euskal diaspora eta kultura
2014/05/12
Maiatzaren 13a da bihar eta Txilen, 5. Valparaisoko Eusko Etxeak 71 urte beteko ditu. Maiatz honetan, ordea, bigarren urtebetetzea ere badute 5. erregio txiletarreko euskaldunek, Valparaison bertan euskal elkarte aitzindari izan zen Elkarri Laguntzeko Euskal Txiletar Etxea (Centro Vasco Chileno de Socorros Mutuos) sortu zela 99 urte beteko baitira. Azken elkarte honen Mendeurrenaren urtebetera, hau guztia aipatzen du Rubila Araya Ariztia kazetariak segidako artikuluan, tartean bera kide den Eusko Etxearen planak eta hor, besteak beste, duela ia 75 urte bertako portura, Pablo Nerudak antolaturik iritsi zen Winnipeg untzian txileratu ziren euskaldunei buruzko ikerlan bat, Rubilak berak abiarazi behar duena.
2014/05/12
“Eguraldia ere Euskal Herrikoa bezalakoa da” entzun zen behin baino gehiagotan atzo burututako ‘Buenos Aires Euskal Herria ospagai’ jaialdian. Izan ere, eguerdian hasitako zirimiria euri zaparrada bihurtu zen arratsaldea aurrera joan hala. Hala ere, Argentinako euskal kolektibitatea ez du ezerk kikiltzen eta musika, dantza eta plater tipikoekin, baina batez ere Euskal Herriarekiko duen maitasun sentimenduarekin egin zion aurre eguraldi kaskarrari. ‘Buenos Aires Celebra al País Vasco’ren hirugarren edizioa pasatu da eta EuskalKultura.com-ek bihartik aurrera, zenbait artikulutan argitaratuko dituen milaka irudi, soinu, hitz eta oroitzapen onak utzi dizkigu. Zorionak partaide guztioi!
2014/05/12
Euskal taldeei euren lana Madrilen ezagutarazteko agertoki izan nahi du Euskadi Suena jaialdiak eta lehen edizio honetan jotzeko sei talde aukeratuko ditu. Prozesuan parte hartu nahi duten taldeek ezaugarri hauek baino ez dituzte bete behar: Euskal herrian helbideratuta egotea, gutxienez hiru urteko ibilbidea izatea eta CD bat argitaratuta izatea. Aukeraketa prozesuan izena emateko epea maiatzaren 25ean itxiko da; beraz, taldea baduzu eta Madrilen jotzeko aukera izan nahi badu, ibili bizkor!
2014/05/09
Andeen magalean, Mendozako 'Denak Bat' Euskal Etxeak egin berria du bere Urteroko Batzar Nagusia eta besteak beste berritu egin du Zuzendaritza Batzordea, lehendakari Alicia Aguirre hautatuz eta, berarekin batera, Javier Salvarredi lehendariorde, Lautaro Pincheira idazkari, Iñaki Galarraga --orain arteko lehendakaria-- diruzain, Pedro Peñarroja diruzainorde eta Carolina Pérez Mora agiri-idazkari.
2014/05/09
University of Idaho-ko musika banda edo "Marching Band" delakoak zur eta lur utzi gaituen bideo bat argitaratu du: txalaparta bat egin eta bandaren ikuskizunetan uztartu dute. Ez hori bakarrik, gainera amerikar estiloko ikutua eman diote: Idahon txalaparta cheerleader, koreografía eta Guns'n'Rosesen musikarekin batera jotzen da. Txalaparta sartzearen ideia bandako zuzendari Stephen Basterrechearena izan da eta ikuskizunetan arrakasta itzela izan omen da!
2014/05/09
Irrintzi batekin abiatu zen atzo Bordelen "Bordeaux-Bilbao 2014" martxa zikloturista, argi utziz lasterketa honetan kirolaz gain, kulturak ere zeresan handia izango duela. Euskal Etxeak antolatu du jarduera, Bordele, Bilbo eta Donostiako txirrindulari taldeekin batera eta horixe da, hain zuzen ere, esperientzia honen helburuetako bat: Aquitania eta Euskal Herriko kirolarien artean harremanak estutzea. Gaur Donostiraino helduko dira partehartzaileak eta bihar Bilnboko helmugan amaituko da lasterketa.
2014/05/09
Bahia Blancako Union Vasca Euskal Etxeak bat egin zuen Argentinako eta munduko beste hainbat euskal elkarterekin, Gernikako Bonbardaketaren 77. Urteurrena gogoratuz eta Aberri Eguna ospatuz, hurrenez hurren eta larunbat-igandez. Bonbardaketari dagokionez, laburmetraia bat eman zuen euskal etxeko Zine Zikloaren baitan Bizkaiko herrixkak jasotako erasoa oroitzeko. Aberri Eguna, berriz, elizkizun elebidun batekin ospatu zuten Buenos Aires probintzia hegoaldeko Bahia Blancako euskal kolektibitateko ordezkariek.
2014/05/08
Hemeretzi urte dira El Salvadorrera abiatu zela eta geroztik zinez laketua eta pozik bizi da bertan, bertakoekin bat eginda eta haien lankide izanez gizabidezko etorkizun hobe baten alde hasi zuten bidean. Amaia Larralde du izena eta lesakarra da, nahiz eta bere bihotzeko taupadek Morazan edo Usulutan-eko oihartzuna ere sendo dakarkiten dagoeneko. El Salvador eta bertako jendea ezagutzeak begiak ireki zizkiola, dio eta argi dago bere begi urdin handiek distira berezi batez, argiago, biziago begiratzen dutela geroztik.
2014/05/08
Bordeletik gertu dagoen Ambarés herrian bada euskal elkarte ttipi bat, Ongi Etorri izenekoa. Hogei bat bazkide baino ez ditu, baina azken urteotan hainbat ekitaldiekin inguruetan oihartzuna lortzen ari da. Iragan apirilaren 27an Euskal Eguna ospatu zuen elkarteak eta bertara bildu ziren Bordeleko euskal etxeko bazkideak. Orotara, 200 bat lagun izan ziren festan, besteak beste Ambaresko alkate Michel Heritié, euskaldunen semea, harrera hitzaldia frantsesez eta euskaraz egin zuena.
2014/05/08
Azken asteburu hauetan Aberri Eguneko ospakizunak nagusitu dira munduko hainbat euskal elkartetan. Urtero bezala, Argentinako euskal etxeak ez dira jai honetatik kanpo geratu eta mota askotako ekintzak gauzatuz gogoratu dute. Informazioa gutxinaka gutxinaka ari da heltzen gure erredakziora eta jaso ahala ari gara ematen. Gaurko artikuluan Buenos Aireseko Euskaltzaleak-en eta Lizarraenea-n, Gral. Rodriguezeko Eusko Aterpea-n, Jose C. Pazeko Toki Eder-en, Mar del Platako Denak Bat-en eta Olavarriako Gure Etxe Maitea-n burututako ekitaldien laburpena eta baita Andeen magaleko Mendozako eta Barilocheko euskal etxeena ere.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
