euskal diaspora eta kultura
2014/06/13
Bihar ospatuko da Izaban 'Kanpoan diren Nafarren Eguna'. Urteroko hitzordu honen XXVI. edizioak gaur izango du aurrekaria, Larrako Erreserba Naturala bisitatuz eta biharko egitarauaren aurkezpena eginez. Bihar, beraz, goizeko 10:30etan abiatuko dira gauzak, harrera, kanpaiak, meza, kalejira, bazkaria, dantza eta zenbait erakustaldi tarteko; hori guztia, Nafar Etxeen Federazio Nazionalak 30 urte bete dituen honetan, kari horretara bere historia biltzen duen liburua atera duelarik.
2014/06/13
Andre Mari Zuriaren jaietako giro aparta bertakoek bezala bizi nahi baduzu, aurten Gasteizko Margolariak kultur elkarteak gonbite berezia luzatu die Diasporako lagunei: blusa kuadrila honekin batera euskal jaietan murgildu eta gozatzeko aukera. Koadrila hau 2013an sortu zen eta gaur egun 200 kide inguru ditu. Aurtengo festak abuztuaren 4tik (astelehena) 9ra (larunbata) izango dira. Animatzen direnek arropa eta koadrilaren bazkari eta afarien kostua baino ez dute ordaindu beharko, bertakoek egiten duten bezala.
2014/06/13
Euskal etxean edota euskal etxearen partaidetzarekin burutu diren hainbat ekintzen berri dakar Chascomuseko Zingirako Euskaldunak-ek kaleratutako azken berri buletinak. Eta gauzatutakoekin batera, hurrengoak ere iragartzen ditu buletin digitalak: bihar elkarte barruko Mus Txapelketaren hirugarren saioa burutuko da; ekainaren 23an, berriz, Sukaldaritza Tailerraren beste elkarretaratze bat. Data hauetaz gain, beste gonbite bat ere luzatzen dute chascomustarrek: uztailaren 6an Sanferminak ospatuko dituzte bazkari batekin Marcha elkartearen instalazioetan.
2014/06/13
Bardenay jatetxeak diruz lagunduko du datorren astelehenean Boiseko Ikastola (AEBetako Idahon) arratsaldeko 5etatik 9etara bitartean jatetxean egindako diruaren portzentaje bat emanaz. Patty Miller Boiseko Euskal Museoko arduradunak EuskalKultura.com-i azaldu dionez, “proiektu berezietarako” erabiliko du Ikastolak jasotako dirua. Miller-ek gonbitea luzatu nahi die astelehenean Boisen egongo diren euskaldun eta euskaltzaleei, ongi badatorkie, aipatu jatetxetik pasa daitezen, ekimena lagungarri baitzaio Ikastolari.
2014/06/12
Iñigo eta Koldo Eguren zinemagile euskaldunek 2.500 dolar inguru lortu dituzte dagoeneko lehendabiziko astean, Indiegogo webgunearen bitartez, ‘Versus’ laburmetraia grabatzeko. “Horrela jarraitzekotan 15.000 dolar lortzerik izango dugula uste dut”, adierazi dio Koldok, lanaren ekoizleak, Euskal Kultura.com-i.
Jon Kortajarena modelo bilbotarra izango da filmaren protagonista, 2009an ‘A single man’ pelikulan Jualianne Moore eta Colin Firth-ekin batera lan egin ostean. Iñigok zuzendutako lehenbiziko film honetako lantalde ia osoa euskal herritarra izango da. Grabazioa abuztuan egingo dute Los Angelesen.
2014/06/12
Asteburu osoan zehar, bost tailer eskaini dira aldi berean Cañuelasen, hamabi euskal etxetako kideak partaide. FEVAren urteko lehenengo tailerren oso balantze ona egin dute antolatzaileek, “aukera paregabea izan da parte-hartzaileentzat zentzu askotan", esanez, "ikasteko, esperientziak elkar trukatzeko eta partaideen arteko loturak indartzeko, beti ere euskal kultura zabaltzen jarraitzeko asmopean”.
2014/06/11
Bostgarren urtez, Erromako Associazione Culturale Euskarak eta UPTER Unibertsitateko Euskara Sailak euskara, musika eta umeen sormena uztartu dituzte egitasmo zinez berezi batean. Euskanta izena du proiektuak eta bosgarren mailako ikasleak dira protagonista. Aipatu elkarteetako kideek lagunduta, neska-mutil hauek abestiak euskaraz sortu eta grabatu egiten dituzte eta marrazkiekin irudikatu. Emaitza, bitxia, harrigarria eta poetikoa ere batzutan, sarean da entzungai Euskanta proiektuaren blogean.
2014/06/11
Argentinako hiriburuak kolektibitateen alde burutzen dituen ekimenen artean dago Buenos Airesko Folk Open Air Jaia. Berezitasun du, ordea, Europako hainbat herritako folk musika eta dantzak direla festaren protagonista nagusi. Iaz bezala aurtengo edizioan euskal dantzariek ere partekatu zuten agertokia Europa Iparraldeko herrien ordezkariekin. Aitor Alavak zuzenduta, Lizarraenea-ko Ekin Dantzari Taldeak tauletan eta baita kalean ere hainbat koreografia dantzatu zituen Avellaneda Parkean.
2014/06/11
'Txirrindulari Bike Club Ride'ren azken edizioa larunbatean egin zuten San Frantziskon. Bertako Euskal Etxeko Txirrindulari Klubak antolatuta, 27 lagunek, adin guztietako emakume eta gizonek, pedalei eragin zieten Jack Londonen hiriko errepideetan gora. “Giroa ederra” izan zela azpimarratu du partaide izan zen Philippe Acheritogarayk, EuskalKultura.com-ekin hizketan. “Ederki ibili dira guztiak eta lagun talde berri batzuk sortu dira ere”, gehitu du Leon Sorhondo, ibilbideak prestatzen aritutako kideak.
2014/06/10
Berriro ere heldu zaigu albiste lazgarria, Estatu Batuetako NABO Udalekuetan partaide izandako gaztetxo bat hil baita azken egunotan, istripuz, 18 urte besterik ez zituela. Ezaguna zen AEBetako euskal komunitateetako hainbat gazteen artean, Udalekun ibilitakoa eta lagunak egindakoa baitzen, bere ama Winnemucca-ko Andree Bidart Rose izanik.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
