euskal diaspora eta kultura
2013/02/20
Kea baino alferragoa, zain eta muin, egun txakurra... Euskal esaera zahar hauen esanahia eta gaztelaniazko zein ingelesezko antzeko esamoldeak biltzen ditu esaerajatorrak.com blogak. Maite Goñi irakasleak sortu du orri berri hau, atsotitz hauen erabilera sustatzeko helburuarekin. Goñiren esanetan, "ezjakintasunagatik edo inguruko hizkuntzen eragina nabarmenegia delako, maiz beste hizkuntza horietatik egiten dugu tira lokuzio, esaera edo atsotitzak erabiltzeko orduan. Bada, txoko honen helburua hain ezagunak diren atsotitz edo lokuzio horiek euskara jatorrera ekartzea izango da".
2013/02/20
Korrika 18 martxoaren 14an abiatuko da Andoainen eta 11 egunez, gelditu gabe, Euskal Herria zeharkatuko du, martxoaren 24an Baionara heldu arte. Korrika AEK euskaltegien koordinadorak antolatutako herri lasterketa erraldoia da, helduen euskaratzea eta alfabetizazioaren alde, eta milaka euskaltzaleren babesa jaso ohi du ibilbidean zehar. Diasporan ere gero eta oihartzun handiagoa du eta makina bat lekutan hasi dira jada ekitaldiak prestatzen. Zuk ere halako zerbait egin nahi duzu zure euskal etxean? Jar zaitez AEKrekin harremanetan!
2013/02/19
Jatorri arabarreko Gervasio di Césare genealogista argentinarrak “Historia y genealogía de los Lázarraga” (Lazarragatarren historia eta genealogia) liburua aurkeztu du Txileko hainbat hiritan. Pasa den urtarrilean Viña del Marreko Eusko Etxean izan zela aipatu genizuen, Txileko zazpi presidente ohiren arbaso euskaldunei buruz hizketan; horrez gain Vicuña Mackenako Eusko Etxean eta Santiagoko Txileko Euskal Elkartean izan da, non antolatzaileek jardunaldia arrakasta itzela izan zela azpimarratu duten.
2013/02/19
Sortu berria da proposamena eta hutsune bat betetzera dator. Bere arduradunaren esanetan ‘arrazoi ugari medio, jende askori zaila egiten zaio aurrez aurreko ikastaroetan parte hartzea. Horrek animatuta, aspalditik neukan ideia bat gauzatzea erabaki dut’. Mariana Fernandez Castellik eskarmentu handia dauka Argentinan Euskal Herriari buruzko tailerrak ematen eta euskarri berri honetan ohiko elkarretaratzeen muina mantendu nahi du. “Tailerretan bezala, eta harreman dinamikoak sortze aldera, ezagutza denon artean eraikiko dugu. Beraz, interesa baduzu, hemen aurkituko gaituzu, noiznahi”, adierazten du. Tailerrak gaztelaniaz dira eta parte hartzeko nahikoa da ‘Taller de Introducción a Euskal Herria’ facebook orrian sartzea.
2013/02/19
Etxepare Euskal Institutuak hiru argitalpen aurkeztu zituen atzo prentsaurrean eta gaurtik aurrera eskuragarri jarriko ditu bere webgunean, PDF formatuan. Batetik, Euskal Antologiak Saileko lehen bi aleak, biak ere hirueledunak (euskara, gaztelania, ingelesa): Mikel Ayerberen "Euskal narratiba garaikidea: katalogo bat" eta Jone Arrotajairegik idatzitako "Egungo haur eta gazte literatura: katalogo bat". Bestetik, Eider Rodriguezen
"Katu Jendea" ipuina, euskaraz, gaztelaniaz, frantsesez, nederlanderaz eta
alemanez Euskal Sortzaileak Sailaren baitan.
2013/02/19
Gure irakurleei gogorarazi nahi diegu oraindik garaiz direla 2013 urterako euskal etxeentzako laguntzak eskatzeko, eta baita ere tarte berean Diasporan egoera larrian dauden pertsonentzako laguntzak eskatzeko. Bi deialdien eskabideak aurkezteko epea hil honen bukaeran itxiko da, otsailaren 28an, zehazki. Jarraian deialdiei buruzko informazio gehiago eta eskabideak aurkezteko beharrezkoak diren imprimakien loturak bildu ditugu.
2013/02/18
Argazki mordoa bidali dizkiguzue zuentzako prest geneukan Canon argazki kameraren zozketan parte hartzeko. 130 argazki! Oso ederrak guztiak, bilduma polita osatu dugu. Eskerrik asko guztioi parte hartzeagatik eta euskal kultura munduan zehar nola bizi den erakusten eta zabaltzen laguntzeagatik! Azkenean, La Platako (Argentina) Maitena Etcheverry suertatu da garaile. Zorionak! Goza ezazu!
2013/02/18
Santa Ageda bezperan kantuan ateratzeko ohiturak euskal diasporan jarraitzaile gogotsuak ditu; horren adibide dira Boiseko eta Madrileko euskal etxeak, hitzordua urtero betetzen dute eta. Aurten ere ibili ziren, bai, Boiseko euskaldunak hiri estatubatuarrean etxerik etxe kantuan; oraingoan Kataluniako lagun batzuen partaidetzarekin. Boisen gainera, harrobia sendo dator, eta Ikastolako neska-mutilek ere egin zuten kantalditxoa. Bestalde, Madrilen, urtero legez euskal etxeko talde handi bat Espainiako hiriburuko Plaza Nagusian kantuan aritu zen. Sarean bideoa jarri dute.
2013/02/18
Coronel Pringleseko euskal etxea izango da datorren otsailaren 23an euskal bitxigintza erakusketaren egoitza. Erakusketariak Lapridako bitxigintza tailer kontzeptualeko ikasleak izango dira eta 2012an Silvia Azpiazu irakaslearen eskutik egindako piezak jarriko dituzte ikusgai. Esposizioaren baitan Cnel. Pringleseko Eusko Alaia abesbatzako Marta Lazartek kanta batzuk eskainiko dizkio publikoari. Etorkizunari begira, Silvia Azpiazu-ren taldeak erakustaldi kolektibo bat antolatuko du Tres Arroyos hirian ikurrinaren egunean, uztailaren 14an, hain zuzen.
2013/02/18
'Mundu guztia Alta Gracian' bertako Gizataldeen Jaiaren leloa baino gehiago da. Izan ere, ahalegin handia egiten dute herriko udalak eta jendeak metafora egiazki gauza dadin. Izan ere Alta Graciako eta eskualde osoko kolektibitateak oro gonbidatuta daude urtero jaialdi honetan parte hartzera, bakoitza bere altxor preziatu eta berezkoenekin ager dadin, musika eta dantzak, jantzi eta banderak, janariak eta usainak tartean. Euskal kolektibitatea ere elkarretaratze erraldoi honen protagonista izan da eta, Cordoba hiriburuko Gure Etxea Euskal Etxeko dantzariak ordezkari, bere egin zuen jaialdiko oholtza nagusian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
