesede, eta liburu bana lortzen baduzue, pagotxa osoa! Sartu zozketan!2012/07/16
Santiagoko Eusko Etxeko albisteak dakartzan Berriketari buletinak, elkartean azken hilabeteetan gertatutakoen berri dakar azken alean, tartean Euzko Jaurlaritzako Kanpo Harremanetarako zuzendari Ainhoa Aldayk eta Giza Eskubideen zuzendari Jesus Lozak Txilera eta euskal etxera egindako bisita. Euzko Etxean izan zen baita ere Jose Mari Garate historialari donostiarra, eta Domingo Bonetxea getariarraren bizitzari --eta altxorrari-- buruz egiten ari den ikerketaren berri eman zuen. Gainera, Berriketarik hil honetako hitzordu nagusia gogorarazten die irakurleei: San Inazio jaia, aurten uztailaren 29an antolatua.
2012/07/16
Loiolako San Inazio eguna dela eta, hiru eguneko Euskal Kultur jaia antolatu du Misiones probintziako Corpus Christiko Eusko Etxeak uztailaren azken astebururako. Bertoko eta kanpoko euskaldunak biltzeko asmoa duen festak egitaraua oparoa eskainiko du eta hiru egunetan zehar mota askotako ekintzak garatuko dira, tartean txangoak, herri kirolak, umeentzako jokoak, hitzaldiak, antzezlanak, eta dantza eta musika ikuskizunak. Jaia datorren asteko ostiralean hasiko da, gonbidatuen harrerarekin turismo etxetxoan –San Ignacio hiriko sarrerako arkuan- eta igandean, 29an, bukatuko da despedida bazkari bateekin. Jaia Probintziaren interesekoa izendatu dute Misioneseko agintariek.
2012/07/16
Corpus Christi-ko Eusko Etxea-ko Atahualpa Yupanqui liburutegia bere aspaldiko amets bat beteko du datozen egunetan. Izan ere, ‘Liburutegia munduari begira’ proiektuaren baitan, ‘Kontaketa Harrigarriak’ izeneko lehenengo antologia aurkeztuko du uztailaren amaieran. Euskal erakundeak 2011ko literatur lehiaketako berrogeita hamabost ipuinek osatzen dute bilduma, testu harrigarriak eta pertsonaia tipikoei buruzko narrazioak barne. Aurkezpena San Inazio patroiaren omenezko kultur jaian izango da, uztailaren 27an, San Ignacio herrian. Ekitaldi berean 'IV. Kontaketa harrigarriak' lehiaketako sarien ematea ere gauzatuko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
