euskal diaspora eta kultura
2013/02/22
Euskal Kultur Erakundeak sorkuntza sustatzeko Hogei'ta egitasmoaren barruan deialdi berria egin du: kasu honetan, musika eta irudia erabiliz euskal kultura eta euskara berrintepretatzen duen proiektu batlagunduko du elkarteak, gehienez 13.000 euroz. Deialdian EKEk Iparraldeko zein Hegoaldeko kultur erakunde ezagunen sostengua du. Euskal Herriko, Diasporako zein nazioarteko artistek parte har dezakete, EKEk EuskalKultura.com-i baieztatu dionez. Proposamenak euskaraz, frantsesez, gaztelaniaz edo ingelesez bidal daitezke. Hautagaitzak aurkezteko epea apirilaren 30ean amaituko da.
2013/02/22
Bihar aurkeztuko da Bartzelonan "Som com moros dins la boira?", Joseba Sarrionandia idazle iurretarraren "Moroak gara behelaino artean?" saiakeraren katalanezko bertsioa, Pol·len argitaletxe katalana argitaldari. Saiakerak Literaturako Euskadi saria lortu zuen 2011ean eta Pol·leni argitaletxekoei interesgarria iruditu zitzaien lana katalanera itzultzea. Aurkezpena bihar larunbata egingo da, Bartzelonako Centre de Cultura Contemporània-n (CCCB).
2013/02/22
Christophe Pavia artista hendaiarrak eta Adelaide Daraspe urruñarrak sortua da "Zortzi" ikuskizuna, eta datorren martxoaren 7an aurkeztuko da lehen aldiz Montrealen, Quebec-en. Aurkezpena bertan egitearen arrazoia zera da, Daraspe, Euskaldunak elkarte quebectarreko presidentea dela eta euskal etxea ere ikuskizunaren sorkuntza prozesuan eta aurkezpenean partaide dela. "Zortzi"k euskal inauterien irakurketa artistikoa proposatzen du, Paviak joaldunen kapeletan oinarritutako piezak eta orrazkerak aurkeztuko dituelarik. Ondoren, Daraspek aratusteei buruzko solasaldia eskainiko du. Montrealeko Rialto antzokian aurkeztuko da ikuskizuna.
2013/02/22
'Kolektibitateen Sukaldaritza-Gunea' Argentinako hiriburuko udalak sustatzen duen jaialdi bat da, "Buenos Aires Celebra" (Buenos Airesek ospatzen du) festan parte hartuko duten kolektibitateen lehendabiziko aurkezpen moduko bat. Izan ere, martxoaren 9an berrogeita hamar bat gizataldek beteko dituzte hiriburuko Mayo etorbideko standak, euskaldunak ere tartean. Laurak Bat eta Euskaltzaleak erakundeak izango dira euskal ordezkari eta bertara gonbidatzen dituzte martxoaren 9an Buenos Airesen ibil daitezkeen euskaldun guztiak.
2013/02/21
Kanpoan diren Euskal Gizataldeentzako zuzendari Asier Vallejok idatzia helarazi zien atzo euskal etxeei, 2013ko euskal etxeen laguntza deialdirako proposatu dituen aldaketen berri emateko. Krisi ekonomikoa dela eta, euskal etxeen laguntzen deialdian murrizketa batzuk proposatu dira, baina larrialdietarako deialdia bere horretan mantenduko da. Eskabideak aurkezteko epean ere mantendu egiten da: otsailaren 28an, datorren ostegunean, alegia.
2013/02/21
Antzinako elkarteak lan eskerga egiten du Euskal Herriko genealogia artxibo eta informazio iturrien zabalkuntza arloan. Genealogiaren munduan hasi nahi dutenei laguntzeko asmoz, elkarteak webgunean eta Facebook orrian Diasporako zein Euskal Herriko erabilgarri izan daitezkeen atariak aipatzen ditu; Araba, Bizkai eta Gipuzkoako kasuan, esaterako, elizbarrutietako artxiboak, online kontsulta baitaitezke. Nafarroaren kasuan, aldiz, agirien informazioa ez dago sareratuta, baina Antzinakoko kideak datu horiek digitalizatzen ari dira eta dagoeneko webgunean kontsulta daitezke horietako asko, 1599-1899 bitartekoak.
2013/02/21
Udalak sustatzen duen proiektuak Olavarriako alderdi nabarmenak erakustea du helburu nagusi, tartean herriaren historian zehar gizataldeek izandako eragina. Kari horretara, eta dokumentalaren arduradunek deituta, eszena batzuk antzeztu zituzten Gure Etxe Maitea-ko kideek euskal giroa islatzeko. Baina beste ohar batzuk ere iritsi zaizkigu azken egunetan Olavarriatik: Olentzero karrozaren saria, euskal etxeko futbol taldearen sorrera eta, 2013ko ikasturteari begira, eskolako materialak biltzeko kanpaina. Hona guztien berri.
2013/02/20
Kea baino alferragoa, zain eta muin, egun txakurra... Euskal esaera zahar hauen esanahia eta gaztelaniazko zein ingelesezko antzeko esamoldeak biltzen ditu esaerajatorrak.com blogak. Maite Goñi irakasleak sortu du orri berri hau, atsotitz hauen erabilera sustatzeko helburuarekin. Goñiren esanetan, "ezjakintasunagatik edo inguruko hizkuntzen eragina nabarmenegia delako, maiz beste hizkuntza horietatik egiten dugu tira lokuzio, esaera edo atsotitzak erabiltzeko orduan. Bada, txoko honen helburua hain ezagunak diren atsotitz edo lokuzio horiek euskara jatorrera ekartzea izango da".
2013/02/20
Korrika 18 martxoaren 14an abiatuko da Andoainen eta 11 egunez, gelditu gabe, Euskal Herria zeharkatuko du, martxoaren 24an Baionara heldu arte. Korrika AEK euskaltegien koordinadorak antolatutako herri lasterketa erraldoia da, helduen euskaratzea eta alfabetizazioaren alde, eta milaka euskaltzaleren babesa jaso ohi du ibilbidean zehar. Diasporan ere gero eta oihartzun handiagoa du eta makina bat lekutan hasi dira jada ekitaldiak prestatzen. Zuk ere halako zerbait egin nahi duzu zure euskal etxean? Jar zaitez AEKrekin harremanetan!
2013/02/19
Jatorri arabarreko Gervasio di Césare genealogista argentinarrak “Historia y genealogía de los Lázarraga” (Lazarragatarren historia eta genealogia) liburua aurkeztu du Txileko hainbat hiritan. Pasa den urtarrilean Viña del Marreko Eusko Etxean izan zela aipatu genizuen, Txileko zazpi presidente ohiren arbaso euskaldunei buruz hizketan; horrez gain Vicuña Mackenako Eusko Etxean eta Santiagoko Txileko Euskal Elkartean izan da, non antolatzaileek jardunaldia arrakasta itzela izan zela azpimarratu duten.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
