euskal diaspora eta kultura
2011/02/09
Cordobako Gure Txokoa Euskal Etxeko dantza taldeak Alta Gracia hiriko Gizataldeen Azokan parte hartu zuen joan den astean, euskaldunen emanaldia telebista nazionalak eskaini zuelarik. Azokak 'Todo el mundo en Alta Gracia' izenburua zuen eta aurtengo edizioak bisitari marka guztiak hautsi dituela adierazi dute bertaratu ziren euskaldunek: 30.000 lagundik gora izan ziren euskal taldeak parte hartu zuen gauan. Gure Txokoa elkarteko ordezkaritzarekin batera Rio Gallegoseko Hegoalde Argentinarra Euskal Etxeko lagunak ere bertaratu ziren.
2011/02/09
Bi euskal etxe berri onartu zituen atzoko Gobernu Bilkuran Eusko Jaurlaritzak aurrerantzean euskal etxeen munduko erregistroan sartzeko. Latinoamerikakoak dira biak, Brasilgo Brasilia hiriburuko Eusko-Brasildar Etxea, lehena; eta bigarrena, berriz, Uruguaikoa, Flores departamenduko Euskal Etxea. Honekin, hiru dira dagoeneko Brasilen onartuta dauden euskal etxeak, eta hamar Uruguaikoak.
2011/02/08
Telebistako hainbat dokumentaletan urrutik dauden herri eta kulturei buruz hitz egiten da askotan. Askotan ere dokumental horiek aurkezteko arduradunak edadeko adituak dira. Joan den urtarrilaren 4an Argentina Telebista Publikoak igorri zuen saioan, berriz, Euskal Herriaz hitz egiteko aukera izan zuena aditua zen, bai, baina adin gutxiko aditua. 'Caja Rodante' umeentzako saioko 'Historias Rodantes' atalean, Faustino Caneva Anitua txikiak Buenos Airesko Laurak Bat-en instalazioak eta han bertan egiten diren ekintzak erakutsi zizkion ikusleriari (ikus bideoa).
2011/02/08
Larunbatean bukatu zen Expolangues hizkuntz-azokan Eusko Jaurlaritzak antolatzaileei proposatu die 2013ko edizioan euskara azokako hizkuntza gonbidatua izan dadin. Era berean, Lurdes Auzmendi Eusko Jaurlaritzako Hizkuntza Politikarako sailburuordeak eta Hervé Trinquet Pariseko Eskual Etxeko lehendakariak euskara sustatzeko hitzarmena sinatu zuten. Horrez gain Azkue fundazioak hitzarmena sinatu zuen Parisen Iparraldeko Euskal Kultur Erakundearekin, bien arteko elkarlana sustatzeko asmoz. Azkenik, Nafarroako Gobernuak ere bere standa zabaldu zuen Azokan, Euskarabidea institutuaren bitartez.
2011/02/08
Joan den astean EuskalKultura.com-eko orriotan Misiones probintzia argentinarreko Corpus-ko Eusko Etxeak deitutako 'Kontaketa Harrigarri'en Lehiaketako hirugarren deialdiaren berri ematen genuen. Antolatzaileak gugana zuzendu dira, adierazteko oraingoan, "jasotako eskabideak kontutan hartuz" helbide elektroniko berri bat zabaldu dutela, soilik originalak biltzeko, lehiaketan parte hartzea erraztearren; izan ere asko baitira Buenos Airestik mila kilometro pasexe iparraldera dagoen Corpusetik urrun bizi diren pertsonek egindako kontsultak eta parte hartzeko adierazitako interesa. Originalak bidaltzeko azken epeak martxoaren 30a segitzen du izaten.
2011/02/07
Bartzelonako Euskal Etxean gertu dira Zinemaldiaren seigarren edizioari ekiteko. Datorren asteko asteazkenetik hasi eta martxoaren 9an bukatuko da kataluniar hiriburuan egiten den euskal zinema jaialdia. Lehenengo aldiz Zinemaldiko emanaldi guztiak euskal filmak izango dira, eta mahai inguruak egingo dituzte filmeen egile, zuzendari eta aktoreekin. 'Izarren hautsa', Barbara Goenaga aktorearekin, eta '80 egunean', hainbat zinemalditan saritua izan den filmea, dira proposamen hauetariko batzuk, Diasporan, AEBetako Elkoko euskaldunekin errodatutako 'Amerikanuak' dokumentalarekin batera.
2011/02/07
Gauza jakina da euskararen egoera ez dela onena Nafarroan, eta kasu askotan etorkinek nahikoa lan daukatela bizitzan aurrera egiten, bertako hizkuntza eta kulturari erreparatzen hasi gabe ere. Egoera hori eta integrazioa bera haurrak medio bidera daiteke, seme-alabak D ereduko eskola publikoetara edo ikastoletara bidaliz gurasoek ere etxeratu egiten baitute euskararen presentzia. "Hemen bizi gara eta hemengo gauzak bizi nahi ditugu", diote berez Mar del Platakoak izan arren azken urteotan Iruñean bizi diren Martin Oreja eta Veronica Grande senar-emazteek.
2011/02/07
'Gerrako umeetako' bat da Maria Luisa Jauregui de Garmendia. Beste lau mila euskal haurrekin batera Bilbotik Ingalaterrara ihes egin behar izan zuen 12 urterekin eta 21ekin Hego Ameriketara etortzea erabaki zuen. Argentinan, Rosario hirian hain zuzen, bere familia osatu eta gaur egun bi seme-alaba, sei biloba eta birbiloba bat ditu. “Bizitzako gertakariek pertsona ona edo gaiztoa bihur zaitzakete, batez ere erresuminagatik. Ni, ordea, gauza txar guztietan alde onak aurkitzen saiatu izan naiz”, kontatu zuen Jauregui andereak, Rosarioko Zazpirak Bat Euskal Etxearen “Euskaldunaren Hitza - Palabra de Vasco” irratsaioan egin zitzaion elkarrizketa hunkigarrian. Hona emakume euskaldun, kementsu eta baikor baten historia.
2011/02/07
Euskal Herritik paperean zein sarean gazteei zuzendua euskaraz plazaratzen den Gaztezulo aldizkariak Argentinako euskara irakasleentzako barnetegiari buruzko artikulua argitaratu du azken alean, Rio Cuarton egin berri den azken edizioaren harira. Orain dela 20 urte Macachinen hasi ziren barnetegiek fruitua eman dute, eta egun, Argentinan, euskara ikasitako hainbat ikasle eta irakasle dabiltza. Gabriel Arce da horietariko bat, eta Maite Bilbao beste bat. Azken hau, argentinarra izanik Hernanin ari da Euskal Herrian jaiotakoei euskara klaseak ematen. Bejondaizuela!
2011/02/04
'Txapela buruan ta ibili munduan!' dio esaera zaharrak eta Korrika 17-k, txapelaren ordez petoa jantzita, munduan zehar ibiltzeko gogoa du edizio honetan, Diasporako euskaldunen laguntzarekin. Aurreko Korriketan hainbat euskal etxek bat egin dute euskararen aldeko lasterketa herrikoiarekin: Londres, Bartzelona, Madril, Necochea, New York, Reno... eta Shanghairaino heldu da korrikazaleen aldarria. Aurten antolakuntzak leku berezia eman nahi die Diasporako korrikalariei eta AEK-k horretarako laguntza bidaliko du euskal etxeetara. Aurrera euskalariak!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
