euskal diaspora eta kultura
2015/06/01
Ekainaren 22an hasiko du Boiseko Ikastolak 2015eko udako programa. Baina ez azkeneko hamazortzi urtez egoitza izan duen St. Paul’s Catholic Student Center-en, martxoaren 2an erositako eraikin berrian baizik. Idahoko hiriburuko Broadway kale jendetsuan dago, eskola publiko baten aurrean. “Ikusgarritasunean irabaziko dugu, aldaketak hobekuntza nabariak ekarriko dizkigu”, adierazi dio EuskalKultura.com-i Oihana Andion irakasleak.
2015/06/01
Euskara eta dantza eskolak dira Euskal Sustraiak-ek komunitateari betidanik eskaini dizkion aktibitateak. Aurten, ordea, Mus Tailer bati ere ekingo dio, hogeitik gora interesatuk dagoeneko izena eman dutela. Asteroko ekintzez gain, jai egitarau jakin bat ere garatzen du Trenque Launquengo euskal elkarteak, eta maiatzean erakundea sortu zeneko urteurrena ospatu eta gero San Juan Suari begira ari dira orain lanean.
2015/05/29
NABOk bihar jokatuko du bere Mus Txapelketako final nazionala. 43 euskal etxetako bikote irabazleak arituko dira enbidoka Idahoko Homedale-n, norgehiagoka irabazi eta Nazioarteko Txapelketan AEBetako ordezkari izateko. Oso jarduera hedatua da musa euskal etxeetan. “Gero eta klub gehiagotan egiten da, Mundialeraino heltzea ohorea delako”, aitortu dio Pierro Etcharren, NABO mus arduradunak EuskalKultura.com-i. Homedale-ko Txoko Onak antolatu duen biharkoan, ia ehun jokalari eta hainbat jarraitzaile bilduko dira.
2015/05/29
Bizkaiko Alianzo enpresak garatu du Euskal Quiz jolasa, eta Android eta iPhone mugikorrentzako app batean eskaintzen du, doan. Jolasak euskal herriei buruzko galderak egiten ditu eta erantzun zuzen gehien ematen dituen jokalariak herri bakoitzeko "alkate" bihurtzen dira, eta onenak "lehendakaritza birtuala" eskura dezake. Jolasa euskara sustatzeko helburuarekin garatua da.
2015/05/29
Argentinar Aberri Eguna Maiatzaren 25ean ospatzen da, hamaika ekitaldi antolatuz herrialde osoko herri eta hirietan. Euskal etxeak ere festaren partaide dira eta kabalkada eta ekintza ofizialetan ikurrina altxatzen dute bandera zuri-urdin argiaren parean. Ezin partaidetza guztiak hona ekarri, baina bai batzuk. Hona argazki-galeria Arrecifes, Chacabuco, Mar del Plata, Olavarria, San Nicolas, Tandil, Viedma-Patagones eta Villa Mariako irudiekin.
2015/05/28
Euskal gaiei buruzko ikerketak burutu nahi dituzten doktoreei zuzendua da Basque Fellowship beka eta urtebetez ikerketa hori Oxford Unibertsitateko Saint Anthony's College delakoan egiteko aukera ematen du. Aurreko ikerlariak hainbat arlotarikoak izan dira: historialariak, gizarte zientzilariak, antropologoak eta euskal gaietan espezializatutako nazioarteko abokatuak,besteak beste. Eskabideak aurkezteko epea ekainaren 21ean itxiko da.
2015/05/28
"La colectividad de origen navarro en Argentina. Los centros navarros como espacio de encuentro" (Nafar jatorriko gizataldea Argentinan. Nafar etxeak elkargune gisa) izenburuko liburua Nafarroako Unibertsitate Publikoak, Rosarioko Unibertsitate Nazionalak eta Buenos Aireseko Unibertsitateak elkarrekin egindako ikerketa baten emaitza da. Ikerlana 2014an argitaratu zen Nafarroan eta orain Rosarioko Zientzia Politiko fakultatean aurkeztuko da, Sagrario Anaut doktorea (UPN) eta Mariana B. Garcia magisterra (UNR) egileak lagun.
2015/05/28
Gutxi dira baina zalantzarik ez da gogor eusten diotela euskal sua El Salvadorren atxikitzeari. Datorren larunbatean, munduko beste hamaika euskal etxe, famili-etxe eta bilgunetan egingo duten bezala, pantailaren aurrera bilduko dira, eurak San Salvadorreko Euskal Etxearen egoitzan, Athletic-ek eta Bartzelonak jokatuko duten Espainiako Errege Koparen Finala ikusteko, ilusio handiz eta Athletic eta gainerako euskal taldeen zaleak elkarretaratze berera baturik.
2015/05/27
Gaztemundu 2015 programan parte hartzeko irrikaz diren Diasporako gazteei heldu zaie martxan jartzeko ordua. Atzo Eusko Jaurlaritzak Gobernu Kontseiluan onartu zuen Gaztemundu 2015 programaren deialdia egitea, eta, prebisioen arabera, datorren ekainaren 2an argitaratuko da, Kanpoan den Euskal Komunitatearentzako Zuzendaritzatik Euskalkultura.com-í adierazi diotenez. Argitalpen dataren biharamunean hasiko da hautagaitzak bidaltzeko epea. Adi beraz!
2015/05/27
Ainara LeGardon musikaria, Jaime de los Ríos media-artista eta Eneko Gil dantzaria Poloniako Wroclaw hirian egonaldi artistiko bana burutuko dute uda partean, DSS2016EUk eta Etxepare Euskal Institutuak bigarren urtez sustatutako deialdiari esker. Donostia eta Wroclaw hirietako soinuak, Twitter, artea eta dantza izango dira euren sorkuntzen ardatzak.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
