euskal diaspora eta kultura
2013/04/16
Juan Inazio Garcia de Mutiloa gasteiztarra, Shanghaiko Euskal Etxeko sortzaile eta lehenengo presidente izan zena, Industria eta Energia sailburuorde da Urkullu lehendakariaren Jaurlaritzan. SPRIrekin heldu zen Txinara eta argi ikusi zuen bertara zihoazen euskaldunek --berak tarteko-- euskal etxe bat behar zutela. Bilboko Deia egunkariak horretaz eta beste hainbat gauzez elkarrizketa argitaratu zion atzo. Mutiloarentzat baliotsuak izan ziren oso, pertsona zein profesional gisa, Txinan pasatutako urteak. Gazteei "mundua jatera atera behar dute"la esaten die.
2013/04/16
Asteburua euskal jairik jai igaro nahi duenak badu horretarako aukera Frantzian, Pariseko eta Bordeleko euskal etxeek larunbat eta igande honetan antolatu dituzten bestekin. Hasteko, Pariseko Eskual Etxeak Orok Betan jaia egingo du larunbatean, apirilaren 20ean, Euskal Herriko eta Kataluniako dantza talde eta musikariak partaide. Bordelen, aldiz, Eskualdunen Biltzarra elkarteak igandean gauzatuko du festa, Grandignan herrian egingo duen jai eta dantza erakustaldiarekin.
2013/04/15
Buenos Aires probintzia argentinarreko hiriburu La Platan egoitza duen Goierri Euskal Gastronomia Elkarteak bere zuzendaritza berritu du, estatutuen arabera, batzorde berrituan daudela, besteak beste, Cesar Arrondo, lehendakari; Vilma Sanz, lehendakariorde; Carolina Echeverria, idazkari; eta Pedro Mauregui Larranda, diruzain. Elkartea euskal etxe gisa onartu zuen Eusko Jaurlaritzak iragan urtarrilean. Goierrik, bestalde, gertu dagoen Gernikako Bonbardaketaren urteurren berria, 76.a, gogoan hartzera deitu du, ahal dela oroitzapen eta gomuta hori publikoki eta aktiboki agertuz.
2013/04/15
Badatoz aurten ere Poznago Euskal Egunak, edo polonieraz esatearren, "Dni Baskijskie" delako jardunaldiak. Etxepare Euskal Institutuak Adam Mickiewicz Unibertsitatean sustatzen duen euskara irakurletzak antolatzen ditu, "euskara Unibertsitatetik atera, kaleetara ekarri eta hirian Euskal Herria zer den erakusteko", Amaia Dones irakurleak EuskalKultura.com-i agertu dionez. Apirilaren 23tik 25era egingo dira aurtengo ekitaldiak, dantza, zinea, bertsolaritza eta musika uztartuz. Horrez gain, antolatzaileek online lehiaketa bat ere jarri dute abian. Poloniera badakizu, sartu eta parte hartu!
2013/04/15
Ekitaldi berezia egingo da bihar Mexiko DFko Euskal Etxean; izan ere, bertan aurkeztuko da Fractal aldizkariaren azken zenbakia. Gogoeta hiruhilabetekari mexikar honek ETAren ondoko Euskal Herriari buruzko ale monografikoa plazaratu du eta euskal elkartea aukeratu du berau ezagutzera emateko gune aproposena bezala. Aurkezpenean aldizkariaren zuzendari Ilan Semo eta ale honen koordinatzaile Joseba Buj izango dira, besteak beste.
2013/04/15
Urtero bezala, Euskal Herriarekiko engaiamendua berritu dute Argentinako hainbat euskal etxek Aberri Eguneko ospakizunen baitan. Euskal etxe eta ospakizun asko dira, eta ezin guztiak hemen aipatu, ezta hainbat artikulu idatzita ere. Esan dezagun, dena den, ekintzak mota askotakoak izan direla, euskal egoitzetan edota kalean eta komunitateari begira. Datei dagokienez, martxotik apirileraino egin izan dira. Datozen lerroetan, argazkiz hornituta, horietako batzuk, honako hiri eta herrietan eginak: Buenos Aires (Lizarraenea), Olavarria, Laprida, Arrecifes, San Miguel, Cordoba (Gerora) eta Bariloche.
2013/04/12
Venezuelako euskal diasporarekin harremana duen lagun taldeak urteroko euskal-venezuelarren topaketa datorren apirilaren 27a arte atzeratzea erabaki du aurten. Amaya Zenarutzabeitia antolatzaileak azaldu duenez, aldaketa honen arrazoia, "14ko asteburuan Venezuelako hauteskundeetarako botoa ematera Bilbora etorri behar dutenei bi asteburutan segidan erz etorraraztea" da, asteburu bat tartean utziz. Bilkura Galdakaon egingo da, urtero legez, eta aspaldiko lagunak elkar agurtzeko eta Venezuelako istorioak gogoratzeko aukera ederra izango da, otordu goxo baten inguruan.
2013/04/12
Iruñeko Bernart Etxepare eskola publikoak "Nik ere putz eginen dut!" kanpaina jarri du abian, euskararen aldeko mezua zabaltzeko. Eskolako ikasleek, irakasleek eta Euskal Herriko pertsonaia ezagunek bat egin dute jada kanpainarekin eta, orain, arduradunek Diasporako euskaldunei ere egitasmoarekin bat egiteko gonbitea luzatu diete. Parte hartzea oso erraza da; nahikoa da bideo labur bat grabatzea "Nik ere putz eginen dut!" esanez, eta ondoren putz egitea. Animatu, eskolako haurrek ikus dezaten euskarari hatsa emanez noraino hel daitekeen gure hizkuntza!
2013/04/12
Bata Rosario bertako euskalduna (Aguirre) eta bestea Donapaleutik etorria, Nafarroa Beherean (Etchegoyen). Sukaldaritza eta musika izango dira Rosarioko Ros Tower hotelean burutuko den ikuskizuneko protagonistak. Euskal kulturaren omenezko gauean, Itziar Aguirre chefak eta Anne Etchegoyen abeslariak euren artea zuzenean eskainiko diete bildutako lagunei. Hitzordua apirilaren 19an, Rosarioko Ros Tower hotelean. Baina Etchegoyenen beste bi emanaldi ekainiko ditu Argentinan datorren astean: apirilaren 18an Buenos Airesen, eta apirilaren 20an Zazpirak Bat euskal etxe rosariotarrean, Aberri Eguneko ospakizunaren baitan.
2013/04/11
Amsterdam euskal zinemaren erakusleiho bilakatuko da apirilaren 30etik maiatzaren 6ra. Epa! Film Week-ek Euskal Herrian ekoitzitako zortzi film eta hainbat film labur emango ditu Herbeheretako hiriburuan, bi gazteren ekimenez. Gogotsu eta ilusio handiz ari dira lanean euskal zinemaren aste hau arrakastatsua izan dadin eta datorren urtean ere Amsterdameko zinema aretoetan euskara entzun dezagun.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
