euskal diaspora eta kultura
2013/03/07
Zazpigarren urtez jarraian bilduko dira Buenos Aires probintziako Cañuelas herrian inguruko euskal etxeetako gazte dantzariak Aberri eguna ospatzeko. Aurtengo deialdia, apirilaren 6 eta 7an izango da eta antolatzaileek jakinarazi dutenez, aldaketa gutxi asteburuko egitarauan: ordezkaritzen harrera larunbat goizean; dantza emanaldia iluntzean eta agurra igande eguerdian. Vaucherren prezioari dagokionez, 320 peso, dantzari eta zuzendarientzat, eta 350, lagunentzat.
2013/03/07
"Moroak gara behelaino artean?" liburua katalanez argitaratu dela eta, elkarrizketa bi eman ditu berriki Joseba Sarrionandia idazle iurretarrak; bata El Correo egunkariari eta bestea Gara egunkariari. Biak ala biak interesgarriak dira oso, gutxitan izaten baita 1985az geroztik ihes eginda dagoen idazlearekin elkarrizketak irakurtzeko aukerarik. Jarraian bi elkarrizketa horien loturak ematen ditugu (gaztelaniaz dira) eta baita ere azken urteetan Sarrionandiak eskaini dituen beste bi, euskaraz.
2013/03/07
Urtero bezala, martxoaren hasierarekin batera urte osorako ekintzen egitaraua aurkeztu du Jose C. Paz hiriko euskal etxeak, Buenos Aires probintzian. Proposamena zabala da eta mota askotako aktibitatetan parte hartzeko gonbitea luzatzen dio komunitateari. Euskararena izango da aurten hasiko den lehenengo ikastaroa eta horri dantzak, arte plastikoak, literatura eta beste hainbat eskaintza jarraituko dizkiote. Oporosteko mugimendua, ordea, otsailean hasi zen nabaritzen Toki Eder-en egoitzan. Izan ere Natalia Laborde eta Aitor Pescador bikotearen bisita jaso zuten euskal etxeko kideek, joan den ostegunean.
2013/03/06
"Irudimena" lehiaketaren hirugarren edizio deitu dute Iparraldeko Euskal Erakundeak eta Azkue Fundazioak eta bertan parte hartzeko gonbitea luzatu diete Euskal Herriko zein Diasporako sortzaileei. Erronka polita proposatzen du lehiaketak: Euskal Herrriko soinumapatik hartutako zortzi soinu ematen dituzte aukeran eta, horietatik abiatuta, soinu berri bat, testu bat edo irudi bat sortu behar da. Lanak maiatzaren 15a baino lehenago bidali behar dira. Sariak Fnac dendetan gastatzeko diru-txekeak izango dira: 300 eurotakoak modalitate bakoitzeko lehenengo postuan suertatzen direnentzat; 200 eurotakoak bigarrenentzat eta 100 eurotakoak hirugarrenentzat.
2013/03/06
Diasporako euskaldunek eta munduko rock zaleek Fermin Muguruzaren musika zuzenean entzuteko aukera izango dute udaberritik aurrera, kantari irundarrak No More Tour 2013 abiatuko baitu datorren martxoaren 21ean. Oraingoan Kontrakantxa izeneko banda izango du alboan Muguruzak, azken urteetan berarekin aritu diren 8 musikarik osatuta. Bira Kurdistanen hasiko da eta Europa, Amerika eta Asiako hainbat hirietara helduko da abuztuaren 31a bitartean. Kontzertuen zerrenda osoa, jarraian.
2013/03/06
‘Ekialde eta Mendebaldeko erritmo, usain eta zaporeak’ du izena Chascomuseko Museo Pampeano delakoan burutuko den Kolektibitateen Festak. Beste zenbait gizatalderekin batera, euskaldunek ere muntatuko dute euren txokoa, euskal kultura zabaldu eta eskolako material bilketa gauzatzeko. Jaia martxoaren 9an izango da, gaueko 9etan, eta herri askotako janari tipikoak egongo dira dastagai. Datorren ostiralean, bestalde, Emakumearen Eguna ospatuko du Euskal Etxeak eta martxoaren 23an, Urteroko Ohiko Biltzarra egingo.
2013/03/05
Argentina, Txile, Euskal Herria, Estatu Batuak, Italia, Espainia, Kolonbia, Brasil, Alemania, Katalunia... toki guztietako partaideak izan ditugu Korrika 18ko elastikoen zozketan, 189 guztira! Eskerrik asko guztioi! Baina, azkenean, hamarrek bakarrik eskuratu ahal izan dituzte elastikoak. Zure izena zerrendan ote dagoen jakin nahi? Adi!
2013/03/05
Argentina, Txile, Euskal Herria, Estatu Batuak, Italia, Espainia, Kolonbia, Brasil, Alemania, Katalunia... toki guztietako partaideak izan ditugu Korrika 18ko elastikoen zozketan, 189 guztira! Eskerrik asko guztioi! Baina, azkenean, hamarrek bakarrik eskuratu ahal izan dituzte elastikoak. Zure izena zerrendan ote dagoen jakin nahi? Adi!
2013/03/05
Diasporako euskal gazte eta ez hain gazteentzako oso interesgarria izan daiteke geurera heldu den proposamen hau: Gasteizko familia bat ingelesez dakien "au pair" baten bila dabil, ekainetik aurrera haurrak zaintzeko. Sendia euskalduna da eta oso gustura hartuko luke euskara ikasi nahi duen pertsona bat. Lana sei urteko neskatoa eta zortzi urteko mutila ikastolatik jasotzea eta udaran egunean zehar zaintzea da. Horren truke "au pair"ak ostatua, janaria eta astean 70 euroko ordainsaria jasoko du.
2013/03/05
Topaguna Euskara Elkarteen Federazioak Laburbira euskal film laburren jaialdiaren hamargarren edizioa antolatu du aurten. Atzo bertan abiatu zen zinemaldi ibiltari hau, Erandion, eta martxoaren 29a birtartean Euskal Herriko eta Diasporako hainbat tokitara eramango du iaz eginiko euskal film laburren sorta ederrra. Ostiralean, esaterako, Londresera helduko da, London Basque Society euskal etxeak antolatu duen ekitaldiari esker. Martxoaren 23an, berriz, Pariseko Euskal Etxean izango dira ikusgai.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
