euskal diaspora eta kultura
2012/12/03
Azkue Fundazioak Mintzatu webgunea jarri du abian, euskara teknologia berrien bitartez sustatzeko eta zabaltzeko asmoarekin eta Bizkaiko Foru Aldundiaren eta Eusko Jaurlaritzaren laguntzarekin. Webgunea munduko euskaldunen ekarpenekin osatzen ari da eta erabiltzaileak apurka apurka ari dira jada leku euskaldunak mapan jartzen. EuskalKultura.com-etik ekimenean parte hartzeko gonbitea luzatu nahi diegu Diasporako euskal etxeetako euskara ikasle eta irakasleei eta munduko euskaldun orori. Erabiltzaileen artean sariak banatuko dira, gainera!
2012/12/03
EuskalKultura.com-ek jakinarazi bezala, azaroaren 21etik 25era gauzatu ziren Argentinako Bragado hirian Florencio Constantinoren (1889-1919) omenezko hainbat ekitaldi, tartean, tenore ortuellatarraren izena daraman Antzoki-Kultur Gunearen ber-estreinaldia eta musikariaren gorpuzkinak egin berria den Mausoleora eramatea. Bragadoko herri osoak hartu zuen parte Argentinako zein Euskal Herriko agintariak bildu zituen zeremonietan. Bertako euskal etxea ere izan zen protagonista eta harrotasun handiz adierazi digute "orain Constantinoren gorpuzkinak Argentinako banderaren eta ikurrinaren babespean daude"la.
2012/11/30
Datorren astelehenean, abenduaren 3an, Euskararen Nazioarteko Eguna ospatuko dute munduan zehar euskaldunek. Diasporan eta Euskal Herrian hasiak dira jada ekitaldiak, egun handirako giroa berotzen hasteko asmoz. Hala, Gasteizen Mintzodromo bat egin zen Artium museoan azaroaren 28an, ia 500 lagunekin, eta Madrilen Euskal Etxeko Euskaltegia Euskararen Eguna dela eta bertso-afaria egin zuen Uxue Alberdi eta Onintza Enbeita bertsolariekin. Eta datozen eguneratako zer? Hemen dira Euskal Herrian eta Diasporan egingo diren hitzordu batzuk.
2012/11/30
Erakundearen hogeigarren urtemugan ekintza bereziak gauzatu dituzte Santa Rosako Zelaiko Euskal Etxea-ko kideak 2012 honetan. Eta proposamenen arrakastak bultzatuta, proiektu berri askorekin ekingo diote 2013ari. Azaroaren 18ko bazkarian omenaldi bat egin zien euskal erakundeak La Pampa probintziako Lalo Molina Larrazabal eta Carlos de Urquiza musikariei; eta euren kantekin hasi ziren urte zaharrari adio esaten. Abenduaren 14an Nestor Mazzolo Cazanoveren liburu bat aurkeztuko da euskal etxean. Datozen hilabeteei begira, berritze lanak egingo dituzte instituzioaren egoitza hobetze aldera. Hauek eta Zelaiko Euskal Etxearen beste berri batzuk segidako artikulu honetan.
2012/11/29
Iragan abuztuan aurkeztu zen "Apalabrados" jokoaren euskarazko bertsioa eta harrezkero asko dira jolasarekin engantxatuta gelditu diren euskaldunak. Mugikorretan eta Facebook bidez jokatzen da "Apalabrados" eta euskaraz gain gaztelaniaz, ingelesez, eta katalanez ere badago, beste zenbait hizkuntzen artean. Jokoaren sortzaileak, Maximo Cavazzani argentinarrak, euskaraz dagoeneko 25.000 partida jolastu direla dio eta euskal erabiltzaileen komunitateak gora egiten jarraitzen duela.
2012/11/29
Bihar, azaroaren 30ean eta San Andres Lizarrako patroiaren egunean, Lizarraenea izenarekin bataiatuko dute Ekin Argitaletxeko eta Eusko Kultur Etxea-Eusketxeko kideek Buenos Airesko Mexico kalean dagoen euren egoitza. Izenaren hautaketa esanguratsua da oso euskal etxeko lagun eta agintarientzat, izan ere, argitaletxearen sortzaile eta euskal kulturaren bultzatzaile handia izan zen Andres de Irujo Ollo Nafarroako herri horretan jaiobait 1907ko azaroaren 29an. Bihartik aurrera izango du lekuak izen berria. Hala ere izendatzeko ekitaldia abenduaren 1ean, larunbat honetan izango da, gaueko 9etan, Lizarraenea Etxean, hiriburuko Mexiko kaleko 1880.ean.
2012/11/28
Bordeleko Eskualdunen Biltzarra Euskal Etxeko kideek egun zirraragarria izan zuten iragan azaroaren 25ean, "Aita eta Ama maiteak" ikuskizunari esker. Emankizunean gutunak irakurri eta musikaz lagundu zituzten Mixel Etxekopar, Cecile Tison eta Jean Christian Galtxetaburu musikariek, baina ez edonolako eskutitzak: XIX. mendean Argentinara emigratu zuten euskaldunek etxera bidaltzen zituztenak, baizik. Lekukotza gazi-gozoak izan ziren, batzuetan zinez hunkigarriak eta gordinak, eta ikusleek biziki eskertu zuten ikuskizun berezi hau.
2012/11/28
Ezer gutxi falta da urte bukaerara iristeko baina dudarik gabe mugimendu handiko egunak dira oraindik geratzen direnak. Izan ere, abenduaren 3an San Frantzisko Xabier eta Euskararen Nazioarteko Eguna ospatzen da munduan zehar eta Argentinako euskal etxeek bat egingo dute Euskal Herriko eta Diasporako beste erakunde askoren ospakizunekin. Proposamenak ugariak dira; helburua, ordea, bat bera: euskal hizkuntzarekiko engaiamendua adierazi eta aldarrikatzea. Segidako artikulu honetan, Argentinako Buenos Airesen, General Rodriguezen, Bahia Blancan, San Nicolasen, Arrecifesen, Chascomusen, La Platan, Rio Cuarton eta Cordoban egingo diren elkarretaratzeen egitarauak.
2012/11/27
Eusko Jaurlaritzako Hizkuntza Politikarako Sailburuordetzak hainbat euskarazko tresnekiko loturak bildu eta www.euskara.euskadi.net webgunean ipini ditu era errazean kontsultatzeko moduan. Euretako asko beste erakunde edota instituzio batzuenak izan arren, Sailburuordetzak informazioa bildu eta modu ordenatuan eskaintzeko lana hartu du. Tresna horiek ezagutarazteko kanpaina --besteak beste EuskalKultura.com-en paratua-- atzo abiatu zuen eta abenduaren 2ra arte luzatuko du.
2012/11/27
Nami Kaneko japoniarrak itzuli du Kirmen Uriberen "Bilbao - New York -Bilbao" eleberria eta, gainera, zuzenean euskaratik egin du. Atxagaren "Obabakoak" japonieraz irakurri zuenean euskal hizkuntzak liluratu egin zuen Kaneko, eta duela zortzi urte hasi zen ikasten. Uriberen azken lanaren berri izan zuenean japoniarrek ondo hartuko zuela argi izan zuen eta bere kabuz hasi zen itzultzen. Tokioko Hakusuisha argitaletxeak plazaratu du lana eta harrera ona izan du. "Guk ere itsasoari lotutako kultura daukagu, gure herrian ere desagertzen ari dira mundu eta hitz zaharrak, gure aiton-amonek gerla bizi izan zuten...", azaltzen du Kanekok. "Hemengo irakurleek ezer gutxi dakite Euskal Herriari buruz, baina liburua irakurri eta gero, oso hurbil sentitzen dute".
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
