euskal diaspora eta kultura
2012/06/29
Euskal Herriko Unibertsitateak bertan masterrak egingo dituzten Argentina, Mexiko, Kolonbia eta Venezuelako ikasleentzako mugikortasunerako laguntzak eskatzeko epea ireki du. Hamasei beka emango ditu unibertsitateak aurten. Laguntzak jasotzen dituztenek ez dute masterraren matrikula ordaindu beharko eta ikasturterako 4.500 euro jasoko dituzte. Eskabideak uztailaren 27a baino lehen aurkeztu behar dira, dagokion herrialdeko Euskadiko ordezkaritza edo bulegoan.
2012/06/29
Estatu Batuetan, bertako euskal komunitateak gogor segitzen du euskal piknik eta besten sasoinarekin. Urtero ematen dugu gehiago ala gutxiago horien berri eta halaxe egin genuen aurten ere, Kaliforniako Fresnon 2012ko piknik euskal-iparamerikarren aldia estreinatu zenean. Datorren astean Nevadako Elkon egingo den bertako Festa Nazionala eta aldi berean NABO Biltzarrarekin jasoko du seguruenik bere gailurra aurtengo programak, ondotik hitzordu garrantzitsuak izango badira ere hainbat lekutan. Irakurtzen ari zaren testu honetan, ordea, atzera egingo dugu pixkat, Bakersfield-etik idazten digun Martin Etchamendy lagunaren eskutik. Baionako Herria astekariarekin partekatzen dugun kronikan, Ezterenzubiko lagun amerikanoaren lekukotasuna bildu dugu, egileak berak erabilitako baxenafarrera errespetatuz.
2012/06/29
Joan den ostiralean izan zen Buenos Aires probintziako Ayacucho hiriaren urteurrena eta bertako euskaldunek, kokatzen diren komunitatearekin duten harreman estua erakutsiz, euren egoitzan ospatu zuten euskal eta argentinar ezaugarriz. Euskal Odola antolatzaile, jende ugarik hartu zuen parte ostiralean bertan burutu zen lagunarte folklorikoan, genero askotako musikariak eta euskal dantzariak barne. “Kulturaz gozatu eta momentu on bat pasatzeko aukera paregabea izan zen”, adierazi dio Ana Suarez etxeko kideak EuskalKultura.com-i. Bestalde, Euskal Odolako lagunek Sanferminak ospatzeko programa ere azaldu digute: “Egun osoko ospakizuna izango da, uztailaren 15ean ospatuko dugu eta goizean ‘El alegre despertar’ekin hasi eta meza, bazkaria eta dantzekin segituko dugu”, adierazi dute.
2012/06/28
Elhuyar Fundazioak aste honetan jarri du salgai smartphone telefonoentzako aplikazio berri bat: Kxo! izena du eta euskarazko oinarrizko ezagutzak eskuratzen lagunduko die erabiltzaileei. Aplikazioa hiru hizkuntzatan erabili daiteke --gaztelaniaz, ingelesez eta frantsesez-- eta 2.000 hitz jasotzen dituen hiztegia dakar. hiru euroren truke deskargatu daiteke eta Android zein iPhone mugikorrentzako bertsioak daude salgai. Doako proba bertsio bat ere jaitsi daiteke ere.
2012/06/28
Oinkari dantza taldeko gazteak jo eta su aritu ziren lanean ekainaren 16ean Boiseko Euskal Etxean egin zen sagardotegian. 'Annual Oinkari Sagardotegi Dinner' delakoaren bigarren edizioa zen, eta iazkoak izan zuen arrakastaren ostean, gogotik saiatu ziren gazteak aurtengoa ere mundiala izan zedin. Eta lortu ere, lortu zuten. Ehun bat lagun bildu ziren afarira eta giroa oso atsegina izan zen, Oinkariko Lael Uberuagak Euskalkultura.com-i azaldu dionez. Aurtengo afariaren irabaziak erdibana egingo dituzte Oinkari Basque Dancers taldeak eta Boise State University-ko (BSU) Euskal Ikasketa Programak.
2012/06/28
Historia liburuek jakinarazten dutenez, 1562ko ekainaren 13an irakurri zen lehendabizikoz, Andeen magaleko Tulum haranean, San Juan hiri argentinarraren sorrera agiria. Historialariek argitzen dutenez, San Juan Bataiatzailea ohoratzeko ‘San Juan de la Frontera’ izena paratu zioten hasiera hartan. Joan den larunbatean, eta fundazioaren 450. urteurrenaren baitan, bazkari bat burutu zuten San Juango Eusko Etxea euskal etxeko lagunek garrantzi handiko data hori ospatzeko. Elkarretaratzeak bidea eman zuen, gainera, euskal elkartearen ekimen berri bat iragartzeko: eskualdeko Encon herriko eskola errural bati laguntza emango dio Eusko Etxeak.
2012/06/27
Lagun Onak-eko Zuzendaritza Batzordea berritzeko hauteskundeak egin dituzte joan den asteburuan Lapridako euskal etxean, erakundeko estatutuek arautzen dutenari segituz, Martin Adrian atera delarik berrautatua lehendakari. Adrianekin batera arituko dira batzordekide, besteak beste, Abel Edgardo Larraza, lehendakariorde; María Claudia Aguerre, idazkari; María Ester Arrondo, idazkariorde; Federico Vara, diruzain; y Aldo Larralde, diruzainorde.
2012/06/27
Hagio Sho japoniarra euskaltzale handia da eta Tokioko Euskal Etxeko zuzendaritzatik lan garrantzitsua egiten ari da azken urteotan bere herritarren artean euskal kultura zabaltzearren. Iragan maiatzean ale berria egin dio ekarpen horri, euskal kulturari buruzko liburu bat argitaratu baitu Hiromi Yoshidarekin batera. Lan honek Euskal Herriko gaur egungo gizartean sakontzen du, japoniarrek euskaldunez dituzten zenbait topiko argituz. Sho-ren esanetan bere herrian oso ondo ulertzen dira euskal munduko zenbait ideia: adibidez, Oteizak eta Chillidak darabilten hutsaren kontzeptua, taoismoan eta zen pentsamenduan ere ageri baita, adierazi dio EuskalKultura.com-i.
2012/06/27
Ohitura edo sinesbide zaharrei helduta, edo besterik gabe lagunekin elkartzeko aitzakiarekin, San Juan Gaua ospatu da Argentinako euskal etxe askotan azken egunotan; beste batzuetan, General Las Heraseko Zazpirak Bat euskal etxearen kasua tarteko, datorren asteburuan izango da topaketa. Mota anitzeko ekintzak burutu dira, besteak beste afariak, dantza ikuskizunak, panpinaren erretzeak eta jolasak. Sua izan da zalantzarik gabe hitzordu guztietako protagonista amankomuna. Neguko gauei berotasun apur bat ekartzeko, Necochea, Cañuelas, Buenos Aires, Bahia Blanca eta Gral. Rocako euskaldunek San Juan sua kitzikatu dute, musika, abesti eta jauziekin. Hona aipatu ospakizunen laburpen argazkidunak.
2012/06/26
Akordioa sinatu dute Eusko Jaurlaritzako Kanpo Harremanetarako Idazkaritzak eta Gernikako Bakearen Museoko Fundazioak, ‘Gernikako Bonbardaketa -75 urteurrena’ erakusketa errezibitu nahi duten Mercosur-ko euskal etxeetara iritsi ahal izan dadin 2012ko gainerakoan eta 2013 osoan zehar, Buenos Airesko Euskadiko Ordezkaritzak koordinatuko duen egutegi bati jarraituz. Horretarako, erakusketa jaso nahi duten euskal etxeek Ordezkaritzarekin jarri behar dute kontaktuan erakusketa eskatu (artikulu honi erantsi diogun eskabidea erabiliz) eta baldintza eta xehetasun guztiak bilera birtual baten bidez adosteko. Eskaerak egiteko epea uztailaren 10ean bukatuko da.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
