euskal diaspora eta kultura
2014/03/27
Euskadiren Argentina eta Mercosur-erako Ordezkari Sara Pagolak Hegoalde Argentinarra euskal etxea bisitatu du joan den asteburuan, Santa Cruz probintzia australean. Euskal elkarteko Cesar Arizmendi lehendakariak eta bertako euskal komunitateko zenbait kidek errezibitu zuten Pagola, baita ere, bakoitza bere herrian, Comandante Luis Piedrabuena-ko alkate Jose Ramon Bodlovic-ek, eta El Calafate-ko alkate Javier Bellonik.
2014/03/27
'Estellés euskaraz' liburura, jatorriz valentzieraz ziren bere poemak euskarara ekarriz omenaldia egin zioten iaz Valentziako Vicent Andrés Estellés poetari (1924-1993) eta liburuak aurkezpen elebidunak izan ditu geroztik Valentziar Erkidegoan zein Euskal Herrian. Gerardo Markuleta euskaratzaile, Bostezo etxea argitaratzaile, liburuko testuekin aurkezpen zikloko azken saioa egingo da gaur arratsaldean, Valentzia hirian, partaide, besteak beste, Quart de Poblet-eko Euskaltzaleok Valentzia euskal etxeko kideak.
2014/03/26
Txistua munduan zehar ezagutzera ematea da Garikoitz Mendizabal zestoarraren ametsa, eta bide horretan da, "Txistu Symphonic" izeneko diskoa grabatu eta gero. Disko horretan txistua orkestrarekin lagunduta jo daitekeela erakutsi zuen eta lan horrek nazioartean kontzertuak emateko atea ireki dio. Hego Koreako ateak, esaterako: itzuli berria da handik, bost kontzertu eta ostean, harrerakin kontent. "Musikak badu desberdinen arteko zubiak eraikitzeko ahalmena eta euskal kulturak bere osotasunean asko du kanpoan eskeintzeko. Hau guztia txistuaren eskutik egin daitekeelakoan nago modu erraz eta dotore batean", esan digu berak.
2014/03/26
Lau urte pasatu dira Mar del Platako nafarren ondorengoen talde batek bertako Nafar Etxea birsortu zuenetik. Epe honetan bizkor lan egin du taldeak, euren sustraietako kultura ezagutarazi eta hedatzeko. Horregatik, izan ere, atsegin handiz hartu zuen erakundeak ‘Hego Amerikako Belak’ jaialdian parte hartzeko gonbitea. Beste hainbat gizatalderekin batera, nafar dantzariek ere parte izan ziren hiriko kostaldean ibili zen desfilean. Berri honekin batera, Nafar Etxeak jakinarazi digu berehala, apirilaren 6an, ospatuko duela instituzioaren 4. urtebetetzea, ospatu ere elkartearen aldizkariaren bigarren zenbakia plazaratuz.
2014/03/25
Etxepare Euskal Institutuak sei Euskara eta Euskal Kultura irakurle hautatzea hautatzeko deialdia argitaratu du. Irakurleak honako unibertsitateetan arituko dira: Bartzelonan, Bartzelonako Unibertsitatea eta Bartzelonako Unibertsitate Autonomoan; Madrilen, UHUN-UNED unibertsitatean; Berlinen, Freie Universität unibertsitatean; Brnon, Masaryk Unibertsitatean; Moskun, Lomonosov Unibertsitatean eta Kalifornian, Santa Barbara Unibertsitatean. Hautagaien betekizunak eta hautagaitzak aurkezteko dokumentazioa, jarraian.
2014/03/25
Euskal Herriko euskal-venezuelarrek hitzordua dute aurten ere apirilean, talde honen bilgune nagusi bihurtu den topaketan. Hemeretzigarrena izango da aurtengoa, eta Venezuelako euskal Diasporako lagun taldeak gero eta harreman estuagoa du. Batzuk Euskal Herritik hara joandako --eta gero itzulitako-- euskaldunak dira; beste zenbait Venezuelan jaiotako euskaldunen seme-alabak. Denek ala denek lotura estua mantentzen dute herrialde harekin eta bilera honetan aspaldiko lagunak agurtzeko eta hango kontuak gogoratzeko aukera izaten dute. Aurten, gainera, Venezuelako egoera dela eta, ekitaldi bereziren bat egitea hausnartzen ari dira taldekoak.
2014/03/25
Datorren ostirala da azken eguna. Sariak ederrak dira eta parte hartzea erraza eta doan: email bat bidaltzea baino ez duzu. Zozketagai: euskaraz, Diasporaren eta euskal emigrazioaren lekukotasun zuzena ematen duen 'Urruneko mendebalean artzain', Mattin Etchamendyren autobiografia; ingelesez, Pedro Oiarzabalen 'Gardeners of identity', San Frantziskoko euskal komunitateari buruzko liburua; gaztelaniaz, 'Vascos en Buenos Aires' liburukia, hiriburu horretako Udalak bertako euskaldunez argitaratua; eta DVD bat, 'Zerutik sua dator', Egoitz Rodriguez Olea zuzendari, 1937an bonbardatu zituzten Bizkaiko hainbat herrietako 50 bat lekukoren hitzarekin. Bidali emaila!2014/03/24
Renoko Unibertsitateko Center for Basque Studies-ek 13. Urteroko Mintegia egingo du asteazkenean eta ostegunean. Aurtengo topaketaren gaia "Zerga-sistemak eta krisia" da eta aztergai izango ditu Euskadiko, Kataluniako eta Nevadako finantza publikoak eta autogobernua. Mintegiaren antolakuntzan parte hartu du Joseba Agirreazkuenaga EHUko Historia katedradunak. Azkuenaga 2013-2014ko "William Douglass Distinguished Visiting Scholar" irakasle gonbidatua da Renon.
2014/03/24
Egileak berak aurkeztuko du liburua Buenos Airesko Nazioarteko Liburu Azokaren 40. Edizioan. “Amerikanuak” Amerikanuek, -hau da, Amerikan diru dezente egin zuten eta gero euren herrietara bueltatu ziren euskaldunak- eraikitako baserrien argazki eta kontakizunen bilduma da. Argentinako egonaldian, gainera ‘Buenos Airesek Euskal Herria ospatzen du’ delako jaian hartuko du parte Kepa Etchandy argazkilariak eta euskal etxe batzuk bisitatuko ditu, bere lanak erakusteko asmoz. Buenos Aireseko Liburu Azoka apirilaren 24tik maiatzaren 12ra arte luzatuko da aurten.
2014/03/21
Arrakasta eta ospea du euskal sukaldaritzak nazioartean, eta hori dela eta euskal sukaldariak munduan barrena ibiltzen ohituak daude, euren lana beste herrialdeetan erakusteko. Egunotan, esaterako, Japonian da Daniel Lopez donostiarra (Kokotxa jatetxea), Fukuoka hiriko Gourmet City 2014 jaialdian parte hartzen. Maiatzean, aldiz, San Frantziskon izango da Eneko Atxa bizkaitarra, Azurmendi jatetxeko burua (hiru Michelin izarduna). Atxak bi afari berezi prestatuko ditu Los Gatoseko Manresa jatetxean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
