euskal diaspora eta kultura
2012/08/09
Diasporako bizitza euskaltzalean goi-mailako ekile eta eragile izan zen Jose Mendiague-ri buruzko pastorala, uztailaren 29an eta abuztuaren 5ean Arrokiaga herriak Zuberoan emandakoan galdu bazenuen, zorteko kontsidera zaitezke Jainkoek azken aukera bat eskainiko baitizute irailaren 8an Hazparnen, Hazparneko herriak bertako biztanle eta herritar izan zuen seme kuttuna ohoratzeko antolatu dituen omenaldi ekintzen baitan. Arrokiagako jokolariak, hazpandarren eskariz, salbuespena egin eta pastoralaren emanaldi berezia taularatuko dute Manexerrian, ohi diren meza, kabalkada eta abarrez, aurretik zein ondotik erakusketa bat, Johaño Bordaxarren hitzaldia eta eskoletan Mendiague eta bertsolaritzari buruzko ekitaldiak programatu direlarik.
2012/08/06
Joan den ostiralean erakusketa estreinatu da New Yorken Menchu Gal margolari gipuzkoarraren (Irun, 1919-2008) ibilbide osoa bildurik. Emakume pintoreen artean aitzindari Euskal Herrian zein estatuan, 1936ko gerra garaian Iparraldera higitu zen eta gerra ostean gizonak nagusi ziren margolaritzaren arloan gogor lan egin behar izan zuen, 1959ean Espainiako Pintura Sari Nazionala lortu zuen lehenengo emakumea bilakatu arte. Menchu Gal zazpi urte zituela hasi zen pintatzen Gaspar Montes Iturriozekin eta Madrilen garatu zuen bereziki bere karrera artistikoa, bere sorterriarekiko loturak galdu gabe. Orotara 70 erakusketa eskaini zituen bakarrik eta beste 232 taldean. 2010ean Menchu Gal Fundazioa abiatu zen Madrilen, pasa den ekainaren 25ean 'Artea Deskubritu' sarietan 'Ondarearen berreskuraketa' lortu duena hain zuzen ere.
2012/08/03
Hirugarren urtez, Eusko Jaurlaritzak eta NABOk (Ipar Amerikako euskal elkarteen federazioak) Gurea izeneko programa eta kultur tailerrak egingo dituzte abuztuan AEBetako zenbait euskal etxetan. Tailer hauek emateko ardura Kanpoan diren Euskal Herritarrentzako eta Gizataldeentzako Zuzendaritzaren bi lizentziatu bekadunek izango dute: Mayte Galardik eta Iñaki Goikoetxeak. Abuztuaren 9tik 28ra Estatu Batuetan izango dira, hiru euskal etxe bisitatuz: Colorado Basque Club (Denver, Colorado), Chino Basque Club (Chino, Kalifornia) eta Rhode Island Basque Club (Portsmouth, Rhode Island).
2012/08/02
Iragan uztailaren 19az geroztik Boiseko Bishop Kelly institutuko bederatzi neska-mutil Euskal Herrian dira, Olabide ikastolarekin egiten ari diren kultur truke bati esker. Eurekin da Cathy Clarkson irakaslea, Boiseko euskal komunitateko oso kide ezagun eta aktiboa. Egonaldian gazte estatubatuarrak euskal familiekin bizi dira, bertako bizitzan integraturik: Santiago egunean, adibidez, blusa jantzi zuten, milaka gasteiztarrek bezala. Aurretik, trukearen lehenengo zatian, uztailean, Olabideko bost gazte Boisen izan ziren Boisen gauza beretsua egiten.
2012/08/02
Egia esateko, antolatzen dituen hitzorduek --giro onez, ongi jatea apreziatuz eta landuz, eta euskal kultura eta ohiturekiko maitasunez-- askoz jende gehiago biltzen dute, baina ez dute lortzen jende kopuru minimoa beste urrats hori eman eta hilabetero 60 dolarreko kuota ordaintzeko, edo gutxiagokoa, aski jende kidetzen bada. Joan den asteburuan bertan Euskal Etxeak San Inazio ospatu zuen, bere egoitzan egindako bazkari eta festa eder batekin eta 'Inazio gure patroi handia' eta guzti kantatu zuten, elkarteko etengabeko animatzaile eta alma materra den Boni Guenechea gernikarrak hitzak banatuta. Miamin bizi bazara, etzazu zalantzarik izan, euskal etxeko kide izateak ekarri handia egiten baitio bertan bizi den edonori. Ez da zertan euskalduna izan beharrik, bai ordea euskaldunen edo euskal kulturaren lagun. Miamiko Euskal Etxeak behar zaitu!
2012/08/01
Martha Perez eta Victor Ortuzar jr, iazko azaro hastapenean hil zen arte Lima-ko Euskal Etxeko lehendakari izan zen Victor Ortuzarren alarguna eta semea, Gasteizen Jaurlaritzan izan ziren joan den astelehenean eta Guillermo Echenique Kanpo Harremanetarako idazkari nagusiarekin eta Kanpoko Euskal Herritar eta Gizataldeentzako Zuzendaritzako lantaldearekin bildu ziren Lehendakaritzan. Bisitari euskal perutarrek bi liburu jaso zituzten, Patxi Lopez lehendakariak dedikatuta, bat eurentzat eta bestea Limako Euskal Etxeko lagunentzat. Ama-semea euren senar eta aita zenaren errautsekin etorri dira Euskadira, Zierbenan aireratzeko, bertan hazia baitzen Limako Euskal Etxeko presidente ohia.
2012/08/01
Iritsi da 'Euskera para dummies' liburuaren lehenengo zozketa egiteko unea eta aurreneko bi liburu hauek Argentinako Tandilerako bidea hartuko dute, bertako bi harpidedun --bat lehenagotik lagun genuena, bestea berria-- izan baitira zorioneko, datozen egunetan liburuaren ale bana jasoko baitute Maitena Mugicak eta Cecilia Lejarretak. Zorionak biei. EuskalKultura.com harremanetan ipini da dagoeneko eurekin, albistearen berri zuzenean emateko. Oraingoan liburua eurenganatu ez duten irakurleek, bigarren aukera ere badute, bigarren zozketa bat egingo baitugu irailaren 5ean. Parte hartzeko arauak, aurreko berak. Kasu honetan hiru liburu banatuko ditugu: bana parte hartzen duten bi lagunentzat eta hirugarrena, eurak erabakitzen duten Euskal Etxearentzat. Ez zazu aukera galdu!
2012/08/01
2012-08-03an EGUNERATUA: BERTAN BEHERA GERATU DA IÑAKI ETXEPAREREN ARGENTINA ETA BRASILERAKO BIDAIA. Nazioarteko ibilbide aberatsa duen musikari honen bisita jaso dute argentinarrek hil honen amaieran. Abuztuko biran, bi geldialdi egingo ditu Iñaki Etxeparek argentinar Andeetan, Mendozan eta San Juanen hain zuzen. ‘Bach eta itsasoa’ delako emanaldia eskaintzeaz gain ‘Biolontxeloaren pedagogia’ bere liburua aurkeztuko du artista irundarrak Hegoameriketako herrialdean. Kontzertuen datak abuztuaren 20an (Mendozan) eta 21ean (San Juanen) izango dira eta horren ostean Brasilera abiatuko da Etxepare bere Hegoamerikako birarekin jarraitzeko.
2012/07/31
Euskal ikutua daukaten albiste paraguaitarrak ugaldu egin dira azken asteotan. Hilabete hasieran, Misiones departamentuko San Juan Bautista hirian Sebastian Sasiain Zubillaga euskaldunari egindako omenaldia nabarmentzen genuen, gatzagar hau eta bere emazte Brigida Zubia Erostarbek egun bertako sukaldaritza herrikoiaren 'Batiburrillo' izeneko izarra den jatekoa eta edateko gauza bera den 'siriki' delakoaren sortzailetzat hartuak baitira. Mereximendu horiek kari, omenaldia antolatu zitzaien azkeneko San Juan jaietan (San Juan Bautistako jaiak dira), azkenean, ohoratzea, Paraguai bizitzen ari zen egoera delikatuarengatik, uztailaren 7an egin bazen ere. Omenaldi horrekin batera, ordea, bertan euskal etxe berri baten sorrera iragarri zen, Uruguaiko bigarrena, eta baita Euskal Aste bat, bigarrena hau ere, Asuncionen, urriaren 22tik aurrera, Eusko Jaurlaritzaren Mercosurrerako Ordezkaritza tarteko, Gernikako bonbardaketaren 75. urteurrena eta Estatutuaren Eguna ospakizunetara bilduz.
2012/07/31
1956. urtean jaio zen Mendozako euskal etxea, beraz aurten bere 56. urtebetetzea ospatuko du. Urtemugaren ekintzak abuztuaren bigarren asteburuan egingo dira eta komunitate osoari luzatu dio gonbidapena erakundeak. Behar bezala ospatzeko, kalitate handiko ikuskizuna ekarriko du Denak Bat-ek festaren edergarri; Cordobako Baietz-eko mutilak Euskal Herriko erritmoetara dantzaraziko dituzte Andeen magaletako euskaldunak. Urtemugaren berriarekin batera, euskara Mendozako Kulturarteko Institutuak irakatsiko dituen hizkuntzetako bat izango dela abuztutik aurrera iragarri diote euskal etxetik EuskalKultura.com-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
