euskal diaspora eta kultura
2013/01/15
Aurten ere Necocheako Euskal Etxeak aurrea hartu du eta iragan asteburuan ospatu zituen San Sebastian eguneko festak, danborrada eta guzti. Necocheako danborrariei jarraiki, datorren larunbateko gauerdian Donostiako eta Azpeitiako danbor-joleek ekingo diote jaiari eta eurekin batera Diasporako hainbat euskal etxetako lagunek ere. Larunbatean hasi eta igandea bitartean jaiak eta danbor hotsak izango dira Sydneyn, New Yorken, Madrilen, Bartzelonan, Parisen, Shanghain, Caracasen eta Mexikon, besteak beste.
2013/01/15
Pekinen bi hilabeteko arte erresidentzia egin nahi duten euskal artistek "Goazen Txinara!" 2013 beka eskatzeko aukera dute, urtarrilaren 30a bitartean. Hiriburu txinatarrean bizi den Judas Arrieta artista hondarribiarrak sustatuta, programa honek bosgarren edizioa du aurten eta Etxepare Euskal Institutuaren eta Eusko Jaurlaritzaren laguntza du.
2013/01/15
Judas Arrieta (Hondarribia, 1971) artista euskaldunak Ziriborroak izeneko erakusketa inauguratu zuen urtarrilaren 11n Bilboko Windsor Kulturgintza Galerian. Azken bi urteotan Txina eta Euskal Herria artean egindako marrazki eta margo-lanez osatutako erakusketa da. Arrietaren unibertso plastikoak, pertsonaia bereziek, kolore biziek eta ezinezko konposizioek errealitatearen eta fikzioaren arteko bidegurutzeetara eramaten gaituzte. Mangak, masa-kulturak eta underground estetikak eraginda eraikitzen da Arrietaren obra.
2013/01/14
Zingirako Euskaldunak elkartea pozik agertu da Chascomus 2013 Udalekuaren emaitzarekin: bost egunetan zehar bertan parte hartu zuten 53 gazteek euskal kulturaren hainbat arlotan sakontzeko aukera izan zuten, euskara, dantza, pilota, eta mitologia lantegiei esker. Alta, horrekin guztiarekin batera, aisia eta lagunak egiteko tartea ere izan zen, Chascomuseko zingiran zein euskal etxeko piszinan eman zituzten orduetan.
2013/01/14
2011ko hondarrean sortu zen, baina urtebeteko epean Rio Grande do Sul-eko Euskal Etxeak 200 lagundik gora bildu ditu inguruan, Brasilgo estatu honetako euskal kultura eta euskaldunen historia berreskuratzeko asmoz. Argentina eta Uruguairekin muga du estatu honek eta euskal inmigrante asko heldu ziren bertara XIX. mendean. 2013rako planen artean bertako euskal familien artxibo historikoak bildu eta sailkatzeko asmoa agertu du euskal etxeak.
2013/01/14
Fermin Muguruza musikari euskaldunak zuzendu duen "Zuloak" luzemetraiak harrera bikaina izan du Argentinan, eta Clarin egunkariak amaitu berria den 2012. urteko hamabi filme onenen artean aukeratu du. Zerrendako lanen artean Martin Scorsese, Aki Kaurismaki eta Christopher Nolan bezalako zuzendari ezagunen azken lanak daude.
2013/01/14
Kultur teknikari postua bete nahi du Bartzelonako Euskal Etxeak eta lan honetan jardun nahi dutenek datorren ostiralera arte daukate CVak bidaltzeko epea. Teknikaria Euskal Etxearen programaketa kulturalaz arduratuko da, dagoeneko lanean ari den lantaldearekin bat eginez. Horrekin batera, Euskal Etxearen ekitaldi, ziklo eta jaialdien programaketa, produkzio eta posprodukzioa ere bere gain hartuko ditu. Hautagaiek euskara jakitea eskatzen da eta katalana ere menperatzea hobesten da.
2013/01/02
Kaixo, irakurle adiskide hori: urtero bezala sasoin honetan, EuskalKultura.com-ek egun batzuk hartuko ditu urte berriaren hasiera honetan barne-lanei ekiteko eta datozen egunetan ez dugu buletina plazaratuko. Aste t'erdi inguruko tartea izango da, urtarrilaren 14ean, astelehena, txintxo-txintxo itzuliko baikara zuekin urte osoan daukagun eguneroko hitzordura. Egun hauetan ere, dena den, zuen zerbitzura jarraituko dugu betiko legez, ohiko leku, email eta telefonoetan, baita Facebook eta Twitter-en ere. Segidako artikulu honetara, azken pare bat asteetan iritsi zaizkigun zorion-mezu eta urte berri agurrak bildu ditugu, usadio bilakatu denari jarraiki. Urte Berri On!
2013/01/02
Kulturak edo ohiturak eraginda, urte zahar/urte berriko egunak denboraldi aproposa izan daitezke balantze eta gogoetak egiteko. Batzuentzat egun batetik beste batera pasatzea baino ez da abenduaren 31ko gaua. Beste batzuek, berriz, berriro abiatzeko aukera bezala bizi dute eta urte berriaren alde hori azpimarratzen dute. Edozein kasutan, ez dago gaizki noizean behin geldialdi bat egitea, atzera, ingurura eta aurrera begiratzeko nola gauden jakiteko. EuskalKultura.com-eko argentinar korrespontsal Sabrina Otegik galdetegi bat pasatu dio Mikel Ezkerrori, honek bere irakasle eta ikerle esperientziatik erantzun dezan.
2013/01/02
Norma Riosek artikulu hau sinatzen du Euskal Argentinaz, aurten elkarte honen orain arteko lehendakari Pierra Lakok lekukoa Monika Legartori pasa diola-eta. Pierra 1990etan bidaiatu zen Argentinara lehen aldikoz, hara joana zen osabaren arrastoaren gibeletik. Arrakasta ukan eta kusiak eta bere familia argentinarra ezagutu zuen Pierrak. Horrek egoera berean dauden jendeei laguntzeko Euskal Argentina sorrera eragingo zuen. Elkarte honek Ipar Euskal Herriaren eta Argentinaren arteko harremanak sustatu ditu, Buenos Airesko Iparraldeko Euskal Etxea ere lankide. Hori guztia hartzen du hizpide CVFko idazkari den eta bera ere langintza horretan laguntzaile den Norma Rios emazte atxiki euskal-argentinarrak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
