euskal diaspora eta kultura
2011/02/16
Bilbotar olerkariaren lagun talde batek, tartean idazle eta poetak, musikariren bat, argitaldariak eta hiriburu bizkaitarreko literatur eta poesia inguruetan mugitzen diren jendeak, omenaldia prestatu dio bihar ostegunez Bidebarrieta Liburutegian Sergio Oiarzabal poeta gazteari, joan den ekainean eta tupustean, 36 urte zituela hil ondoren. Poetaren testuen zatiak musikak ladunduta irakurriko diren ekitaldia hunkigarria eta lagunarte girokoa espero da. Sergio Oiarzabal, euskal diaspora gaietan aditua den eta egun Deustuko Unibertsitatean eremu horretan ikertzaile diharduen Pedro Oiarzabalen anaia zen. Hitzordurako ateak zabalik egongo dira parte hartu nahi duen ororentzat.
2011/02/16
Diasporako euskaldunak aipatzen ditugunean, zalantzarik ez dugu eurak Euskal Herriko parte direla. Artikulu honetan aipatzen dugun Arantzazu Amezagaren kasuan, ezaguna da oso bere ibilbidea --geografikoa zein bizitzan zehar garatu duena-- eta han-hemenka utzi dituen emaitzak. Diaspora, bere kasuan, familiaren eta senarren aldetik ere haren familiaren aldetik datorkio, Diasporako alaba, emaztea, ama eta amatxi baita. Argentinan sortua, lotura sakonak dauzka Uruguai eta Venezuelarekin, eta, bistan da, baita Euskal Herriarekin ere, urteak baitira 'itzuli' zela eta egun Nafarroatik garatzen baitu bere ekimena.
2011/02/15
Euskal Herrian, joan den astetik aurrera egunkari eta komunikabideetan lekurik gehien hartzen ari den berria Sortu alderdiaren aurkezpenaren ingurukoa da, izen berri honekin plazaratu baita 'Alderdien Legea' delakoa medio azken urteotan legez kanpo egon den ezker abertzalea, oraingoan alderdiaren estatutuetan indarkeria guztiak, ETArena barne, arbuiatzen dituela. Maiatzean foru eta udal hauteskundeak izango direlarik Hego Euskal Herrian (Iparraldean ere bozak dira, baina Batasuna legepekoa da) gizartea eta mundu politikoa aztoratuta dabil Espainiako gobernuak eta justiziak hartuko duten jarreraren aurrean. Legeztapenaren alde, manifestazio baterako deia zabaldu da datorren larunbaterako Bilbon. Jendaurrean aurkezterakoan, Diasporako euskaldun batek, Cesar Arrondo argentinarrak, irakurri zuen deia gaztelaniaz.
2011/02/15
2009an proposamen ausart batekin ireki zizkion ateak Buenos Aires hiriburuko Euskal Echeak Argentinako komunitateari. “Handia da dagoen jakinmina euskal kulturarekiko eta, aldi berean, aukera gutxi daude ikasteko. Agian, Udako Unibertsitate batek hutsune hori bete dezake”, azaltzen zuen proiektua proiektu baino ez zenean Enrique Aramburu ideiaren bultzatzaile nagusiak. Gaur, hirugarren edizioa bukatuta, hasierako helburuak bete eta proposamena asko hazi dela aitortzen dute antolatzaileek: “Ikasleen lanak gero eta hobeak dira, aurten ordaindu ahal izan diegu irakasleei eta kanpoko irakasle gonbidatu baten hitzaldiak itxi du ikastaroa. Geure burua gaindituz joan garen seinalea da”, ondorioztatu dio Aramburuk EuskalKultura.com-i.
2011/02/15
Louisianako euskal komunitateak denbora darama LA Basque American Society & Cultural Organization (LABASCO) elkartearen aktibitatea berrabiarazten. Katrina zikloiak 2005ean eragin zuen txikizioren ostean taldea sakabanatu egin zen, baina emeki emeki atzera ari dira, Michel-Antoine Goitia-Nicolas elkarteko buruzagiak azaldu duenez. Momentuz, 2011ko ekintza berezi edo zelebrea iragarri berri dute: New Orleans-eko 'Sanferminetan' parte hartuko dute. Entzierro eta guzti egiten omen da jai hau, baina zezenen ordez... neska patinatzaileak ateratzen dira!
2011/02/15
Multimedia-Komunikazioa EHU-EiTB Masterraren baitan euskarak eta euskaldunek azken hamardetan nazioarteko prentsan izan duten oihartzunari buruzko ikerketa egiten ari dira ikasleak. Blog batean argitaratzen ari dira orain arte bildutako hainbat material, berri bitxi eta hausnarketa. Diasporako euskaldunei blogean parte hartu eta datuak komentatu edo informazio eta istorio pertsonalak gehitzeko gonbitea egin diete egileek. Datozen asteetan mezu berriak gehitzen segituko dutela iragarri dute.
2011/02/14
Lau urte egin ditu lehendakari eta Madrilgo Euskal Etxeko barne araudiak dioenari segituz, ezin zuen Jon Zaballak kargu horretan hautatua izateko aurkeztu. Hiriburu espainiarreko Euskal Etxearen Biltzar Nagusiak, beraz, orain arte elkarteko idazkari zen Julio Elejalde hautatu du lehendakari berri eta Jon Zaballa lehendakariorde bozkatu du. Zaballari lehendakari izan den artean egindako lana aitortu eta eskertzeko, aurreko eta oraingo Zuzendaritza Batzordeak bildu egin ziren, ohorezko makila bat ematearren "azkeneko lau urteotan dotoreziaz eta trebeziaz buruzagi izan dugunari", adierazi dute Euskal Etxetik.
2011/02/14
Joan den urtarril hondarretik da Madrilgo Euskal Etxeko lehendakari Julio Elejalde bilbotarra. Bertako idazkaria zen ordura arte, eta elkarteko ardura gorena eman diote geroztik. Bere agintaldian gauzatu nahi dituen asmoen artean, kultura arloko eskaintza indartzea eta ahalegin berezia egitea gazteak erakartzearren. Eta mezua bidaltzen die Euskal Herriko artista eta kulturgileei: erabil dezatela Euskal Etxea Madrilen aurkezpenak edo emanaldiak egin nahi badituzte. "Euskal Etxeko ateak zabal-zabalik dituzte".
2011/02/14
Oscar Alvarez eta Eneko Sanz historialariek Eusko Jaurlaritzak 1937tik 1965era bitartean munduan ezarri zituen ordezkari eta Ordezkaritzen gainbegirada aurkeztu du Euskonews astekari digitalean, hiru astetan argitaratu diren beste hainbeste artikulutan. Bertako datuen arabera, Jaurlaritzak ordezkaritzarik izan zuen, besteak beste Madril, Bartzelona, Valentzia, Paris, Baiona, Donibane Lohizune, Bordele, Brusela, Londres, Dublin, Geneva, Sofia, Belgrado, Budapest, Varsovia, Praga, Kairo, Erroma, New York, Boise, Dominikar Errepublika, Habana, Manila, Puerto Rico, Buenos Aires, Txileko Santiago, Montevideo, Bolivia, Mexiko, Guatemala, Caracas, Panama, Bogota eta Ekuadorren.
2011/02/14
Zuetariko askok oraindik ere galdegiten diguzue 2008an Donostiako Euskararen Udal Patronatuak aurkeztu zuen Sakelako Hiztegiari buruz. Batzuk deskargatzeko arazoak izan dituzue, beste batzuk modelo berrietan ba ote dabilen jakin nahi duzue... eta gu arduradunekin harremanetan jarri gara azken berriak jakiteko. Patronatuko Mikel Etxebestek EuskalKultura.com-era heldu diren galdera horietako batzuk erantzuten ditu jarraian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
