euskal diaspora eta kultura
2011/05/17
Euskal Etxearen egoitza bukatzeko lanak bideratuta daude jadanik Saladillon. Alabaina, komunitatearen laguntza behar dute herri honetako euskaldunek eraikuntzaren bigarren zatia amaitu ahal izateko. Helburu horrekin, zozketak antolatu ditu euskal erakundeak. Ehun pesoko bonoak kaleratu ditu Itxaropen-ek eta bonoak erosten dituzten partaideek Euskal Herrira bidaiatzeko bi pertsonentzako txartelak irabazteko aukera izango dute. Helburu berarekin herriko udalak 20.000 pesoko dohaintza egin zion euskal etxeari Elvira Kortajarena Jaurlaritzaren Argentinako Ordezkaria bertan izan zen ekitaldi batean.
2011/05/16
Argentinarako eta Mercosur hitzarmeneko herrialdeetarako Euskadiren ordezkariak, Elvira Kortajarenak, bere ardurapean dauden eremuetako euskal etxe guztiak ezagutzeko egitasmoarekin darrai. Ekimen horren barruan joan den maiatzaren 10ean Kortajarena Buenos Aires probintzia barnealdeko Olavarria herrian izan zen, desagertzeko zorian egon ondoren berriz ere bere onera etortzeko bidean ari den Gure Etxe Maitea euskal elkartea ezagutzen. Bertan ordezkariak hiriko hedabideentzako prentsaurrekoa eman zuen eta ondoren euskal etxeko kideekin bildu zen.
2011/05/16
Joan den urteko irailean Cordobako euskal etxearen zuzendaritzarekin ados ez zegoen lagun talde batek 'Gerora' euskal elkartea sortu zuen Argentinako probintzia mediterraneoko hiriburuan. Bederatzi hilabete hauetan, ekintza ugari antolatu eta garatu dituzte elkarte berriko kide eta arduradunek, tartean herriko inauterietan aurkeztutako Lantz-eko dantzak, kontzertuak, tailer eta hitzaldiak, Euskararen Astea eta euskara klaseak, batzuk aipatzearren. Orain, elkartea ordezkatuko duen logoa diseinatzeko lehiaketa antolatu dute. “Sormena bultzatu eta instituzioaren proiektuetan publikoaren partaidetza sustatzeko” asmoa duen lehiaketa hau abian dago jadanik; epea ekainaren 10ean bukatuko da.
2011/05/16
Aizpea Goenagak, Etxepare Institutuaren zuzendariak, Alemaniako Constanza Unibertsitatearekin hitzarmena sinatu du gaur Donostian, bertan Euskara eta Euskal Kultura irakurletza abiarazteko. Horrez gain, jakitera eman du 2011-2012 ikasturtean Standford, Liverpool eta Poznaneko unibertsitateetan eta, ziurrenik, Pariseko Sorbonna IIIn eta Kaliforniako Santa Barbaran ere, irakurletzak martxan jarriko direla. Era berean, irailean Chicagon eta New Yorken euskal ikasketa katedrak abian izango direla azaldu du Etxepareko Euskara Sustapen zuzendariak, Mari Jose Olaziregik.
2011/05/13
Datorren maiatzaren 25ean Iñaki Urlezaga dantzari euskal-argentinarra Bilbon izango da 'La Traviata' operaren balleta aurkezteko. Urlezagak berak egina da koreografia eta Ballet Concierto bere konpainiarekin taularatu du. Arrakastatsu ari da izaten lana Urlezaga Europan zehar egiten ari den bira honetan. 'La Traviata' balletaz gain, Urzelagak 'Suite Don Quijote' eta Ravelen Boleroan oinarrituriko koreografiak ere taularatuko ditu Arteria Campos Eliseos Antzokian, maiatzaren 26ean.
2011/05/13
Kaliforniako Bakersfield hiriko Noriega Hotel jatetxeak James Beard Fundazioaren saria jaso zuen joan den astelehenean New Yorken. James Beard Fundazioak AEBetako sukaldari eta jatetxe onenak aukeratzen ditu urtero eta ospe handiko sariak ematen ditu. Aurten, AEBetako Jatetxe Klasiko Herrikoi Onena sailean garaile izan da Noriega Hotela, 1893an Faustino Noriegak eta Fernando Etcheverry sortu zuten euskal ostatua. Egungo jabeak Rochelle Ladd eta Linda McCoy (Elizalde) sari banaketan izan ziren, AEBetako sukaldari famatuenekin batera.
2011/05/13
Euskaldunen hizkuntza Argentinako San Miguel hirian ezagutaraztea da Askatasunaren Bidea elkartearen helburuetako bat eta helburu hori betetzera bideratuta dago jadanik. Pasa den apirilaren 16an, eta Marina Aranguren irakasle, burutu da euskal hizkuntzara hurbiltzeko lehenengo klasea. Ikastaroa zortzi elkarretaratzetan emango da, hiriko Udal Museo Historikoaren egoitzan. “Dakigunaren arabera, San Miguel sortu zenetik, Euskal Herriko hizkuntza irakasteko erronkari ekiten dion lehenengo erakundea da gurea”, adierazi du Horacio Marotto Askatasunaren Bidea elkarteko kideak.
2011/05/13
Berez Euskal Herriko Unibertsitateko irakaslea bada ere, Nevada-Renoko Unibertsitatean irakasle gonbidatu bezala dabil ikasturte honetan Oskar Alvarez Gila historialaria, zeinak joan den asteartean, Boiseko Euskal Museoak deituta hitzaldia eman zuen Museoaren egoitzan bertan, “Before the Ikurrina was the Basque Flag. Icons of Basque Identity in the Americas (1880-1935)” gaiaz; alegia, 'Ikurriña euskal bandera izan aurretik. Euskal Identitatearen ikonoak Ameriketan (1880-1935)'.
2011/05/13
Euskal Etxearen beste urtebetetze bat giro onean ospatzeko bildu ziren joan den apirilaren 17an Paranako 'Urrundik' elkarteko kide eta lagunak. “Oso momentu ona da hau euskal etxearen sorrera gogorazteko, erakundearen hazkundea begi bistan baitago”, adierazi zuen euskal etxeko lehendakaria den Federico Borrasek. Bazkarian zehar, zozketak egin ziren eta musika emanaldiez gozatu ahal izan zuten gonbidatuek. Testuinguru honetan Borrasek berak egiten duen 'Presencia Vasca' irratsaioaren 21. urteurrena ere ospatu zuten euskal paranatarrek.
2011/05/12
Tokioko metroa, Moskuko Plaza Gorria, Argentinako Perito Moreno glaziarra, Miamiko Jai Alai frontoia eta Zelanda Berriko Wanaka lakua... Leku hauetara guztietara iritsi da Josu Bergara bakarlariaren "Nora Zoaz" lana, "CD crossing" ekimenari esker. 2010ean abiatu zuen Bergarak proiektu hau, "bookcrossing" delakoan oinarrituta. Horrela, azken urtean 30 lagunen maletan bidaiatu du CDak eta munduko hainbat bazterretan 'askatu' edo utzi dute diskoa, aurkitzen duenak goza dezan. Larunbat honetan Bergarak berak askatu ahal izango du ale berri bat Londonen, Euskal Etxeak gonbidatuta kontzertua emango du han eta.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
