euskal diaspora eta kultura
2012/11/06
Berlingo Euskal Etxea oso pozik agertu da amaitu berria den Baskisches Kino Fest zinemaldiak izan duen harrera beroarekin, izan ere, elkarteak azaldu duenez, zinema aretoak ikuslez lepo izan dira emanaldietan, eta itxiera kontzertuak ere -Zuloak taldea eta Fermin Muguruza-- jende asko bildu zuen. Bost egunetan lau luzemetraia eta hainbat labur izan dira ikusgai Alemaniako hiriburuan, eta euskal zinemari buruzko mahainguruak eta hitzaldiak ere antolatu ditu euskal etxeak. Antolakuntzan sostengua eman dute Etxepare Euskal Institutuak, Lehendakaritzak, 2012 Euskadi Fundazioak eta Euskadiko Filmategiak. Aurreneko edizioaren emaitza onak animatuta, elkarteak datorren urtean jarraipena eman nahi dio ekimenari.
2012/11/06
De Paso Publicaciones enpresa bizkaitarrak duela astebete plazaratu du telefono mugikorrentzako aplikazio berria: Euskadiri buruzko doako turismo-gida, oraingoz soilik gaztelaniaz, ingelesez eta frantsesez, eta ez oraindik euskaraz. Enpresak badu eskarmentua horrelako lanetan, izan ere, 18 urte daramatza Euskal Autonomi Erkidegoko hoteletan doan banatzen den paperezko gida egiten. Orain gida hori --Euskadiessencial-- teknologia berrietara egokitu du eta sarean da jada eskuragarri.
2012/11/06
Unibertsitateko Gogoetarako Euskal Katedra Askeak antolaturik, Itziar Rekalde Luzarraga kontalari euskaldunak ‘Ahozko kontaerako teknikei buruzko tailer-laborategia’ eskainiko du La Platako Unibertsitateko egoitzan. ‘Komunikazioaren eta artearen arloan, ahozko kontaeraren garrantzia nabarmentzea’ helburu duen tailerra egun osoko ekintza izango da, bi zatitan banatuta: azalpen teorikoa eta debate/praktika. Hitzordua azaroaren 21ean izango da, 9etatik 12etara eta ordu 2etatik 5etara, Giza Fakultateko 428. ikasgelan. Partaidetza doakoa da.
2012/11/06
Kemper hiriko Ti ar Vro kultur elkarte bretoiak euskal kultur jardunaldiak egingo ditu hilaren 15etik 24ra. Bi herrialdeen arteko elkartasun jardunaldien egitaraua euskal musika tresnen lantegi batekin hasiko da. Ondoren, euskal dantza lantegi bat egingo da, Kepa Untzega dantzariarekin. Euskal musikari buruzko "Bat, bi" dokumentalaren emanaldia egingo da hilaren 20ean eta 24ean "Ohiartzunak / Ekleo / Comme un Echo" musika ikuskizunarekin amaituko dira ekitaldiak. Bilboko Dirdira taldea eta Dremmwel talde bretoiak eskainiko dute ikuskizuna.
2012/11/05
Euskal literatura, zinea, bertsolaritza, dantza, gastronomia, historia, kantagintza edo arteari buruz gehiago jakin nahi duzu? Oraintxe duzu aukera gai horiek guztiak --eta gehiago-- jorratzen dituen liburu sorta eskuratzeko, EuskalKultura.com-ek egingo duen zozketarekin. Etxepare Euskal Institutuak argitaratu duen Euskal Kultura Saila bilduma honetan orain arte argitaratu diren hamar aleak zure etxean eskura ditzakezu. Ale bakoitzeko testuak euskaraz, gaztelaniaz eta ingelesez datoz. Gaur duzu azken eguna zozketan izena emateko!
2012/11/05
Aurrera darrai Argentinan EuskalKultura.com-eko zuzendari Joseba Etxarri egiten ari den bisitaldia, azaroaren 26, 27 eta 28an Argentinako Euskal Aste Nazionaleko ekitaldietan parte hartu eta gero. Etxarrik hitzaldiak eman ditu joan den astean Parana eta Victoria herrietan, Entre Rios probintzian, bertako Urrundik eta Hariz euskal etxeen eskutik, hurrenez hurren. Gaur iluntzean, berriz, Andeen magaleko Mendozan, hitzaldia Denak Bat euskal etxearen egoitzan emango du, "Euskaldunak munduan" izenburupean.
2012/11/05
Quebeceko Euskaldunak elkarteak konferentzia gaua egin zuen iragan urriaren 25ean eta arkeologia eta Ipar Amerikako kostaldeko euskal baleazaleen aztarna historikoak izan ziren hitzorduko ardatza. Gauari hasiera emateko, euskal etxeak "Apaizac Obeto" dokumentala eskaini zuen. Dokumental honek Labrador kostaldean XVI. mendeko baleazaleen bideak errepikatuz 2006an bidaia egiten zuten euskaldun talde baten abentura jasotzen du. Ondoren Robert Grenier ur-azpiko arkeologoak hitzaldia eman zuen Kanadako kostaldean dauden euskal txalupa hondoratuei buruz.
2012/11/05
Ikasle, ikasle izandako, ahaide eta eskolako irakasle eta agintariak bildu dira urriaren 13an Euskal Echea Institutuko 'Euskal Jaia'n. Hitzordua Buenos Aires probintziako Llavallolgo elkartearen egoitzan gauzatu zen eta urtero bezala, elkarretaratzearen helburua "dantza eta kirolen bidez, Euskal Herriko eta Argentinako kulturen fusioa" erakustea izan da. Begoña Muñiz eta Aitor Alava Zurimendi dantza irakasleen zuzendaritzapean, mila ikaslek hartu zuten parte azken ‘Euskal Estanpa’n, eskolako kirol zelaiak "benetako herriko jaia" bihurtzen.
2012/11/02
Data kontuetan atzerapen batzuk suertatu eta gero --ekitaldiak normalean hemengo udan izan ohi dira, otsail aldean askotan-- gaur hasiko ditu Minas-en, Lavalleja departamentuan, FIVU euskal uruguaitar erakundeen federazioak bere urteroko Udalekuaren 2012ko saioak. Hirurogei bat partaide espero dira, haurrak eta begiraleak barne, datorren igandera arte, azaroaren 2rik 4ra bitartean, egingo diren jardunaldietan. Hamaikagarren aldia du hau Uruguaiko Udalekuak.
2012/11/02
Euskararen Egunaren ospakizunetara begira, Eusko Ikaskuntzak euskararen aldeko internet kanpainia berezia jarri du abian. Oraingoan euskal kultura eta zientzia elkarteak Google bilatzailea ipini du jomugan eta sinadurak biltzen ari da interneteko atari erraldoiari euskarari buruzko "doodle" bat egiteko eskatuz. Kanpainan izena ematen dutenen artean HABEren 2013ko agendak eta egutegiak zozketatuko dira.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
