euskal diaspora eta kultura
2011/02/22
Mexikoko Guadalajarakoarekin batera, Buenos Airesko Nazioarteko Liburu Azoka da Latinamerikako garrantzitsuena. Aurten, eta Azokaren ibilbide nabaria goititzeko asmoz, Liburuaren Munduko Hiriburua izan da izendatua Argentinako hiri nagusia. Ekitaldi bereziak egingo dira testuinguru horretan, tartean bertako artista plastikoa den Marta Minujin-ek egingo duen 'Buenos Airesko liburu Babel Dorrea', hainbat hizkuntzatan argitaratutako 20 mila libururekin eraikitako dorrea. Proiektu erraldoi honetan Euskadik ere hartuko du parte; Euskadiren Argentinako Ordezkaritzak testuak bidaltzeko gonbitea luzatu die euskal erakundeei.
2011/02/22
Joan den larunbatean, otsailaren 19an, 89 urte bete dira Arrecifes herri argentinarreko euskaldun koadrila bat bildu eta 'Elkarri Laguntzeko Elkarte bat', Socorros Mutuos izeneko laguntza-elkarte horietako bat sortzea erabaki zuenetik. Urtebetetzea gogoan atxikiz, eta Buenos Aires probintzia iparraldeko herri honetako euskal historiako zati batzuk mahaigaineratuz, elkartea sortu zutenetako batzuen ondorengo den Juan Lucio Agotegarayk honako artikulua partekatu nahi izan du EuskalKultura.com-eko irakurleekin.
2011/02/22
Beijing-en bi hilabeteko egonaldi artistikoak sustatzen dituen 'Goazen Txinara 2011!' programaren bultzatzaile nagusia da Judas Arrieta artista hondarribiarra. 2005eko otsailean heldu zen bera lehen aldiz Txinako hiriburura, hamar egunetarako printzipioz, eta bertan jarraitzen du oraindik ere, hiriak liluratuta. "Segituan konturatu nintzen hemen zeozer berezia gertatzen ari dela", dio. Ziztu bizian aldatzen ari den gizarte honetan milaka urteko historiaren ondarea, iraultza kultural bat eta kapitalismo basatia nahasten dira. Arte sorkuntzarako ingurune bikaina. Arrietak bi euskal sortzaileri esperientzia hau bizitzeko gonbitea egiten dio.
2011/02/22
Joan den otsailaren 12an Salt Lake City-n egindako bilkuran, NABOk (Ipar Amerikako euskal erakundeen federazioak) elkarte berri bat onartu zuen bere kideen artera: 'Rhode Island Basque Club' euskal etxea. New Yorketik iparraldera dagoen estatua da Rhode Island eta 90. hamarkadaz geroztik bertako Newporteko frontoiaren inguruan biltzen ziren euskaldunek osatzen dute euskal etxea. 2011rako gauzatu nahi dituen ekimenak: Aberri Eguna eta beste jai batzuk ospatzea, euskara eta dantza ikastaroak antolatzea eta kultur ekitaldiak egitea.
2011/02/21
Patxi Lopez lehendakaria ostiralean Legebiltzarrean mintzatu ostean agerpen horri buruzko kronikak irakurri ditugu asteburuan Euskal Herriko komunikabideetan. Carmelo Barrio PPko legebiltzarkidearen galdera bati erantzunez, Lopezek Jon Uriarte Argentinako EAJ-PNVko 'Extraterritorial'eko lehendakariorde den Jon Uriartek plazaratutako artikulua aipatu zuen, gogor kritikatuz jeltzale argentinarrak esandakoak. Lopezen hitz horiez David Guadillak El Correo egunkarian sinatzen duen kronika ekarri dugu hona bere horretan.
2011/02/21
Nafar ordezkaritza bat, Miguel Sanz presidentea buru, partaide arituko da aste honetan New Yorken garatuko den 'Nafarroaren Astea'ren VII. edizioan. Bihartik hasita, otsailaren 22tik 27ra bitartean, energia berriztagarriak, ardoa, gastronomia eta kultura nafarra hartuko dira aipagai edota dastagai, batetik erakunde eta solaskide nafarrek gauzatuko dituzten bileretan, eta baita publiko espezialduari zein orokorrari begira egindako ekimenetan ere. Besteak beste, New Yorkeko 13 jatetxek 'nafar menuak' eskainiko dizkiete igandea bitartean Sagar Handian jaki eta ardo nafarrei ohore egin nahi dietenei.
2011/02/21
FEVAren kultur eskaintzaren baitan, bost euskal etxetara zabaldu zuen iaz 'Seme-alabek ahaztu nahi dutena, bilobek gogoratu nahi dute' izeneko mintzaldia Laura Nobilek. Lagun anitz bildu ziren leku bakoitzean interes berezia pizten duen gai honen oinarri eta xehetasunak ezagutzeko, eta proposamenaren arrakastak aurten ere gaia eskaintzera eraman bultzatu du Argentinako Euskal Federazioa. Hitzaldian genealogiaren arloan ikerketak nola egiten diren azaltzen du Nobilek eta euskal genealogian sakontzen duen arren, jarraipideek jatorri guztien iraganean miaketak egiten hasteko balio dute.
2011/02/21
Korrika 17 antolatzeko lanetan ari dira jo eta su AEK euskaltegi koordinakundeko kideak, eta giroa berotu aldera, EuskalaKlip! lehiaketa antolatu dute. Hiru minutuko bideotan Korrika 17ren leloa --"Maitatu, ikasi, ari... euskalakari"-- erabiltzen duen klip ederrenari saria emango diote. Bada, hara non eta bigarren bideoa Argentinatik heldu dela: Rio Cuarton Euskara Munduan programaren barnetegia egin zuten Hegoamerikako irakasleek kamara hartu eta hauxe bidali zuten...
2011/02/21
Bere eremuan dauden euskal etxe guztiak bertatik bertara ezagutzeko emandako hitza betetze bidean, Elvira Kortajarena Eusko Jaurlaritzaren Argentina, Brasil, Paraguai eta Uruguaiko Ordezkariak beste bi euskal etxe, Buenos Aires probintzian hiriburu federaletik gertu dauden Lomas de Zamora eta Magdalenakoak, bisitatu ditu oraingoan, bertako errealitateaz eta euren asmo eta proiektuez zuzenean euren ahotik eta euren egoitzatik jabetu nahirik, azaltzen du Euskadiko Ordezkaritzatik beretik plazaratu duten idazki batek.
2011/02/18
Azkeneko egunotan hainbat dei zabaldu dira bateko eta besteko herrialde eta lekuetan 'Euskal Herriarekiko Nazioarteko Elkartasun Astea'ren testuinguruan elkarretaratzeak antolatuz, horien artean biharko Londreskoa, Erresuma Batuko Euskal Herriaren Lagunak taldeak jai giroko bategitea deitu baitu hiriburu ingeleseko Bethnal Green-eko Oxford House kanpoaldean, bertsolariak eta musikari ingeles, irlandar eta euskaldunak partaide. Buenos Airesen deia luzatu dute gaurko, Espainiako Kontsulatuaren aurrean. Atzo, berriz, Argentinako Rosarion, dokumental bat eman zen eta solasaldia egin zen Elkartasun Astearen baitan hiriko Kultur Etxe batean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
