euskal diaspora eta kultura
2011/12/07
Urtero bezala, 2011 honetan ere Diasporako euskara ikasle, irakasle eta lagunek ekitaldi bereziak antolatu dituzte Euskararen Nazioarteko Eguna ospatzeko. Proposamenak ugariak izan dira, helburua bat bera: euskal hizkuntzarekiko engaiamendua adierazi eta aldarrikatzea. Abenduaren 3an, San Frantzisko Xabier eta Euskararen Nazioarteko Egunean, hainbat hitzaldi, jolas, bideo eta kantarekin protagonista izan zen euskara. Hona Argentinako zenbait lekutatik iritsi zaizkigun berriak, euskal etxe hauetan: Chascomuseko Zingirako Euskaldunak, Lapridako Lagunen Etxea, Cordobako Gerora, Arrecifeseko Euskaldunak Denak Bat, Rio Cuartoko Gure Ametza, eta Buenos Aireseko Euskaltzaleak euskaltegia.
2011/12/06
Euskal etxe askoren eskaintzari erantzunez, abenduaren 13ra arte – hau da, datorren asteko asteartera arte – luzatu du Zingirako Euskaldunak euskal etxeak 2012ko Udalekuan parte hartzeko izena emateko epea. 11 eta 16 urte arteko gazteei begirako ekintza hau datorren urtarrilaren 4tik 8ra gauzatuko da Chascomus-en eta aurreko hiru edizioetan bezala, gaztetxoek ongi pasa eta euskal adierazpen kulturalak ezagut eta disfruta ditzaten du helburu nagusia. Interesatuek mailez edo telefonoz eman dezakete izena, artikulu honetan gogoratzen ditugun helbide eta zenbakietan.
2011/12/06
Eskualdunen Biltzarra Euskal Etxeak Anaigazteak dantza konpainia lapurtarraren Bodarin ikuskizuna ekarri zuen Bordelera iragan azaroaren 26ean, eta lagun asko bildu ziren bertara dantza eta flamenko fusio berezi hau ikusteko. Euskal Etxeko arduradunek adierazi dutenez 250 bat ikusle inguratu ziren eta, bukaeran emandako txaloen arabera, "oso gustukoa" izan zuten. ElkarteaK, bestalde, Euskararen Eguna ospatu zuen iragan asteburuan, Battittu Coyos eta Aurelia Arkotxa euskaltzainek eman zituzten hitzaldiekin eta kalean egin zen irakurketa publiko batekin.
2011/12/05
Euskararen Nazioarteko Egunaren ospakizunak borobilak izan dira aurtean Madrilgo Euskal Etxea. Iragan ostegunean, abenduak 1ean, egin zuten festa Madrilgo euskaldunek, eta egun horretan bertan jakin zuten eurek irabazi dutela Eusko Ikaskuntzak ematen duen aurtengo ENE saria, euskararen alde egindako lana dela eta. Sariaren berriaz gain, Lurdes Auzmendi, Hizkuntz Politikarako sailburuordearen presentziak ere aparteko oihartzuna eman zion egunari. Auzmendik euskara eskolak emateko hitzarmena berritu zuen euskal etxeko presidente Julio Elejalderekin: datorren ikasturtean 2.456 eskola ordu diruz lagunduko ditu HABEk. Aurten 150 ikasle ari dira euskara ikasten Madrilgo Euskal Etxean.
2011/12/05
Diasporako herrialdeetan euskal kulturari buruz hitz egiten dugunean, dantzak, sukaldaritza, euskara eta kirolak datozkigu gehienbat burura. Eta musika. Egun gainera, teknologia berrien garaian, oso erraza egiten zaigu urrun dauden musikari eta taldeen lanak ezagutu eta lortzea. Zer gertatzen da, ordea, euskal tresna tradizionalak jotzen ikasi nahi dugunean? Mauro Telletxea argentinarrak bide zoragarri bati ekin zion 2004an, haurtzaroan entzuten zuen albokaren soinua berreskuratu nahirik. Euskal Herriko izen handiko musikari eta luthierrekin ikasi ondoren, alboka jole eta egile bihurtu eta hala segitzen du Buenos Airesen gazte euskal-argentinarrak.
2011/12/02
Abendua hasi berria da eta datozen jai egunei begira zenbait izan dira gure irakurleen artean lagunak eta senitartekoak zoriontzeko euskal postal birtualei buruz galdezka hasi zaizkigunak. Urtero egiten dugun artikulua da hau, eta urtetik urtera postal eta ideia berriak aurkitzen ditugu. Nahikoa dira minutu batzuk maite ditugunei besarkada birtual bat bidaltzeko, gogoan ditugula jakinarazteko. Datozen egunetan etxeko txikientzako Olentzerori buruz sarean topa daitezkeen webgune eta baliabide zerrenda ere bilduko dugu.
2011/12/02
Abenduan sartuta gaude jadanik eta Gabonekin lotuta dauden hainbat ohitura biziberritzen hasiak gara, urtero bezala. Testuinguru horretan, Bahia Blancako Union Vasca euskal etxe argeninarreko euskara ikasleek Olentzerori buruzko ekintzak burutu dituzte ikasturteko azken eskoletan. Baina euren lana ez da ikasgeletara mugatu; ekintzak osatzeko Bahia Blancako ikasleek “Olentzero eta enbor magikoa” filma ikusi eta Olentzeroren bisita jaso zuten. Horren eta beste aktibitate batzuen berri heldu zaigu Union Vasca euskal etxetik.
2011/12/02
Gabonetan elkarri zorionak eman edo urteberri on bat opatuz bidaltzen diren mezuak euskaraz sortu eta zabaltzeko helburuarekin, Azkue Fundazioa eta Bizkaia Irratiak "Txioka Sarean" lehiaketa antolatu dute. Abenduaren 1a eta 18a bitartean Twitter eta Facebook bidez bidaltzen diren mezuak sarituko ditu lehiaketak. Hiru mezu onenek saria izango dute: gabonetako otzara bat, bi lagunentzat Areatzako SPAn egotaldia eta Lekeitioko 'Eguren Electrodomesticos'-ek eman duen Samsung Galaxy tableta. Azkue Fundazioarekin hitz egin dugu eta saria Diasporako euskaldunen batek irabazten badu, dagoen herrialdera bidaliko diotela esan digute.
2011/12/01
Euskal literatura bere tartea izaten ari da aurtengo Guadalajarako Liburu Azokan, eta bertan egin diren ekitaldien artean, interesgarria izan zen "Presentan los lectores" atalean Anjel Lertxundiren 'Los trapos sucios' ('Etxeko hautsa') eleberriari buruz entzun zirenak. Lertxundirekin batera hiru mexikar irakurlek aurkeztu zuten liburua eta haien esanetan "guztiok eragiten gaituzten sentimenduak” islatzen ditu lanak, "jatorria eta hizkuntza kontuan hartu gabe". Eleberriak “harrapatu” egiten du irakurlea, eta amaiera “harrigarria” du. Horrexegatik, publikoa lan honetan eta euskal literaturan sakontzera animatu nahi izan zuten.
2011/12/01
Larunbat honetan, abenduaren 3an, mundu osoko euskaltzaleek Euskararen Nazioarteko Eguna ospatuko dute. Euskal etxeen artean jarraitzaile asko ditu festa honek, eta Argentina, AEB, Mexiko, Txile, Uruguai, Italia edo Australia bezalako lekuetan makina bat ekitaldi antolatu dira. Herrialde hauetan guztietan asko dira euskal etxeetan euskara ikasten dihardutenak, arbasoen hizkuntzari eusteko apustu pertsonal sendoa eginez, Euskal Herritik milaka kilometrotara bizi arren. Euskara ikasle eta irakasle hauek, euskal etxeetako milaka kideekin batera, protagonista izango dira egunotan egingo diren jai eta ekitaldietan.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
