euskal diaspora eta kultura
2008/01/26
Jose Maria Bengoa medikua, Venezuelako euskal Diasporan errotutako gizona eta nazioarteko ospea duen nutrizionista, izango da bihar igandea Bilboko Arriaga antzokian banatuko diren 2008. urteko Sabino Arana sarien ezaugarri den estatuatxoa jasoko duenetako bat. Sarien izena bera duen Fundazio antolatzailetik adierazi dutenez, 'Bengoaren gizarte eta osasun arloko arazoekiko kezkagatik eta talde behartsuenekiko adierazi duen elkartasunagatik', eman diote saria, 'doktoreak 65 urte baino gehiago eman baititu mundu osoan zehar gosea, bidegabekeria eta pobreziaren kontra borrokan'.
2008/01/25
Hamabi urterekin Buenos Aireseko Colon Antzoki famatuan profesionalen gar eta lasaitasunarekin jo zuenetik Xavier Inchausti bibolinjole euskal argentinarraren ibilbidea distiratsua izan da eta etorkizuneko bibolinjoleen artean izarra izateko bidean omen dabil, adituen esanetan. Bahia Blancan jaioa da Xavier, eta familia sustraiak Bizkaian eta Nafarroan ditu. Xavierrek erronka garrantzitsuak izango ditu aurten, horien artean hainbat kontzertu Ukrainan, Taiwanen, Suitzan eta Italian. Proiektuen artean, musikari gazteak Pablo Sarasate musikagile iruindarraren lana Euskal Herrian bertan jotzeko gogoa aipatzen du.
2008/01/25
Bizkor ibili behar dute aurtengo Gaztemundu programan parte hartu nahi duten Diasporako gazteek, eta baita ere euskal etxeak dauden lekuetan bira kulturalak egin nahi dituzten euskal artistek ere. Izan ere, Jaurlaritzak eskaintzen dituen laguntzetarako eskariak aurkezteko epea otsailaren 4an bukatuko da, hamabi egun barru. Artikulu honetan laguntzak eskatu ahal izateko ze baldintza dauden eta ze agiri aurkeztu behar diren gogoratzen dugu.
2008/01/25
Eusko Jaurlaritzako Kultura saileko ordezkaritza bat asteburu honetan abiatuko da bi herrialdeotara, bertako unibertsitateetan Euskara eta Euskal Kultura lektoretzak zabaltzeko posibilitateak aztertzeko. Horiekin, Asia eremura hedatuko litzateke egun Europa eta Ameriketako 12 herrialdetako zentroak biltzen dituen programa. Bidaian bisitatuko diren erakundeen artean Waseda Unibertsitatea dago --Euskara eskolak ematen dira jadanik bertan-- eta Sofiakoa, Tokion; Kansas Gaidai, Osakan; eta Kobeko Unibertsitatea, hauek guztiak Japonian; eta Filipinetan, Ateneo de Manila Unibertsitatea eta Nueva Vizcayako Estatuarena.
2008/01/24
Joseba Azkarraga Eusko Jaurlaritzako Justizia, Lan eta Gizarte Segurantza sailburuak eta Urbano Marín-ek, Txileko Gorte Goreneko presidente izendatu berriak, Justizia modernizatzeko lankidetza-akordioa sinatu zuten asteartean, herritarrentzako zerbitzu hau azkartasunez, gardentasunez eta baliabide publikoen eraginkortasunez emateko helburuarekin. Azkarragak aurreratu zuenez, datozen hilabeteotan Txileko Gorte Goreneko ordezkariak Euskadira joango dira, EAEn egiten ari den lana ezagutzera, eta ondotik bisita bueltatu egingo zaie.
2008/01/24
Kubako Asociación Vasco Navarra de Beneficencia (AVNB) delako euskal elkartea buru belarri sartu da 2008ko ekimenen antolakuntzan. Elkartea berrindartzeko kultur ekitaldiak sustatzea da aurtengo ildoetako bat eta urteari hasiera emateko Octavio Cortazar zuzendariaren 'El onceno maestro' dokumentalaren emanaldia egin zuten joan den astelehenean. Elkarteko kide ugari bildu zen bertara, Cortazarrek bere familiaren sustraien bila Bizkaira eginiko bidea ikusteko.
2008/01/24
Nazio txikien kexak batzuetan eragina izaten dutenaren froga da The Times egunkariak aireratu duen afera. Antza Washintongo United States Library of Congress liburutegiak idazle eskoziarrak 'ingeles idazleak' izenburupean sailkatzea erabaki zuen joan den udazkenean. Orain, baina, Eskoziatik eta Estatu Batuetako eskoziarrengandik jasotako kexuak kontuan hartuz, erabakian atzera egin du munduko liburutegi handien eta garrantzitsuenetakoa denak. Gure artean, Sustatu.com webguneak bildu zuen datozen lerrootan garatzen dugun berria.
2008/01/24
Sarean dagoen lehen euskara-japoniera hiztegi eta baliabidea da hau, Goihatako arduradunek EuskalKultura.com-i azaldu diotenez. Enpresa honek itzulpengintza lanak eta Japonia eta Euskal Herriko enpresen harremanetarako aholkularitza zerbitzuak eskaintzen ditu. Hiztegiak 20.000 termino biltzen ditu dagoeneko, baina Wikipedia erako kolaborazioarekin etengabeko berrikuntza eta hobekuntza izango duela espero dute egileek.
2008/01/24
Grinzane Cavour sarien 27. edizioan Bernardo Atxaga idazle euskaldunaren Soinujolearen semea liburua izan da irabazlea Atzerriko Narratibaren arloan. Horrez gain, Atxagak sari honen Irabazle handia izateko aukera ere badu. Lehia horretarako beste bi kideak Ingo Schulze alemaniarra eta Ljudmila Ulickaja errusiarra izango dira. Piamonteko eskualdea eta CRT fundazioa dira, beste zenbait erakunde italiarrekin batera, Grinzane Cavour sarien antolatzaileak.
2008/01/23
Texaseko Ordezkarien Ganberako hautetsia da Rafael Anchia eta zenbait analista politikoen apustuetan bere izena Dallaseko alkate bezala ageri da aspaldion (eta etorkizunera begira Texaseko Gobernadore kargua ere aipatzen dute batzuk). Anchia gaztea --39 urte baino ez ditu-- Floridan jaio zen, guraso euskaldunen semea. Datozen urteetan estatuko indar erabakigarria bilakatuko den komunitate latinoaren botoa bere alde izan dezake, bertako medioen esanetan. Hala balitz, Anchiak John Garamendi, Kaliforniako gobernadoreordea, edota John Bieter, Boiseko alkatea bezalako politikari euskalamerikarren pausoak jarraituko lituzke, alde latinotik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
