euskal diaspora eta kultura
2011/12/28
Zazpi urte pasatu dira Bruselak bere azkeneko euskal etxea ofizialki galdu zuenetik, Jaurlaritzako euskal etxeen erregistrotik erorita. Iazko udan, Julian Celayak, euskal etxe bat sortzeko eman beharreko pausoak azaldu zizkion Bruselako euskaldun talde bati, hirira egindako bisitan, eta azaroan oraingo ofizialtzean amaitu diren aurreneko urratsak eman zituen Bruselako Euskal Etxeak (BEE). Zorionak eta ongi etorri Bruselako lagunei!
2011/12/28
Olentzero ez da esku hutsik azaldu Pauera; pozik dira Lagunt eta Maita Euskal Etxean bukatzen ari den urteak eman duenarekin, batez ere aspaldiko ametsa bete eta egoitza propioa eskuratu dutelako aurten. Iragan azaroaren 26ean inauguratu zuten egoitza berria eta ekitaldian bizitako pozak luze iraungo du. Horrez gain, elkarteak indartsu abiarazi ditu euskara eskolak, lau irakasle berriei esker eta, abenduaren 17an, Olentzeroren bisita jaso zuen Lagunt eta Maitak lehen aldiz. Elkarteko neska-mutikoek pozez zoratzen hartu zuten Gabonak iragartzen dituen euskal ikazkin mitologikoa.
2011/12/28
Urtea eta ikasurtea amaitzeko eta udako oporrak hasteko sasoina da Hego Hemisferioan. Urtarrilean, udako oporrak hastearekin batera, aktibitateak zinez gutxituko dira Argentina, Txile eta Uruguai bezalako herrialdeetako euskal etxeetan. Hala ere, eta atsedena hartu eta indarrak berritzeko epea hasi baino lehen, bukatzen ari den urteari “agur” esateko mota askotako topaketak egin dituzte. Aurten joandako lagunak oroituz, lagun arteko afariak antolatuz, Olentzeroren bisita jasoz, jaiotza bizidunak eginez eta euskal herri kirola praktikatuz ospatu dute, esaterako, Puerto Madryn, La Plata, Buenos Aires, Tandil eta General Las Heras-en. Hona kronika.
2011/12/27
London Basque Society Euskal Elkartea sasoi ederrarekin ari da urtea bukatzen eta ekitaldi ugari antolatu ditu azken asteotan. Azkena abenduaren 17an izan da, elkartearen Eguberri Jaiarekin. Londongo euskaldunak bazkaltzeko bildu ziren eta bertara agertu zen Olentzero bera ere, Mari Domingi emaztea lagun zuela, elkarteko txikien artean opariak banatzeko prest. Horrez gain Algortatik etorritako trikilari taldeak giro ederra jarri zuen hiriburuko kaleetan. Hileko beste ekimen batzuk Mikel Urdangarin kantariak eman zuen kontzertua eta abenduaren 3an ospatu zen Euskararen Nazioarteko Eguneko mintzapraktika eta jaia izan ziren. Elkarteak bideoak jarri ditu sarean.
2011/12/27
Txileko Santiagoko Euzko Etxearen Berriketari buletinak elkarte honetan egin diren azken ekimenen berri dakar azaroko alean. Horien artean aipagarriak dira, bildu zuten jende kopuruagatik, bi ekitaldi bereziki: elkarteko frontoian jokatu zen Esku Pilota Txapelketa, eta Musika Berbaldia delako jaiaren bigarren edizioa. Jai honetan dantza eta gonbidatu berezi bati egiten zaion elkarrizketa batzen dira. Dantza alorrean erakustaldia burutu zuen elkarteko Itxaropen Gaztea taldeak, eta eurekin batera aritu zen Telar de Rancagua taldea, Txileko eta Rapa Nui irlako dantza ikuskizunarekin.
2011/12/27
Sylvia Arosteguy eta Juan Licio, lehendakari eta lehendakariorde legez, hurrenez hurren, dira 'San Joseko Euskaldunak Taldea' (sic) euskal etxeko Zuzendaritza Batzordeko buru berriak Uruguaiko San Jose departamentuko izen bereko hiriburuan. Elkarteak 2009ko abuztuan eman zituen lehenengo pausoak eta 2010ko abenduan jaso zuen Eusko Jaurlaritzaren aldetik ofizialtasuna. Amaitzen ari den urte honetan euskara eskolak eskaini ditu urte osoan zehar horretarako Montevideotik astean behin propio etorri den Andrea Bella irakaslearen eskutik. 2012ari begira, euskal dantzak ematen hasi nahi du, Andrea Bella bera irakasle, eskaintza euskal jatorrikoei baina oro har San Joseko herritar guztiei ere zabaltzen dielarik.
2011/12/26
North Queensland-eko Euskal Etxeak Eguberri Jai jendetsu batekin itxi zuen 2011. urtea. Ia 130 lagun bildu ziren ekitaldira, tartean Olentzero ere, elkarteko gaztetxoei opariak banatzeko prest. Baina jaiak azken orduko gonbidatu bat ere bildu zuen: euri zaparrada ederra. Australiako bazter honetan ohikoak dira erauntsiak urte sasoi honetan, eta horrek ez zuen jaia zapuztu; are gehiago, elkarteko txikiek ederki pasa zuten putzuetan plisti-plasta! Madrilen, bestalde, Euskal Etxeko txikiek ere Olentzeroren bisita jaso zuten, hona ekarri dugun bideoan ikus daitekeen bezala.
2011/12/26
Venezuelako hiriburuko Eusko Etxearen 'Jazoera' buletinak aldarte baikorrarekin eta berriez jantzitako abenduko ale batekin esan dio agur. Buletinak berak islatzen duenez, ekimena sustraitu egin da euskal komunitatearen baitan eta datorren urterako ere gogotsu ageri dira Jazoerako kolaboratzaile eta lagunak. Azken ale honetan Venezuelako euskal komunitatean azaroan eta abenduan egin diren ekimenen berri dakar hilabetekariak, aipatuz, esaterako, Eusko Etxean jokatu ziren Venezuelako Pilota Joko Nazionalak, Bizkaiko Abokatuen Elkargoko Koruaren bisita eta Gabonetako afariak Caracasen eta Valencian. Ate joka daukagun urte berrian urtean, gehiago!
2011/12/26
Bertako euskal bizitzan garrantzizkoak izan diren bi ekintza gauzatu dira abenduan Buenos Aires probintziako Pehuajoko Etxe Alai euskal etxean. Batetik, erakundeko batzordekide den Hilda Gorri Arresek euskal kulturari buruzko 'Saski Naski' liburua aurkeztu du elkartearen egoitzan. Bestetik, eta aipatu liburuaren aurkezpenaren ondoren, Dora Mercedes Scarcella Mignaburu lizentziatuak Euskal Herrian, 2011ko Gaztemundu Bekan bizi izandakoak konpartitu zituen Etxe Alaira bildutako lagunekin. Hitzaldiak bukatuta, pintxoak eta edariak partekatu zituzten.
2011/12/23
Heldu da aurtengoan ere Eguberria. Larunbat honetan Gabon gaua eta igandean Eguberria izango dugu eta urtero bezala sasoin honetan, asko izan dira azken egunotan jaso ditugun mezu eta agiantzak. Datozen lerroetan emango dugu horien berri, aldi berean aukera baliatzen dugula geure irakurle eta lagunei, eta Euskal Herriko eta munduko euskaldunen familia osoari zorionak eta agiantza onenak bidaltzeko. Mila esker hor egoteagatik eta etengabeko harreman hau zeuen presentzia eta laguntasunarekin elikatzeagatik. Besarkada bero bat!
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
