euskal diaspora eta kultura
2011/04/08
Iaz Erromako bostgarren mailako ikasle talde batek (9-10 urte bitartekoak) hainbat poesia idatzi eta euskaratu ostean grabatu egin zituen Euskanta egitasmoaren barruan. Associazione Culturale Euskara Euskal Etxeak eta UPTER Unibertsitate Popularrak sustatu zuten ekintza honek 'Eromako zubia' izeneko CDa eman zuen fruitu. Orain sarean jarri dituzte abestiak, jaisteko moduan, nahi duenak entzun eta goza ditzan. Euskara eta haur italiarren sormena eta irudimena uztartu zituen esperientzia jolasgarri eta berezi hura zuzenean ezagutzeko aukera ezinhobea.
2011/04/07
Ken Zazpi euskal musika talde ezaguna Irlanda eta Ingalaterran izango da apirilaren 17tik 26ra bitartean, kontzertu bira bat eginez. Lehen emanaldia Dublinen egingo dute bizkaitarrek, apirilaren 19an. Ondoren Derry-n, Belfast-en, Liverpool-en eta Londresen izango dira. Londresko kontzertua London Basque Society Euskal Elkartearen Aberri Eguneko jaiaren barruan egingo dute. Ken Zazpik bere azken lana, 'Ortzemugak begietan' (2010), aurkeztuko du besteak beste.
2011/04/07
XIX. mende bukaeran Gral. Las Heras-era heldu zen lehenengo Echegaray artzain ibili zen hainbat urtetan eta esne ekoizpenean gero. Baina euskaldunek betidanik izan duten burdinarekin lan egiteko zaletasun hori ere bazuen Nafarroako Azkarate herrian jaioa zen mutil harek eta herritarren oinarrizko beharrak betetzeko errementeria txiki bat muntatu zuen bere esnetegiaren ondoan. Denbora aurrera joan zen eta burdingintzan aritzeko joera belaunaldiz belaunaldi pasatu da Echegaray familian. Gaur egun 'Eraikuntza Sutegi' (sic) metalgintza enpresak 26 herrialdetara esportatzen ditu hazi-tratamendurako makinak eta ikurrina aukeratu du identifikagarri.
2011/04/07
Argentinako euskal elkarteak biltzen dituen FEVA federazioak aditzera eman berria du 2011 ikasturtean euskal etxe argentinarrek euren kultur programak osatzeko federazioari eskatu ahal izango dizkioten hitzaldi eta hizlarien izen zerrenda. Dauden baliabideak ahalik eta ongien baliatzearren, gai eta interes antzekoak dituzten euskal etxeak eskualdeka biltzea eta eskabideak elkarrekin egitea galdegiten da. Edonola ere, euskal etxeak dira gaiak eta hitzaldiak erabakitzen dituztenak, FEVAk garraio gastuak bere gain harturik eta euskal etxeek hizlariaren ostatua eta hitzaldiak eragin ditzakeen tokiko gainerako gastuak. Aurtengo eskaintza 37 gai dira, 17 hizlarik emanak.
2011/04/07
Astelehenean eta asteartean egon da ikusgai Argentinako Pellegrini hirian Magdalena Mignaburu adituak bildu duen euskal jantzi tradizionalei buruzko erakusketa. 'Gure arropa - Nuestra ropa' du izena eta bertan XVIII. mendetik XX. mendera bitarteko hogei euskal jantzi tradizional biltzen dira. Asteartean Pellegriniko eskoletako neska-mutilak izan ziren bisitari, eta adi-adi entzun zituzten Mignabururen azalpenak. Askok euskal abizena dutela jakin zuten bertan, eta batek baino gehiagok, etxera heldu eta gurasoak bidali zituen erakusketa ikustera. Datozen egunetan 'Gure arropa' Pehuajó-n izango da ikusgai, Etxe Alai elkarteak antolatu duen Aberri Eguneko ospakizunen barruan.
2011/04/06
Korrika, AEK euskaltegien koordinadorak antolatzen duen euskararen aldeko lasterketa erraldoia, bihar abiatuko da Trebiñutik. Lasterketak gure hizkuntzaren aldeko kontzientzia suspertzea eta gau-eskola zein euskaltegien eguneroko lana indartzeko dirua biltzea ditu helburu. Hamaika egunetan Euskal Herri osoan zehar ibiliko da, gauez eta egunez, gelditu gabe, eta apirilaren 17an bukatuko da Donostian. Baina, Euskal Herrian bakarrik ez, Diasporan ere ibiliko da Korrika 17, euskal etxeei esker. Sydney-n adibidez, lehen aldiz antolatu dute lasterketa aurten. Beste hitzorduak dira Txileko Santiago, San Frantzisko, New York, Madril, Bartzelona, Mexiko, Londres, Boise... Badago non aukeratu!
2011/04/06
Indarrez beteta ekin diote 2011 honi Buenos Aires probintziako Chascomuseko 'Zingirako Euskaldunak' Euskal Etxeko kideek. Urtarrilean neska eta mutil mordo bat bildu zen Argentinako bigarren Udalekua eta San Juango Eguzkiaren Jaian izandako partaidetza jarrera horren oso adibide onak dira. Hilabeteak aurrera doaz eta mugimendua ez da gutxitzen euskal etxean. Bigarren sorreraren 20. urteurrenaren urtean, hitzaldi, erakusketa, ikuskizun eta jaiekin sendotuko dute euskal presentzia Chascomus hirian 'Zingirako Euskaldunak'-eko lagunek.
2011/04/06
'Bidegileak' bildumako hiru karpeta berri, bakoitza launa biografiarekin, aurkeztu ziren atzo Donostian, euskara eta euskal kultraren alde nabarmendutako hamabi gizon-emakumeen biografiak eta emaitzak eskuragarri ipiniz. Bildumako 59, 60 eta 61. karpetak dira eta biografiatutako pertsonen artean Mikel Laboa, Emile Larre, Maria Pilar Lasarte, Antonio Zavala edo Mikel Atxaga bera daude, eta baita ere Diasporarekin harreman zuzena izan zuten beste batzuk, hala nola besteak beste New Yorken bizi izan zen Jose Matia San Sebastian 'Latxaga' apaiza eta Pedro Mari Otaño bertsolaria bera. Ekitaldiko partaide izan ziren Blanca Urgell Kultura sailburua, Lurdes Auzmendi Hizkuntza Politikoarako sailburuordea eta Begoña Muruaga Euskara Sustatzeko zuzendaria, euskalgintza hainbat gonbidatu eta biografiatutako lagun eta familiakoekin batera.
2011/04/05
Etxepare Institutuak Europako eta Ameriketako hamar unibertsitateen Euskara eta Euskal Kultura irakurle postua betetzeko deialdia egin du gaur. Bartzelona, Finlandia, Txekia, Errusia, Mexiko, Erresuma Batua eta Estatu Batuetako unibertsitateetan ariko dira irakurleak; 2011-2012, 2012-2013 eta 2013-2014 ikasturteetan. Eskabideak aurkezteko hamabost egun naturaleko epea dago. Eskabide horiek non eta nola aurkeztu azaltzen dizugu jarraian.
2011/04/05
“Erkidegoko kideen arteko harremanak estutu eta sendotzeko asmoarekin” sortu zuen duela 116 urte Buenos Aireseko 'Centro Vasco Frances-Iparraldeko Euskal Etxea' Ipar Euskal Herritik Argentinara etorritako euskaltzale talde batek. Urteak pasa dira baina izpiritu hori ez da desagertu. Izan ere, erakundeko Kultura Azpibatzordeko kideek mota askotako ekintzak garatzen dituzte urtean zehar Euskal Herriko ohiturak eta Buenos Aires hiriburuko euskaldunen artean dauden loturei eutsi ahal izateko; hori dela eta, eta Jean Pierre Passicot etxeko Zuzendaritza Batzordeko lehenengo lehendakariarekin hitzekin bat eginez, “euskalduna naiz, euskaldun bizi naiz, euskaldun hilko naiz eta berpiztuko banintz euskalduna izango nintzateke”, esaldiari eusten diete irmo Iparraldeko euskaldunen ondorengoek.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
