euskal diaspora eta kultura
2011/09/28
2009an egin zen lehendabizikoz gaur egun urteroko hitzordu bihurtu den Jauzi Eguna. Dantza biribilak erakutsi, ezagutarazi eta dantzatzea du helburu nagusia Buenos Airesko Ekin Dantzari Taldeak antolatzen duen elkarretaratzeak eta ekintza horiek guztiak Mexiko kaleko 1880 zenbakiko egoitzan burutuko ditu Aitor Alavak gidatzen duen taldeak. Jauzi Eguna jaiaren III. edizioa urriaren datorren larunbatean, urriaren 1ean egingo da, iluntzeko 8:30etan eta dantzez gain afaria, erromeria eta zozketak baitaratuko ditu.
2011/09/28
Oso pozik ageri dira Quebeceko Euskaldunak-eko kideak euskal etxearen 15. urteurrenaren ospakizunekin. Iragan irailaren 16tik 18ra ospatu zuten elkartearen urtebetetzea eta, aldi berean, NABO erakundearen bilkura ere antolatu zuten. "Sekulako desafioa izan da guretzat", azaldu dio EuskalKultura.com-i Euskaldunak-eko presidenteak, Adelaide Daraspe urruñarrak. "Gure euskal etxe ttikia ez zen halako proiektu handietan ohituratua. Baina motibazio handia eta ikasteko nahiarekin lortu dugula erran nezake. Iduritzen zait halako ideia berriei esker atxikiko dugula gure euskal etxea bizi bizirik", adierazi du.
2011/09/27
Argentina eta Kolonbiako Diasporatik bidalitako bi lan izan dira aurtengoan elkarrekin eta 'ex-aequo' Andres Irujo Saria bereganatu duten idazlanak. Idazleak, Fabio Javier Echarri, Chacokoa, eta John Alejandro Ricaurte, Antioquiakoa, eta euren lanen tituluak, 'Eusebio Zamacola Abrisketa: Basauritar bat Argentinako Chacon' eta 'Euskaldunak Antioquian 1890-1970. Hurrerapena migratzaile, erlijioso eta exiliatuen istorioetara', hurrenez hurren. Ebazpena bihar argitaratuko du Euskal Autonmi Erkidegoko Aldizkari Ofizialak.
2011/09/27
Urtearen amaierara goaz eta munduko alde honetan udarantz hurbiltzen hasiak gara jadanik. Irailaren 21ean udaberriaren hasierarekin batera 'Ikaslearen Eguna' ospatzen da Argentinan, eta eskoletako neska-mutilek mota askotako ekintzak gauzatzen dituzte, piknikak, ateraldiak eta jaiak, besteak beste. Testuinguru horretan, oso erantzun ona izan dute Macachingo Gure Ametza-ko gazteek ikasleei luzatutako proposamenarekin. Euzko Alkartasuna euskal etxeko dantzariek Eskolen Arteko Olinpiadak antolatu dituzte irailaren 12tik 20ra, herriko lagunak bildu eta euskal erakundea ezagutarazteko asmoarekin. Gonbidapenak arrakasta handia izan du eta berrehundik gora parte hartzaile hurbildu ziren euskal etxearen egoitzara lehiaketetan aritzeko.
2011/09/27
Iragan irailaren 18an berrogeita hamar bat euskal-txiletar bildu ziren Urdazubin, Nafarroan, Txileren Jai Nazionala kari euren urteroko topaketa egiteko. Ekitaldia komunitate honetako hitzordu klasikoa bihurtze bidean dago dagoeneko eta laugarren edizioa izan du aurtengoa. Bertaratu zirenak Iparraldeko lagunak izan ziren gehienbat, baina topaketa Euskal Herrian bizi diren txiletar eta euskal-txiletar guztiei irekia da. Antolatzaileek bilkurako zenbait argazki helarazi dizkigute.
2011/09/27
Egoitza Bogotan duen Euskadiren Kolonbia, Venezuela eta Ertamerikarako Ordezkaritzatik adierazi duetenez, Iñaki Martinez Ordezkariak Ekuadorko Cuenca hiria bisitatu du, bertako alkate Paul Granda-rekin solastuz. Egun batzuk geroago Martinez bera hirira itzuli da, oraingoan Euskal Trenbide Sarea eta Idom euskal enpresetako buruzagiekin. Astelehen honetan jakinarazi da eurak irabazi dutela Cuencako tranbia eraikitzeko proiektuaren esleipena. 400.000 biztanletik goiti dituen Cuencako alkateak aste honetan bisitatuko du Euskadi.
2011/09/27
Eitb.com-ek Canal Vasco eta ETB-Sat kateen erabiltzaileei zuzenduriko lehiaketa jarri du abian aurten ere, eta bertan parte hartzen dutenek Euskal Herrira hamar eguneko bidaia irabazteko aukera izango dute. Horrez gain, irabazleak eta bidaideak 1.000 euro jasoko dituzte bidaian xahutzeko. Aurreko edizioetan bezala, irabazleak berak erabakiko du bidaia noiz egin, lehiaketa egin eta urtebeteren epearen barruan. Lehiaketan parte hartzeko nahikoa da jarraian aipatzen dugun inkesta laburra betetzea.
2011/09/26
Madrilgo Euskal Etxeak Euskal Jaien bigarren edizioa egingo du larunbat honetan Retiro Parkean, Espainiako hiriburuan euskal kultura eta elkartearen lana ezagutarazteko. Iaz egin zuten lehen edizioa, eta esperientzia hain izan zen ona, aurtengorako irrikaz direla elkarteko kideak. Ospakizunak izango dituen jardueren artean, honakoak: estropadak (Donostiako eta Santurtziko bi talde Madrilgo beste biren aurka), Bakioko Itxas-alde dantza taldea eta Txirri, Mirri eta Txiribiton pailazoak.
2011/09/26
Bertako Euskal Etxeko kideak pozik agertu dira iragan irailaren 16tik 18ra Bordelen egin ziren Ondarearen Egunetan izan zuten partehartzearekin. Elkarteak bere lana eta zenbait euskal kultur proposamen Bordeleko kaleetara atera zituen eta jende ugari inguratu zitzaion. Besteak beste kultur-tailerrak, kalejirak, dantza erakustaldiak, hitzaldiak eta erakusketa bat eskaini zituen. Iruñetik Hutsun taldeko txalapartariek egin zuten emanaldiak adibidez, biziki piztu zuen bordelesen interesa eta asko hurbildu ziren 'musika-tresna ezezagun' hura jotzera. Tartean, bertatik zebilen euskaldun talde bat ere. "Agian Eskual Etxeko kide eginen dira!", esan digu pozik David Mugica elkarteko presidenteak.
2011/09/26
Misiones probintzia izan da irailaren 20an Mercosur-erako Euskadiko Ordezkaria den Elvira Kortajarenak hasitako bidaiaren helmuga. Hiru egunetako egonaldian, Kortajarena Corpus Christi eta Posadaseko euskal etxeetako kideekin elkartu zen eta bilerak egin zituen politika arloko ordezkariekin. Horretaz gain, Eusko Jaurlaritzako agintariak Mesopotamia argentinarreko probintzia honetako Jesuiten Aztarnak bisitatu eta mbyá guaraní 'Tavá Mirí' komunitateko lagunekin bildu zen, euren errealitatea eta euskaldunek haien alde egiten duten lana aurrez aurre ezagutzeko. Birarekin bukatzeko Eusko Jaurlaritzak bultatzen duen Agenda XXI proiektua garatzen duten eskoletako arduradunekin elkartu zen.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
