euskal diaspora eta kultura
2007/08/28
Habanan ibilia da uda honetan (ipar hemisferiokoan; negua, australean) Gaztelu Zahar Hendaiako korala. Koru kantua eta euskal aireak maite zituzten multxo bat gizonek 1946an sortua, orain artean 12 disko grabatu ditu, horietarik azkena iaz, elkartearen 60. urteurrenarekin bat eginez plazaratutakoa. Heldu den artikulua Michel Hernandezek sinatua da Gramman.
2007/08/28
Jaiotzez zarauztarra, badira ia 56 urte Miren Alazne Iruretagoiena Argentinara heldu zela eta hortxe, Macachin-en, bere egin zuen Panpako herrian, euskal komunitateari lotu eta bertako zutabe bilakatu da, bere lana eta euskal kezka hurrengo belaunaldiei hedatuz. Miren Alaznek lanean dihardu gaur egun ere Macachingo Eusko Alkartasuna Euskal Etxearen barnean eta, internet lagun, harremanetan beste euskaldun askorekin, Argentinan eta mundu zabalean. EuskalKultura.com-en irakurle zintzoa, uda (europar) honetan Zarautzera heldu zelarik, egunero bere ordenadorean hartzen dituen e-mailak bidaltzen dizkiotenetako batzuei arpegia jarri nahi izan die, eta gure zuzendaria, Joseba Etxarri, kostaldeko herri gipuzkoar horretara hurbilarazi zuen.
2007/08/27
Berrogeita hamar bat pertsonak interesgarri izango zela iritzi eta Bogotá-ko Euskal Etxeak eskaintzen dituen euskara eskoletan parte hartzeko eman zuten izena. Eskolak zuzenekoak dira, irakaslea bertan, eta baita ere CD eta internet bidezkoak, eta txat batean parte hartzeko aukera ere badakarte, ikasleek, egunero, sartu ahal izan daitezen eta ikasitakoa ikaskideekin ordenagailu aurrean praktikatu, etxetik, lantokitik edota cyber batetik. Bestalde, Kolonbiako Euskal Etxea tratutan dabil Cundinamarcako Unibertsitatearekin eta SENArekin, irakasten dituzten hizkuntzen artean euskara ere eskain dezaten.
2007/08/27
Txileko Bosgarren Erregioko gazte talde batek osatzen du 'Euskal Gazteak'. Joan den larunbatean, haragi errealdi bat tarteko, abuztu hasieran Iñaki Deuna izeneko jaia antolatu zuen batzordearekin bildu ziren. Iñaki Deuna, esan beharra dago, Eusko Etxeko jai historiko nagusia da. 'Txinberoen musikarekin batera, helduenentzat, eta gazteenen irri eta kantuen artean, V Erregioko euskal familia Iñaki Deuna jaiaren inguruan arrakastaz bildu ahal izana ospatu genuen, eta datorren ostegunean egingo dugun Euskal Zine saioari ere (filma, Kutsidazu bide, Ixabel) azken ikutuak eman genizkion', adierazi dio EuskalKultura.com-i Francisco Javier Pinedo, gazte taldeko buruak.
2007/08/27
Hiru gerla borrokalari ohi hauen lekukotasuna 'Palabras Mayores' delako ekimenaren baitan behar da kokatu. Duela urte t'erdi abiarazia, ekimena arrakastatsua suertatu da orain artean. Azkeneko saio honetan, gonbidatuek, Argentina eta Erresuma Batuak 1982an izan zuten gatazkan zibilek izan zuten partaidetza aipatu zuten, baita atzerritarrena ere eta iraganean zein gaur egun zertan den 'Malvinen afera' azaldu zuten. Solasaldia filmatu egin zen eta Euskal Etxeko Liburutegian egongo da eskuragai.
2007/08/25
Partaidetza berezia Hiru Erreka Euskal Etxe argentinarreko dantzariena, Buenos Aireseko probintzian, jantziak estreinatu baitzituzten hiriburu federaletik bostehun bat kilometro hegoaldera dagoen herri honetan urtero antolatzen den Gizataldeen Azokaren baitan. Honako edizioan ere, eta gainerako standetan ohi bezala, gastronomiak leku propioa hartu zuen euskaldunenean ere, sukalde aktibo batekin batera Euskal Herria eta euskaldunei buruzko informazio ematen ahalegin polita egin zutelarik Hiru Errekakoek, zenbait mapa, argazki, marrazki, liburu eta objektuen bidez. Euskal Etxeko dantzariak --guztiak neskak-- ikuskizun orokorreko partaide izan ziren, Udal Balletarekin, eta Danimarka, Siria, Espainia, Frantzia, Italia eta Libanoko elkarte eta ordezkariekin batera.
2007/08/24
Uberuaga/Randa familiako hirurogeita hamabost bat kide iparramerikarrek hartu dute parte Idahoko hiriburuko Euskal Etxean, Mendiguren, Erquiaga, Arriola, Rude, Randa eta Zabala deituradun ere baziren jendeak bildu dituen elkarretaratze batean. Bi eguneko famili bilkura, Lael Uberuaga eta Izar Iribarren-Gorrindo dantzari boisetarrek eginiko 'agurra'rekin hasi zen eta solas eta sozializazio ekitaldia euskal janari eta musikaz hornitua izan zen. Bitxikeria gisa, bildutakoek bilkuraren izena zeraman ardoa ere dastatu ahal izan zuten.
2007/08/24
Ikastaroa, Eusko Argentinar Bazkun Alkartasunak (FEVA) eta Buenos Aireseko Unibertsitateak (UBA) antolatua da elkarrekiko laguntzan eta oinarrizko mailatik hasiko da, hasi ere UBAren Hizkuntza Laboratorioan hiriburu federaleko mikrozentroan astearte eta ostegunez arratsaldeko seietatik zortziak arte. Bestalde eta neguko atsedenaren ondotik, aurrera darraite hirugarren mailako eskolek. Honenbestez, Euskal Herriko kulturak eta hizkuntzak bere bigarren urtea hasi dute eskola-esparru honetan.
2007/08/23
Aurten bere hirugarren zenbakira heldua da Guregandik, Buenos Aires probintziako Laprida herriko Arturo Campion Euskal Ikasketa Guneak plazaratzen duen aldizkari akademikoa. Argentinako hainbat tokietan aurkezten dutelarik, biharkoan Chaco probintziako hiriburuari, Resistenciari, egokitu zaio, César Arrondo UNLPko irakasle eta Guneko zuzendaritzakoak bertako Medioen Museoan emango duen hitzaldi baten baitan, Chacoko Euskal Etxearekin batera antolatutako ekitaldian. Euskal kultura eta historiarekin zerikusia daukaten hamar artikuluk osatzen dute Guregandik-en azken ale hau.
2007/08/23
NABOk salgai jarri du jadanik bere egutegi ezagunaren 2008. urteko edizioa eta eskaini ere aita Martxel Tillous-i, Estatu Batuetako euskal komunitateen apez edo omonierra den kapelau ibiltariari eskaini dio; aldi berean Robert Laxalt-en Sweet Promised Land ('Dominique, artzain xiberotar bat Nevadan', euskarazko bertsioan) liburuaren 50. urteurrenari ere eskaini dio tarte berezi bat. Laxalt-en nobelak aro berri bat ireki zuen eta AEBetako euskal artzainen irudi erromantikoari bide eman zion, euskal eta amerikar heldu ziren belaunaldi berrien literatura arloko notaritza lana eginez. Egutegiaren koordinatzaileak, Renoko Mary Lou Urrutiak, gehienbat bi gai hauekin zerikusia daukaten argazkiak aukeratu ditu.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
