euskal diaspora eta kultura
2012/09/19
Etxepare Euskal Institutuaren eskutik, New York hiria "Basque Cultural Exchange" ekimenaren leku izango da urriaren 1etik 13ra bitartean, aukera emanez bertako biztanleei egitarauko film, mahai-inguru eta kontzertuak medio euskal kultur emaitza garaikideetara hurbiltzeko, aurten, Gernikako Bonbardaketaren 75. urteurrena gai gisa harturik. City University of New York-en (CUNY) egoitza duen Bernardo Atxaga katedrak aurten irakasle hautatu duen Joxean Fernandez Euskadiko Filmategiko zuzendaria izanik, ekimenak hainbat film emango ditu historiako pasadizo horren inguruan 'Gernika eta Espaniako Gerra Zibilia Euskal Herrian' izenburupean. Beste saio batzuk 'Euskal ikonoak munduan' eztabaidatuko edota euskal kantagintzaren historia aurkeztuko dituzte kontzertu multimedia batean, euskaraz, ingelesez eta gaztelaniaz.
2012/09/19
Euskal Kultura saila du izena bilduma honek eta atzo Donostian aurreneko hamar aleak aurkeztu zituen Etxepare Euskal Institutuak. Sailak jorratzen dituen gaiak euskara, euskal literatura, euskal musika klasikoa, euskal kantagintza, ikusizko arteak, euskal zinema, arkitektura eta diseinua, euskal dantza, bertsolaritza, tradizioak, euskal sukaldaritza eta antzerkia dira. Bildumaren helburua euskal kulturaren arlo hauek nazioartean zabaltzea da eta hirueletan plazaratu da: euskaraz, gaztelaniaz eta ingelesez. Eta gure irakurleentzako interesgarriena: doan deskargatu daitezke Etxepareren webgunetik.
2012/09/19
Datorren irailaren 24ean Donostiako Zinemaldian estrenatuko da "Baztan" luzemetraia, Zabaltegi Bereziak izeneko sailean. Iñaki Elizalde zuzendari nafarraren lehen filma da "Baztan" eta izen bereko bailaran sortu eta grabatutako lana da. Bi garai desberdinetan gertatzen diren istorioak uztartzen ditu filmak: batetik, XVII mendean agoteek jasan zuten diskriminazioa eta horren aurka borroka egiten saiatzen den Joxe gaztearen istorioa; eta bestetik, gaur egun bailarara filme bat errodatzera doan zine ekipo batena. Unax Ugalde eta Carmelo Gomez dira protagonistak, aurrenekoz kamera aurrean jarri diren hainbat baztandarrekin batera.
2012/09/18
Vancouver-eko Zazpirak Bat euskal etxe kanadiarreko bazkideak ilusio handiz bizi dituzte Euskal Etxeen 35. Mus Txapelketa hasi aurreko egunak. Ilusioz eta urduritasun puntu batekin; izan ere, txapelketa oso originala prestatu dute: mus partidak Vancouver-etik Alaskara bidea egingo duen kruzero batean egingo dira. Larunbatean itsasoratuko dira muslariak Sapphire Princess izeneko ontzian. Orotara 135 bidaiari izango dira txapelketan: 11 herrialdetako 24 muslari, 13 ordezkari eta euren lagun eta senitartekoak.
2012/09/18
Bihar asteazkena, gaueko 24:00etan, bukatuko da EuskalKultura.com-ek bere lagun eta irakurleen artean opari ematearren antolatutako 2013ko NABO egutegien zozketan parte hartzeko epea, esan nahi baita Estatu Batuetako eta Kanadako 43 euskal etxe eta elkarteren biltzaile den erakunde honek bere 40. urteurrena beteko duen 2013 urterako prestatu duen egutegia doain eskuratzeko aukera berezia, egutegia bestela berehala jarriko baita salgai Iparrameriketako euskal etxeetako bakoitzean. Parte hartzeko, aski da email bat bidaltzea, zure izen-deiturak eta helbidea (kale, herri eta herrialdea) idatzita. Emaitzak ostegunean webgunean eta buletinean emango ditugu argitara.2012/09/18
Emaitza bikaina izan dute iragan asteburuan Bordeleko Euskal Etxeak Ondarearen Eguna dela eta antolatutako ekimenek. Horien artean nabarmenetakoa izan zen euskal etxeak eta Idoki euskal produktore elkarteak eratu zuten merkatua; izan ere, ia mila lagun igaro ziren bertatik larunbat-igandean. Euskal kutixiekin bisitarien arreta eurenganatu eta gero, musikarekin biribildu zituzten ekitaldiak Eskualdunen Biltzarra elkartekoek. Julian Celaya, Herritarrentzako eta Euskal Gizataldeentzako zuzendaria, eta Bordeleko alkatea, Alain Juppé, bertan izan ziren.
2012/09/17
Bisita egin dute joan den astean Txilera Guillermo Echenique Eusko Jaurlaritzako Kanpo Harremanetarako idazkari nagusiak eta Ainhoa Alday Kanpo Harremanetarako zuzendariak, Euskadiren bertako ordezkari Ana Urchueguiak lagunduta, eta parte hartu dute Salvador Allende presidente zenari bere heriotzaren 39. urteurrenean eskainitako omenaldian, Isabel Allende senatariak eta presidentearen izena daraman fundazioak gonbidatuta. Bidaia berean euskal jatorriko enpresari txiletarrak biltzen dituen Emprebask elkartearekin bildu, eta ondoren Santiagoko Eusko Etxearekin --aurten mendeurrena ari da ospatzen-- eta Colectividad Vasca de Chile izena duen euskal etxe gaztekoekin --2010eko maiatzan onetsitakoa da-- eta segidan Viña del Marren egoitza duen Viña-Valparaisoko Eusko Etxera joan ziren, aste hondarrean Buenos Aires aldera abiatu aurretik.
2012/09/17
Aurreko edizioetan kale egin ostean, iragan irailaren 15ean Caracaseko Eusko Etxeak elkarteko gazteek --eta helduxeagoek ere-- gehien maite duten jaietako bat ospatu zuen: San Antolinak. Arrazoia zera da, Lekeition egiten den bezala, egun honetan Antzar Jokoa egiten dutela Eusko Etxean. Aurten ere elkarteko bazkide askok parte hartu zuten jokoan, Eusko Etxeko piszinaren gainean jarri zuten sokatik zintzilika, nork gehiago iraungo. Eusko Etxeko presidente Pedro Arriagak eguneko argazki hauek helarazi dizkigu.
2012/09/17
Euskal Herriari buruzko hitzaldi batekin hasiko da gaur goizean Tremembé-ko Kultura Etxean, Sao Paulo Hiri Handiko parte den barruti honetan, II. Aste Euskal-Brasildarra, bertan egoitza duen Eusko-Brasildar Etxea gazteak antolatuta. Programak biltzen dituen proposamenen artean daude, besteak beste, hitzaldiak, bisitak eskoletara Euskal Herria eta euskal kultura aipagai, musika eta koru arloko kontzertuak eta baita mus txapelketa bat eta Sao Pauloko kardinalak emango duen meza bat ere, katedralean, euskarako kantuz hornitua. Euskal komunitateak iaz egindako ahaleginari eutsi dio eta, oztopak gaindituz, bere onena eman du egitaraua gauzatzen, komunitate orokorraren partaidetza bilatuz. Ekitaldiak igande eguerdian bukatuko dira, herrialdean ohikoa den 'feijoada' izeneko bazkari herrikoia tarteko.
2012/09/17
Irailaren 6ean Posadaseko Euskal Jatorri elkarteko ordezkaritza bat Oberá hirian izan zen, Immigranteen Eguneko ospakizunetan parte hartzeko. Egun horretan, gainera, elkarteko sortzaile izan zen Maria Isabel Beitia bazkideak omenaldia jaso zuen, Argentinan daramatzan 50 urteak direla eta. Horrez gain, Euskal Jatorriren ordezkaritzak Oberako Kolektibitateen Desfilean parte hartu du aurten ere.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
