euskal diaspora eta kultura
2011/09/21
Egun desagertua den Esan Ozenkik Negu Gorriak talde famatuaren lanak plazaratu zituen, besteak beste. Orain, bere sorreraren 20 urteurrena dela eta, sarearen bidez zabalduko da diskoetxearen katalogoa eta musikazaleek streaming bidez doan entzun ahal izango dute. Diasporako euskaldunen artean zale asko ditu Negu Gorriak taldeak, batez ere Argentinan eta Mexikon. Eta azken herrialde honetan, hain zuzen, izango da hil honen hondarrean Fermin Muguruza musikaria, Mexiko Hiriko Dokumental jaialdian 'Next Music Station' saila aurkezten. Eta aste honetan Donostiako Zinemaldian.
2011/09/21
Etorkizuna umeak direla dioen esaera, ezagun bezain errepikatua da. Hala ere, etorkizun horren alde lan egiteko garaia hau, orain da, eta Euskal Odola euskal etxearen arduradunek ondo dakite hori. Horri helduz, neska-mutiko gaztetxoei begirako hamaika ekintza burutzen dituzte Ayacuchoko euskaldunek, komunitateko txikienengana iristeko. Eta helduak sendo engaiatuak daude gazteak engaiatzeko helburu horretan. Baina lana eta engaiamendua ez dira elkarren kontrakoak. Joan den irailaren 10ean burututako afarian giro bikaina gailendu zen euskal etxeko kide eta lagunen artean.
2011/09/21
Buenos Aires probintzia argentinarreko hiriburu den La Platako Euzko Etxea euskal etxeak 'Dantzari Ohiaren Festa' egingo du datorren larunbatean, irailaren 24ean, eta bertara elkartea sortu zenetik gaurdaino Euzko Etxeak izan dituen dantza taldeetan dantzari aritu izan diren guztiak gonbitatu ditu bereziki, baina ez eurak soilik, ekimen horretan ibilitako musikari, zuzendari, irakasle, guraso, lagunak eta bazkideak oro ere deitu baititu edozein euskal etxetan bihotza, arima, ardatza, geroa, bizitasuna, kolorea eta itxaropenaren sinonimo den dantza taldearen kide ohien festa honetara.
2011/09/21
Abuztuaren bukaeran 'Buenos Aires celebra' azoka handian parte hartu ondoren, Chivilcoyko Euskal Etxea ohiko jardueratara bueltatu eta euskal dantza eta elkartasuna uztartuz ekin zion irailari. Hil hasieran Beti Aurrerako dantzari txiki eta ertainek bisita egin zuten Karitasek San Cayetanon duen jangelara, eta dantza erakustaldia eskaini zuten han bazkaltzen ari ziren neska-mutilentzat. Horrez gaiz, irailaren 9an elkarteak Arantzazuko Ama Birjinaren eguna ospatu zuen, euskal etxearen egoitzan egin zen meza elizkizunarekin. Izan ere, Andra Maria honen irudia dauka ipinita bertan Beti Aurrerak euskal elkartearen babesle eta kuttun gisa.
2011/09/20
Valparaisoko Eusko Etxeak bihar bertan inauguratuko du ofizialki bere egoitza berria. Lehen aldiz, elkartea bera izango da eraikinaren jabe eta honek aurrerapausu handi ekarriko du, bertan era egokian burutu ahal izango baitira euskal etxearen jarduerak. Lehen, elkarteak bulego batetik zuzentzen zituen jarduera hauek, baina 2010eko lurrikarak suntsitu egin zuen ofizina hura. Orain, egoitza berriarekin aktibitatea berrekin eta jarduera gehiago egin ahal izango dituzte. Inaugurazio ekitaldian izango dira, besteak beste, Guillermo Echenique, Kanpo Harremanetarako Idazkari Nagusia, eta Ana Urchuegia, Txilen eta Perun Euskadiko ordezkaria.
2011/09/20
Ingelesarekin batera, lanlekua Londres baita. Londrestik, bertako Euskal Elkarteak adierazi du lanpostu baten deia zabaltzeko eskea luzatu diola hiriburu ingeleseko konpainia garrantzitsu batek. Negozio arloan da, eskarmentua eskatzen dute, bidaiatzeko prest egotea, gaztelania menperatzea eta euskara ongi jakitea eta euskal kulturaz jakitea. Hona deialdiaren ezaugarriak.
2011/09/20
'Ellis Island-eko euskal erakusketa' bezala ezagutzen dute gehienek, New York ondoko irla horretan inauguratu baitzen 2010eko otsailean AEBetako euskaldunen berri ematen duen erakusketa hau.
Boiseko Euskal Museoak Eusko Jaurlaritza lankide ekoitzia, 'Hidden in Plain Sight: the Basques' (Begibistan ezkutatuta. Euskaldunak) erakusketak Estatu Batuetako Estatu- eta Leku-Historiaren Elkarteak (AASLH ingelesezko sigletan) urtero banatzen dituen sarietako bat bereganatu du aurten. Michael Vogt, erakusketako arduradunak jaso zuen saria joan den ostiralean Virginiako Richmond herrian eginiko ekitaldian.
2011/09/20
Ternuara arrantzan joan ziren euskaldunen ondorengoak dira Saint Pierre eta Miquelon irletako biztanle asko. Aspaldi galdu zen bertan euskara eta laugarren belaunaldiko euskaldunak dira gehienak, baina, nahiz eta Euskal Herritik oso urrun egon, tinko eusten diete sustraiei. Euskal nortasuna, janaria eta, batez ere, kirolak, dira Saint Pierre eta Miquelongo euskaldunen ezaugarriak eta harro erakutsi zituzten iragan irailaren 11an ospatu zuten Fete Basque jaialdian.
2011/09/20
Duela urtebete aurkeztu zuen Marita Echavek 'Euskal baserrietako sukaldaritza' liburua Coronel Moldeseko Gure Zainak euskal etxean. Epe honetan, inguruko beste herri batzuetan eta baita Buenos Aireseko Liburu Azokan ere izan du Echavek euskal sukaldaritzako errezeta tradizionalenei buruz hitz egiteko aukera. Orain, berriz, eta FEVAren kultur eskaintzaren baitan, euskal etxez etxe doa sukaldari cordobatarra euskal janariak prestatzen. Abuztuan La Plata, Chascomus, Castelli eta Chacabuco bisitatu zituen herri bakoitzeko publikoarekin sukaldeko sekretuak konpartitzeko asmoarekin.
2011/09/19
Leihoa ireki zuen joan den ostiralean Bernardo Atxaga idazleak (Asteasu, 1957) New Yorkeko CUNY unibertsitatean. Bi aldetara argiari bidea egin behar dion leihoa: euskal kultura Manhattanera ekarriz, baina baita ere Manhattaneko kultur aniztasuna eta energia Euskal Herrira helaraziz. Etxepare Institutuak sustatu duen 'Bernardo Atxaga Chair in Basque Literature and Linguistics' katedrari esker euskal idazleek Sagar Handian mintegiak eman ahal izango dituzte .
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
