euskal diaspora eta kultura
2013/01/18
Buenos Aires probintzia argentinarreko Pergamino hirian, bertako Lagun Onak Euskal Etxeko Batzar Nagusiak urteroko ohiko bilkura egin du eta, besteak beste, araudiaren araberako Zuzendaritza Batzordea berritzeko bozka egin du, ondorioz berrautatua izan delarik elkarteko lehendakari gisa Julio Martin de Sautu, berarekin batzordekide izango direla Alicia Ruiz Moreno, lehendakariorde; Martha G. Arrillaga, idazkari; Daniela Albarracín, idazkariorde; María Delia Larrauri, diruzain; eta Rodolfo de la Vega, diruzainorde.
2013/01/18
Ameriketarako euskal emigrazioa izango du ardatz gaur bertan Nafarroako Unibertsitatean hasiko den hitzaldi zikloak, Euskal Hizkuntza eta Kultura Katedrak antolatuta. Oscar Alvarez Gila histolariak inauguratuko du aurreneko saioa, 'El marco jurídico de la emigración ultramarina: repensando las migraciones vascas' hitzaldiarekin. Katedrak 50. urteurrena beteko du aurten eta ikasturtean zehar jarduera bereziak egingo ditu mende erdia ospatzeko.
2013/01/18
Puerto Madryngo Etorritakoengatik Euskal Etxeak pozik hasi du 2013 urtea, 2012an jarritako helburuak bete dituenaren lasaiatasunarekin. Elkartea gazte da oso --iaz bete zuen lehenengo urtea-- eta 2012an zehar dantza taldea indartzea eta sustatzea izan du helburu nagusi, Necocheako Euskal Etxeko dantza irakasleen laguntzarekin. Euskal etxeko presidente Nicolas Fagoagak urteko jardueren errepasoa egin du.
2013/01/17
Henar Chico blogari boisetarrari esker jakin ahal izan dugu sarean eskuragarri dela "Un legado que perdura: la historia de los vascos de Idaho" liburua. Doan eta pdf formatoan deskarga daiteke Eusko Jaurlaritzaren webgunetik. Liburua Boiseko Mark eta John Bieter anaien "An Enduring Legacy: The Story of Basques in Idaho” lanaren itzulpena da. Bertan Bietertarrek Idahoko euskaldunen azken hiru belaunaldien historiaren berri ematen dute, AEBetako estatu honetara heldu ziren aurreneko euskal artzainetatik hasi eta gaur egungo estatuko komunitate sendoenera heldu arte.
2013/01/17
Atzerrian euskara eta euskal kultura irakasle izan nahi dutenek horretarako online trebatzeko aukera izango dute aurten, Etxeparek eta EHUk antolatu duten online ikastaroari esker. Ikastaroak "Atzerriko unibertsitateetan euskara eta euskal kultura irakasteko prestakuntza ikastaroa. Excellence in Basque Studies (II)” izena du eta EHUko Udako ikastaroen baitan emango da. Urtarrilaren 31n amaituko da izena emateko epea.
2013/01/17
Brasildarra da, Euskal Herrian bizi da eta herri kirolak lantzen ditu Maria do Amparo Sousa Santosek. Euskara ere poliki mintzo du eta, dioenez, ikasten du, "beste herrialde batean bizi bazara, bertako hizkuntza ikastea gauza zuzena delako". Salvador de Bahian jaio zen 1972ko abenduaren 10ean, baina egiari zor Lesakan biziizan da azkeneko 16 urteotan, amodioa errudun. Sorterria batere ahantzi gabe, bertakotu ere egin da Euskal Herrian. Euskadiko txapelduna ere bada txinga-proban. Zalantzarik gabe, brasildarra eta beltza izanik 'rara avis' da euskal herri-kirolen munduan.
2013/01/16
18 eta 30 urte artean badituzu eta Europan zehar bidaiatzeko gogoa baldin baduzu, ETBren "Txapela Buruan" saioak ematen dizu aukera. Ostiral honetan ETBren Bilboko egoitzan egingo den kasting-ean lau gazte aukeratuko dituzte, hamabost egunez Europa InterRail bidaia egiteko. Ibilbidean Amsterdam, Berlin, Budapest, Varsovia eta Lausanne bisitatuko dituzte eta bertako euskaldunen bizimodua ezagutu ahalko dute. Europan bizi den euskalduna bazara, berriz, idatz ezazu artikuluan esaten dugun helbidera, programak bisita egin diezazun.
2013/01/16
Iñaki Dieguez musikari irundarrak "Birak" diskoa argitaratu du, hiru urtez Cirque du Soleil konpainiarekin munduan zehar egindako tourean bizi izandakoak eta ikasitakoak bilduz. Epe horretan Estatu Batuetako eta Brasilgo musikariekin kolaboratu zuen irundarrak eta hiru herrialde hauetako musikak uztartuz sortu dira diskoko abestiak. "New York edo Torontoko kaosa, Korearekiko kultura ezberdintasuna, Yosemiteko Redwood basoak, Euskal diaspora Kalifornian, nire lagun brasildarrekin izandako esperientziak, hoteleko bakardadea...", horrela laburbiltzen du diskoaren inspirazioa Dieguezek. Eta sekretu bat ere kontatu digu: Nahiz eta brasidarrek erritmoa odolean eraman, fandangoa jotzea kosta egin zitzaie! Hala nahi duten euskal etxeei, diskoaren aurkezpenak antolatzeko deia egiten die musikariak.
2013/01/16
Benito Lertxundi, Berri Txarrak, Ken 7, Esne Beltza, Fermin Muguruza, Oskorri, Gatibu, Gozategi, Mikel Laboa, Gose eta beste hainbat eta hainbat euskal musikariren kantak aurki ditzakezu sarean doan, karaokeaz gozatzeko. Txantxangorria.eu webgunean, esaterako, euskal musikagintzako atzoko zein gaurko 700 abesti baino gehiago daude jarrita; euskal etxeko jai eta elkarretaratzeak animatzeko, euskal etxeko euskara klaseetan proposamen desberdin bat sartzeko edo, besterik gabe, lagunekin ondo pasa eta abestien hitzak irakurri eta ikasteko.
2013/01/15
Danborradako, inauterietako edota zure euskal etxeko edo herriko jaietako argazkiak ateratzeko aukerarik duzu? Argazki kamera digital itzel bat irabazteko aukera izan dezakezu edozein euskal ospakizuneko argazkiren bat edo protagonista euskalduna duen argazkirik guri bidaliz gero. Canon PowerShot SX120 itzel bat zozketatuko dugu partehartzaileen artean! Ez baduzu argazki kamerarik, zaude lasai, bidaliguzu testu bat zure euskal etxeko jarduera edo ekitaldiren bat deskribatuz eta euskal etxe edo elkarte horren parte izateak zuretzako zer esan nahi duen adieraziz.PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
