euskal diaspora eta kultura
2012/12/27
Euskal Goi Sukaldaritza Londresera iritsiko da Elena Arzaken eskutik. Aurten bertan "Munduko emakume sukaldaririk onena" titulua, Restaurant aldizkari espezializatu britainiarrak emanik, jaso duen chef-ak jatetxea zabalduko du bost izarreko Halkin hotelean, hiri erdiguneko luxuzko Belgravia auzoan. Juan Mari Arzak sukaldari ospetsuaren alaba den Elena Arzak-ek “Ametsa” ipini dio izena Londresko bere aldaxkari.
2012/12/27
Argentinako eta oro har euskal jatorriko komunitate osoari luzatzen dio Euskal Echea Institutuak 2013ko ikastaroan parte hartzeko gonbitea. Aurrekoetan bezala, udako kurtsoaren bosgarren edizio honetan euskal kultura izango da ikasgai nagusia. Historia, geografia, zinea, hizkuntza, literatura… alor hauek eta beste zenbait jorratuko dituzte ikasleek Euskal Herriko kulturan sakontzeko. Klaseak otsailaren13an hasiko dira eta 23an bukatuko, Euskal Echea Institutuaren Sarandi kaleko egoitzan. Kostuari dagokionez, partaide bakoitzak 200 peso ordaindu beharko ditu, Llavallolgo Euskal Echearen egoitzara egingo den bisita eta bertoko bazkaria barne.
2012/12/27
"Patria y Libertad" liburuan lau historialarik --bi euskaldun, bi kubatar-- Kubako Independentzia Gudetan (1868-1898) euskaldunek izan zuren partehartzea aztertzen dute. Alexander Ugalde historialaria izan da lanaren koordinatzailea eta egileetako bat. Euskaldunak partaide izan ziren borrokan, batzuek independentziaren alde, beste batzuek Espainiaren alde eta beste batzuek Estatu Batuetako parte bihurtzearen aldeko. Liburuak ikuspuntu desberdin hauek aztertzen ditu, eta baita ere gerraren berriek Euskal Herrian izan zuten oihartzuna eta eragina.
2012/12/27
Saltoko Euskaldunen Taldea euskal etxeak sustatuta, Gernikako Bonbardaketari buruzko erakusketa bat inauguratu zen Saltoko Irene Olarreaga Museoan iragan abenduaren 1ean. Ekimenarekin batera, museoko beste areto batean erakusketa ere antolatu zen euskal etxeko margo lantegiko ikasleek ikastaroan zehar eginiko lanekin, kasu honetan ere ardatza Gernikak 1937an jasan zuen erasoa izan zelarik.
2012/12/26
2010eko Shanghaiko Nazioarteko Erakusketan izandako presentzia nabariagatik, Shanghaiko Euskal Etxeak Bilboko Udalari emango dio bihar Bilbon egingo duen ekitaldian, Bilboko Udaletxean bertan, bere Urrezko Abakoa 2011 saria. Urrezko Abakoa sariarekin munduan eta Asian Euskal Herriko kultura edo izena zabalduz lanean ari diren pertsona edo instituzioak saritzen ditu Shanghaiko euskal elkarteak.
2012/12/26
Alderdi jeltzaleak Argentinan daukan aberriz kanpoko Batzordeak ohar batean jakin arazi digunez, Argentina Buru Batzarrak egin berria duen urteroko ohiko bilerak araudiak markatzen duen ohiko kargu berrikuntza egin du, Felipe Eiheragibel rosariotarra lehendakari. Eguberri eta Urte Berri Ona opatu ondoren, jeltzale argentinarrek euren atsegina adierazten dute Iñigo Urkullu lehendakari berria hautetsi izanarekin eta "ebatsi ziguten Jaurlaritza berreskuratu izanagatik".
2012/12/26
Iparraldeko Euskal Kultur Erakundeak bere atarian jarri du eskuragarri Joseph Maris harmonizatzailearen partitura fondoa: ia 300 euskal kantu herrikoi --eta erdal abesti batzuk ere--, Marisek moldatuta. Bi, hiru edo lau ahotsetako kantuak dira, gitarra eta beste musika tresnen akordioez osatuak. Partiturak PDF, Midi edo Sibelius formatoan jaitsi daitezke zuzenean saretik, doan. Marisek horiek erabiltzeko baimena ematen du, baldintza bakarra zera da: abesbatz batek publikoaren aurrean kantatzen badu abesti hauetakoren bat, deklaratu egin behar dio Frantziako SACEM erakundeari.
2012/12/26
2012 urtearen azken egunetan, Argentinako Iparekialdeko Erregiotik, Chaco probintziako Kotoiaren Lurra Euskal Etxetik, elkartearen Erakin aldizkariaren berreskuratzea eman dute aditzera, paperezko titulu honen 11. zenbakira helduz, beti ere euskal historia, kultura eta egungo berriak hizpide, Europako Euskal Herria nahiz Argentina, Chaco eta Diaspora ere barne. Aurreko aldizkarien formato bera dakar eta Nafarroako Erresumaren konkistaren 500. urteurrena da azalera atera duen gaia, barnean Cesar Arrondok sinatzen duen artikulu baten ildotik.
2012/12/25
Iritsi gara hamabigarrenez EuskalKultura.com egiten dugunetik Eguberrira, urtero garai aproposa eta aukera egokia urtean zehar lagun, lankide eta konplize zaituztegunok modu berezian agurtu eta gure esker ona adieraziz besarkada handi bat emateko, elkarrekin beste urte bat bete dugula ospatzeko eta lokarri dugun euskara eta euskal kulturarekin aurrera segitu izanaz loriatzeko. Familia handi txiki bat gara eta elkarren berri dakigun bitartean batuago gaude, haziz goaz eta azkarrago eta indartsuago gara. Zorionak eta Agiantza Onenak, irakurle!
2012/12/24
Daniel Pérez izan da Dastatu.es on line dendarekin batera zozketatu dugun euskal produktuz betetako Gabonetako saskiaren irabazlea. Zorionak! Zozketako partaide guztiek euskal errezeta bat argitaratu behar izan dute Dastatu.es-en Facebookeko orrian eta horietarik Daniel Pérez izan da zozketako arauak bete izanez suertatu den irabazlea.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
