euskal diaspora eta kultura
2011/03/11
Bernardo Atxaga, Anjel Lertxundi, Itxaro Borda, Harkaitz Cano, Aingeru Epaltza, Kirmen Uribe, Felipe Juaristi, Luisa Etxenike, Unai Elorriaga... AT! ikuskizunean parte hartzen duten 50 sortzaileetako batzuk baino ez dira. Punta-puntako euskal idazle, aktore, dantzari eta musikarien lana taularatuko dute Bilboko Arriaga antzokian datorren asteartean, Etxepare Institutuak bere burua ezagutarazteko prestatu duen ikuskizunean. Bertan izan nahi al duzu? Adi bada! Gaur bukatuko da-eta sarrerak eskuratzeko epea.
2011/03/10
Iker Ortiz de Zarate aktoreak ikusmina piztu du etzi New Yorkeko Cervantes Institutuan egingo duen emanaldiarekin. Gasteiztarrak Oscar Wildek homosexualitate delituagatik gartzelaratu zutenenean bere maitaleari idatzitako gutunean oinarritutako bakarrizketa antzeztuko du, gazteleraz ('De profundis' izenarekin argitaratu zuten gutuna). Ortiz de Zaratek joan den irailean aurkeztu zuen lehen aldiz bakarrizketa hau Gasteizen, Ortzai Antzerki Laborategiarekin. Han ere arrakasta izan zuen lanak eta emanaldietarako sarrerak agortu egin ziren. "Testu izugarria, ederra, samina eta itxaropentsua da aldi berean", dio aktore gasteiztarrak.
2011/03/10
Egun gutxi barru bukatuko da udaldia Hego Amerikan eta munduko bazter honetako erakundeak prest daude jadanik ziklo berri bati hasiera emateko. Argentinako euskal komunitatea ez da mugimendu honetatik kanpo geratzen eta euskal etxeak bere ateak irekitzen doaz mota askotako ekintzak burutzeko asmotan. Trenquen Lauquengo 'Euskal Sustraiak'ek, Argentinako Buenos Aires probintzian, komunitateari begirako hainbat proposamen dauzka aurten: euskara klaseak, hitzaldiak, Gernikako Bonbardaketaren urteurrenaren ospakizuna, eta herriko urtemugaren ekitaldietan partaidetza, besteak beste.
2011/03/10
Euskara-Ingelesa, Ingelesa-Euskara hiztegi berri bat plazaratu du Nevadako Unibertsitateko Center for Basque Studies (CBS) erakundeak Michael 'Mikel' Morris hizkuntzalari eta irakaslearekin batera. Morris aspalditik Zarautzen bizi den coloradotarra da eta aurretik ingelesa ikasten ari diren euskaldunei zuzenduriko beste hiztegi baten egilea ere bada. Hiztegi berri hau, aldiz, euskara ikasi nahi duten ingelesdunei zuzendua da eta euskal kultura eta gramatikari buruzko oharrak eta azalpenak biltzen ditu.
2011/03/09
Otsaileko azken astean eta martxoko lehenengoan ospatzen da 'Moxalaren Jaia' Coronel Vidal herrian, Buenos Aires probintziako Mar Chiquita partiduan. Tradizio handiko festa honek eskualde osoko bizilagunak biltzen ditu urtero Argentinako bertako ohiturez eta folkloreaz goza ditzaten. Festaren testuinguruan, urtero, 'Nabarmenduak' saria ematen zaio aurreko urtean zehar kultura eta kirolaren arloetan gailendu direnei. Mar Chiquitako euskaldunak lan handia ari dira egiten jaio berria den euren euskal etxe barne eta kanpoan. Haiek sortutako mutualitatearen bidez herritar askok jaso dute iaz lan-trebakuntza eta kari horretara elkarteak 'Nabarmenduak' saria jaso zuen martxoaren 2an, 33. Moxalaren Jaian.
2011/03/09
Apirilaren 19tik 29ra izango da Kuban Erreniega korala eta bertako koruekin bi kontzertu eskainiko ditu, Santiagon eta Habanan. Horrez gain talde nafarrak habanera ikastaroa ere egingo du, kantu mota honi izena eman zion hiriko kantariekin. Zizur Zendeako taldeak hamabost urteko ibilbide luzea eta errepertorio mardula du: euskal kantuak, erlijiosoak, boleroak, tangoak, Venezuelako joropoak, habanerak, Argentina eta Txileko foklorea, jota nafarrak, gospela eta kanta zuluak ere, batzuk aipatzearren. Burutzen ari diren solasak ongi gauzatuz gero, Habanako euskal komunitatearentzat ere kantatuko dute euren egonaldian.
2011/03/09
Argentinara joandako emigranteek gurasoei idatziriko gutunek nork irakurri aurkitu zuten joan den larunbatean Liginagan, Zuberoako zenbait elkartek antolaturiko gaualdian. Musika eta poesiak jantzi zuten ikuskizuna, Mixel Etxekopar, Jean-Christian Galtxetaburu eta Cécile Tison artisten ekarpenarekin. 'Euskaldunen Argentina' erakusketarako bildutako gutunak izan ziren ikuskizunaren oinarria. Euskal Kultur Erakundeak moldatu eta gauzatutako erakusketa internetez bisita dezakete Diasporako euskaldunek.
2011/03/08
Tantaka, horrela ari dira laguntza biltzen Herri Urratseko antolatzaileak, Iparraldeko Ikastolen aldeko 2011ko jaia antolatzeko. Tamaina guztietako laguntzak dira baliotsuak, txikienak ere aldea egingo duelako euskarak Iparralden duen etorkizunean. Eguraldia etsai, iazko edizioan emaitza kaxkarra izan zuen jaialdiak, eta hori dela eta, aurtengo ediziorako eta ikastolentzako laguntza lortzeko 'Gu ere lakuko!' ekimen berria sustatu dute Euskal Herriko hainbat taldek. Diasporan ere deiak erantzuna izango duelakoan, aktibatu zaitez eta sustatu itzatzu zure euskara klasekoak edo euskal etxekoak, ahaleginak merezi baitu!
2011/03/08
ETB1 kateko Ibil2d saioak Euskal Herrian zehar osterak egiteko parada ematen dio ikusleari, eta saioa zuzenean telebistaz ikusteko aukera ez dutenek, sarean segitu ahal izango dute saio osoa, Eitb.com webgunean. Joan den larunbatean estreinatu zen saioa, Urduñatik Nerbioi ibaiaren sorbururako bidea eginez. Ibil2d-k badakar hainbat berrikuntza: alde batetik, mapak, GPS eta errealitate areagotu bidez jarraitu ahal izango baitituzte ikusleek Jon Gomez garai aurkezlearen pausoak, eta bestetik, saioak sare sozialetan sustatuko duen ikusleen partaidetza, argazkiak, komentarioak eta ibilbideen proposamenak bilduz.
2011/03/08
Munduan zehar eta herri anitzetan ospatzen ari dira Inauteriak. Euskal Herrian jai honen espiritua urtero biziberritzen da eta mozorro, kolore eta musika tresna tradizionalek kaleak hartzen dituzte, bazter guztiak alaituz. Argentinan, Hego Amerikako ohituren kutsua du jai honek eta murgek eta Afrikatik etorritako esklaboen soinuek edertzen dituzte konpartsa eta karrozak. Hala ere, eta euskal etxeei esker, Argentinako zenbait herritaraino heltzen da Euskal Herriko Inauterietako oihartzuna. Cordoba hirian, Txotx! Dantza Taldeak eta Baietz Taldeko musikariek Lantz-eko inauteria erakutsi zieten euren herritarrei.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
