euskal diaspora eta kultura
2013/01/30
Negu gorri-gorria ari gara izaten Euskal Herrian: euria, haizea, elurra, eta itsasoa ere zakar-zakar. Tarteka urdinguneak, eta eguzkirik ere badela ari gara ikusten. Kepa Etchandy argazkilari lapurtarrak urtaro ikusgarri hau baliatu du Euskal Herriari buruzko argazki sorta ederra egiteko. Ikusi nahi duenak www.ibaifoto.com webgunean du eskuragarri, Euskal Herriari buruzko beste 50.000 argazkiekin batera.
2013/01/29
Tokioko Euskal Etxeak Euskal Herriari buruzko hitzaldi bat eskaini zuen berriki, japoniarrei euskal kultura ezagutzeko aukera emateko helburuarekin. Hitzaldiaren izenburua "Euskal Herria, jendea eta hizkuntza" izan zen eta hizlari aritu ziren elkarteko bi kide: Hagio Sho hizkuntzalaria eta Yuichi Shimanuki izan ziren. Biak al biak euskal kulturan adituak dira eta, horrez gain, iaz Shok gai honi buruzko liburu bat argitaratu zuen japonesez: "Gendai Basuku wo Shiru tame no 50 Shou" (Gaur egungo euskal gizartea eta kultura ezagutzeko eta ulertzeko 50 atal).
2013/01/29
Caracaseko euskal etxe venezuelarretik heldu zaigu "Jazoera" berripaperaren azken alea, urtarrilekoa, elkartean azken asteetan egin diren ekitaldien informazioarekin. Horrez gaiz, Txileko Santiagoko euskal etxeak ere helarazi digu bere azkena, "Berriketari" albistariaren 47 zenbakia. Abendukoa alea da, baina urte osoko jardueren errepasoa egiten du, 2013an Txilen egingo den Munduko Mus Txapeketa ere aipatuz. Azkenik, Lapridan egoitza duen Arturo Campion Ikastetxeak ere bere buletina igorri digu.
2013/01/29
Erromako Associazione Culturale Euskara-k eta UPTER unibertsitateko Dipartimento di Lingua e Cultura Basca sailak gogotsu segitzen dute euskal kultura Italiako hiriburuan ezagutarazten. Bihar, esaterako, Joseba Sarrionandia idazlearen poemak irakurriko dituzte -italierara itzulita- Giufa liburudendako "Aperitivo Basco" deitzen duten hileroko hitzorduan. Horrez gain, bi elkarteek sarean jarri dituzte Radiodramma proiektuaren emaitzak.
2013/01/28
Urtarrilaren 13an hil zen Uruguain Gregorio Lizarbe, 81 urterekin. Gaztetan heldua zen Argentinako Rosario hirira eta bertan harro agertu zuen nafar nortasuna, Rosarioko Nafar Etxeko presidente eta diruzain izanik, besteak beste. Eginahal honetan egin zuen lan eskerga dela eta pertsona oso maitatua izan zen. Isabel Rodriguezekin ezkondua, hiru seme-alabaren aita zen: Marisa, Silvia eta Fernando, azken hau Rosarioko euskal etxeko kide eta buruzagi ezaguna. Heriotzaren berri izan bezain azkar, Nafarroako presidente Yolanda Barcinak doluminak agertu dizkio familiari gutun baten bitartez. Gogoan Bego.
2013/01/28
Donostian baino astebete beranduago antolatu dute aurten Caracasen, bertan urtero San Sebastian eguna kari antolatzen duten danborrada. Ez da originala bezain jantzia eta prestatua izango, baina zalantzarik gabe ilusio osoz aritu ziren joan den larunbatean venezuelar hiriburuko euskal etxeko kideak Sarriegiren piezak jotzen bertako pilotalekuan, bildutako lagun eta bazkideen txalo artean.
2013/01/28
Internet bidez egin daitezkeen euskara ikastaroen artean arreta berezia eman digu HABEk eskaintzen duen Aisa online ikastaroak. Doakoa delako eta edonork erabili dezakeelako. Hizkuntza aldetik, gaztelaniazko hiztunentzat diseinatua dago eta maila apal-apaletik hasita, euskara ikasten hasteko baliabide erraz eta entretenigarria da. Izenak dioen bezala, aisa ikasteko, alegia. Jarraian nola erabili azaltzen dizu EuskalKultura.com-ek.
2013/01/28
Pixkanaka argazki mordoa ari zaigu iristen argazki kameraren zozketarako. Ikusi nahi al dituzu? Madrilgo danborrada, euskal festak Argentinako hainbat tokitan, Diasporako euskaldunen Euskal Herrirako bidaiak, euskal dantza ikuskizunak, Korrika Mexikon... Argazki politak dira, bitxiak, alaiak eta, nola ez, euskaldunak %100. Lan bikaina egiten ari dira parte-hartzaileak... nahiz eta, oraindik, zureak falta zaizkigun. Anima zaitez!
2013/01/25
Irakurle askok eta askok sarri idazten dute euskara ikasteko ikastaroei edo webguneei buruzko informazio eske eta behar horri erantzunez sarean aurkitu ditugun baliabideetako batzuk bildu ditugu artikulu honetara. Batzuk online ikastaroak dira, zenbait doakoak, beste batzuk ordaindu beharrekoak... Horrez gain, sareko hiztegiak, zuzentzaileak, mintzapraktika egiteko foroak eta jokoak ere gehitu ditugu. On egin!
2013/01/25
Lapridako Lagunen Etxea euskal etxe argentinarrak euskal bitxigintza tailer kontzeptuala antolatu eta garatu zuen 2012an zehar. Silvia Azpiazu irakaslearen gidaritzapean, ikasleek beren sentipenak bitxigintzaren bidez adieraztea lortzea zen helburua eta urteari eta ikastaroari amaiera emateko, tailerrean egindako bitxiekin erakusketa antolatu zuten, euskal ikutua eta ikasleen irudimena osagai dituzten hainbat emaitza eder lortuz.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
