euskal diaspora eta kultura
2014/04/24
Albaniako hiriburuan, Tiranan, izango gaur Kirmen Uribe idazlea, bertako Nazioarteko Liburu eta Arteen Jaialdian parte hartzen. Ondarroarrak "Bilbao-New York-Bilbao" eleberria aurkeztuko du bertan eta Albaniako hainbat komunikabideetan elkarrizketak egingo dizkiote. Uriberen lana iaz itzuli zuten albanierara eta Toena argitaletxeak plazaratu zuen. Honekin, dagoeneko hamalau hizkuntzetara itzulia izan da; besteak beste, bulgarieraz, serbokroazieraz, albanieraz, georgieraz eta errusieraz irakur daiteke.
2014/04/23
Txanda hartzea Corpus Christiko Eusko Etxean, Misiones Argentina iparraldeko probintzian. Olga Leiciaga, elkartea sortu eta bertako alma mater denak paperetako lehenengo lerroan egoteari utzi eta diruzainorde postutik segituko du lanean euskal etxean. Lekukoa erakundearen Biltzar Nagusiak aukeratutako Julio Nestor Markiewicz-ek hartuko dio, Ana Maria Macchi, lehendakariorde; Carlois Galatza, idazkari; Rocio Miranda, idazkari; Carmen Miranda, diruzain; eta Olga Leiciaga bera, batzordekide.
2014/04/23
Madrilgo Euskal Etxeak sarean argitara eman ditu aurtengo Euskarazko Laburmetraien Lehiaketako bost lan finalistak. Elkarteko euskaltegiko ikasleek eginak dira lanak, eta lehiaketaren helburua ikasle hauei euskara testuinguru berri eta dinamiko batean lantzeko aukera ematea da. Lan irabazlea "Sesamo auzoko txapeldunak" izeneko laburmetraia izan zen. Lehiaketako epaimahaia ikusentzunezko eta euskara irakaskuntzako hiru adituk osatu zuten: Joxean Bengoetxea aktoreak, Xabier Iriondo ekoizleak eta HABEko teknikari Kinku Zinkunegik.
2014/04/23
Bere agintaldia bukatzen ari den Ricardo Basterra FEVAko lehendakaria Parana hirira bertaratua da Urrundik euskal elkarteko kideekin instituzioaren 14. urteurrena ospatzera. Jaiaren baitan, duela 24 urte Paranatik emititzen den Presencia Vasca saioaren urtebetetzea ere ospatu zuten paranatarrek. Gonbidatuen artean irratsaioan kolaboratzaile den Mikel Ezkerroren presentzia aipa daiteke. Urtemugako bazkaria berandu arte luzatu zen, lagun eta familia giroan.
2014/04/22
Asteburuan zehar luzatu zen jai egitarau oparo batekin ospatu zuen Kubako euskal komunitateak Aberri Eguna. Asociación Vasco Navarra de Beneficencia eta AthletiKuba elkarteak buru, ia 300 lagun bildu ziren ekitaldi desberdinetara. Antolatzaileen aburuz, erantzun on hori "Kubako euskal komunitatearen indarberritzearen seinalea da; aurrean erronka eta arazo larriak izanagatik, bere indarra eta kemena erakusten ari da euskaldunen taldea". Igandeko Aberri Eguneko bazkari eta jaiaren berria Kubako telebistako albistegiraino heldu zen.
2014/04/22
Programa oparo batekin ospatu zuen Argentinako Laprida herrian egoitza duen Arturo Campion Euskal Ikasguneak bere 11. bilkura nagusia. Izan ere, eta ohi bezala, urtemugaren baitan egin zuten Ikasguneko arduradunek urteroko bilera 2013ko jardueren balantzea egite aldera. Lapridako Lagunen Etxea Euskal Etxearen egoitzan gauzatu ekitaldian, barne lanak ez ezik, komunitateari begirako hitzaldi bat eta ‘Guregandik’ urtekariaren 9. edizioaren aurkezpena ere burutu zituzten elkarteko lagunek.
2014/04/17
Argentinako euskal etxeen bilgarri den FEVA (Federación de Entidades Vasco Argentinas edo Euskal Argentinar Erakundeen Federazioa) elkarteak agiria plazaratu eta helarazi digu Aberri Eguna 2014 dela-eta, deia luzatuz federazioko kide dituen euskal etxeei eta herrialdeko euskaldun guztiei zorionak emanez urte berri batez urteroko euskal festa hau iritsi delako eta euskaldunak eta euskaldunen lagunak oro gonbidatuz "behar bezala" ospa dezaten, "ezinbestekoa baita Aberri Eguna, abertzaleok, garenaren lekukotasuna eman" eta "gure nortasuna adieraz dezagun".
2014/04/17
Nevadako Renon da dagoeneko Pedro J. Oiarzabal ikertzaile bilbotarra, euskal diasporan aditua, Jon Bilbao katedra Nevada-Renoko Unibertsitatean abiarazi eta Memoria Bizia izeneko egitasmoaren aurreneko urratsak emateko. Gogora dezagun ekimen honek bultzatzaile dituela Eusko Jaurlaritza (Kanpoan den Euskal Komunitatearentzako Zuzendaritza), Etxepare Institutua, NABO (Ipar Ameriketako euskal erakundeen elkarte biltzailea), Deustuko Unibertsitatea eta Nevada-Renoko Unibertsitatea bera, Oiarzabalen ardurapean. Felix Ibargutxik honako elkarrizketa egiten zion El Diario Vasco egunkarian, partitu baino egun batzuk lehenago.
2014/04/17
Sant Jordi egunarekin batera abiatuko da aurten Bartzelonako Euskal Etxearen Literaldia eta urtero legez, euskal literatura arloko egile eta proposamen berriak aurrez aurre ezagutzeko aukera eskainiko die hiri honetako euskaldun zein katalanei. Euskal literatura kaleetara aterako da Sant Jordi egunean: Euskadiko Idazleen Elkarteko Elena Moreno eta Manu de Ordeñana egileak liburuak sinatzen arituko dira Euskal Etxeak Rambletan jartzen duen mahaian. Eta gehiago: literatura, dantza, zinea eta Doctor Deseo taldearen kontzertu akustikoa euskal etxean, besteak beste, maiatzaren 28a bitartean.
2014/04/17
Ayacuchoko Euskal Odola Euskal Etxeak eta bertako Udalak bat egingo dute aurten ere ekimen solidario bat aurrera eramateko. Helburua da bizilekurik ez duten hiriko bi familia ugarirentzat etxebizitza bana eraikitzea. Horretarako, euskal etxeak materialak erosteko dirua ipiniko du eta gainerako gastuak Udalak hartuko ditu bere gain. Berria euskal etxean egindako mahai-inguru batean jakinarazi da, hiriko eta euskal erakundeko agintariak lagun.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
