euskal diaspora eta kultura
2014/02/10
Euskarak bere lekua izango du datorren otsailaren 21ean Chicagoko Unibertsitatean Ama Hizkuntzaren Egunaren karira egingo diren ekitaldietan. AEBetako Euskadiko Ordezkaritzak antolatuta, Etxepare Euskal Institutuaren sostenguarekin, "Celebrating Basque on International Mother Language Day” jardunaldia egingo da bertan. Hiru euskal adituk --Xabier Irujo, Karlos Arregi eta Amaia Gabantxo-- euskarari buruzko hiru hitzaldia eskainiko dituzte.
2014/02/07
Urteroko hitzorduari hutsik egin gabe, 2014 honetan ere aurkeztuko dira Cordobako Gure Txokoa Euskal Etxeko dantzariak Alta Gracia herriko gizataldeen festara. Izan ere, gizatalde azoken eta kultur turismoaren alorrean Argentinako garrantzitsuenetakoa den ekimena da aurten 27 edizio betetzen ari den hau, Cordoba probintziako Alta Graciako herria antolatzaile. Hitzordua gaur da, otsailak 7, eta mugimendu handiko denboraldi baten hasiera bihurtuko da aurten bere 60. urteurrena ospatuko duen Gure Txokoa-ko gazteentzat. Alta Gracian, gaurko egitaraua gaueko 10etan hasiko da eta Cordobatarrak-ekoek jaiaren bi agertokietan dantzatuko dute beste hainbat kolektibitaterekin batera.
2014/02/07
Buenos Aires probintzia argentinarreko San Nicolas de los Arroyos-en, bertako Centro Vasco Euzkal Etxea (sic) izeneko euskal etxeak, bere barne araudiaren araberako bozka egin du, elkarteak egin beharreko zuzendaritza berritzea gauza zedin, eta ondorioz Damian Cebey-k segitzen du lehendakari, batzordekide dituela, besteak beste, Manuel Brogliatti, lehendakariorde; Fernando Ocariz, idazkari; Maria de los Angeles Domenech, idazkariorde; Oscar Nestor Ugarte, agiri-idazkaria; Ana Maria Erausquin, diruzain; eta Maria Teresa Arámburu, diruzainorde.
2014/02/07
Lohizune Amatria iruindarra Komunikazio graduko ikaslea da EHUn eta aurtengo ikasturteko lehen lauhilabetekoa Argentinako La Platan egin berri du, mugikortasun programa bati esker. Epe horretan euskal komunitatea ezagutzeko aukera izan du eta Euzko Etxea-ko trinketeari buruzko dokumental labur bat egin du. "Pelota paleta" izena du lanak eta bertan euskal etxeko pilotari gazteek joko berezi honen nondik-norakoak azaltzen dituzte. Horretaz eta Argentinako esperientziaz hitz egin EuskalKultura.com-ek Lohizunerekin.
2014/02/06
Iragan otsailaren 3an Boiseko euskara ikasleak kalera kantuan atera ziren, Santa Agedaren tradizioari jarraiki. Ohitura bihurtu da Boiseko euskaldunen artean santa eskean ateratzea, beti ere euskara klaseetako ikasle eta irakasleen ekimenari esker. Taldera bildu ziren ere hiriko zenbait euskaldun eta ez euskaldunak ere; izan ere, euskaraz ez zekitenentzat kantuen letrak liburuxka batean bilduta banatu zituzten antolatzaileek. Giroa aparta izan zen eta Idahoko negu gorriari aurre egiteko gogoa eta kantuak jarri zituzten bertara bildu zirenek.
2014/02/06
‘46 Kontakizun harrigarri’ izenarekin plazaratu du Corpus Christi-ko Eusko Etxearen baitango Atahualpa Yupanqui liburutegiak 2012 eta 2013ko ‘Kontaketa Harrigarriak’ Literatur Lehiaketen ipuinak batzen dituen liburua. Aurkezpen ekitaldian, eskulan erakusketa eta umorezko antzerki saio llabur bat ere burutu zituzten euskal etxeko kideek. Erakundeak jakinarazi du, bestalde, bere Ohiko Urteko Biltzarra martxoan egingo duela.
2014/02/05
Datorren otsailaren 15 eta 16ean San Frantziskoko euskal komunitateak hitzordua du Basque Basque Cultural Center-en, elkarte honen 32. urteurrena ospatzeko. Horrez gain, asteburuan zehar San Frantziskoko Klikaren mende erdia ere ospatuko dute eta esker ona agertuko diote urte horietan guztietan inguruotako euskal jaiak alaitu eta girotu dituen taldeari. Asteburuko egitaraua zabala eta oparoa da: musika, dantza, pilota erakustaldiak eta Bizi Emankorra sarien ematea. Aurten sarituak Betty Alzugarai, Maru Curutchet eta Suzanne Elicetche, euskal kulturari eta AEBetako euskal komunitateari eginiko ekarpenagatik.
2014/02/05
'Euskaldun bati gertatutakoa' du izenburu Buenos Aireseko Iparraldeko Euskal Etxeak 2012an lehenengoz antolatu zuen nazioarteko ipuin lehiaketak. Proposamena asko hazi da geroztik eta 2013ko edizioak arrakasta handia lortu zuen, hirurogeitik gora idazle partaide lortuz. Emaitzak ikusita, hirugarren deialdi bati ekiteko asmoa dutela jakinari dute antolatzaileek, abenduan, 2013ko lehiaketaren sari emanaldian adierazi zutenez.
2014/02/04
Iragan otsailaren 2an bere sorreraren 136. urteurrena ospatu zuen Chaco probintziako Resistencia hiriak, eta Kotoiaren Lurra Euskal Etxeak festan parte hartu zuen, bertako beste komunitateekin batera. Ekitaldi nagusienetako bat 2 de Febrero parkean egin zen ikuskizuna izan zen eta hor izan ziren euskal etxeko kideak, ikurrinarekin, euskal immigranteen ordezkari. Iñaki Echarri bazkidea izan zen Kotoiaren Lurraren banderaria.
2014/02/04
Santa Fe probintzia argentinarreko Rosario hiria izan da iragan urtarrilean aurtengo Dakar lasterketaren abiapuntua. Bi astez luzatu den lehiaketa Boliviatik ere pasatu zen eta Txileko Valparaison bukatu. Kostaldeko herri horretan igo ziren irabazleak podiumera ongi merezitako garaikurrak jasotzera. Proba hasi aurretik, eta Rosarioko euskal etxetik adierazi digutenez, Txomin Arana moto gidari bizkaitarra Zazpirak Bat-eko kideekin elkartu zen, Argentinako erreki tipiko bat dastaturik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
