euskal diaspora eta kultura
2015/06/05
Ekintza batzuen berri eman eta beste batzuetara gonbidatu nahi du Patagoniako argentinarrean, Chubut probintziako Comodoro Rivadaviako euskal etxeak. Agenda bete betearekin ekin zion instituzioak bere 92. urteurreneko asteari, aste berean bere urtebetetze jaia ospatu eta Maiatzaren Iraultzaren desfilean parte hartuz. Ekaineko datozen egunetan, aktibitate solidario bat egingo du Euskal Echea elkarteak, etxeko dantza taldea partaide.
2015/06/04
Hemeretzi urte daramatza Boisen (AEB) bizitzen eta bertakoak dauzka bi seme-alabak, Andoni eta Maitane. Ortuellan duela 41 urte jaioa, Henar Chicok software teknikari gisa egiten du lan eta itzulpen-enpresa txiki bat ere badauka. Honezkero esan daiteke boisetarra ere badela eta 'Made in USA' euskalduna, blogaria eta --azken gertatutakoa baina askorentzat ez garrantzi gutxien duena-- Idahoko hiriburuan sortu berria den Boiseko Athletic Club Peña izentzat hartu duen athleticzale talde ofizialeko burua.
2015/06/04
Anitz lagun bertaratu ziren Florida hiri uruguaitarreko hego sarrerara muralaren inaugurazio ekitaldian parte hartzera, tartean euskal jatorriko jendea, arte eta historia ikasleak, eta mandatariak. FIVUko (Euskal-Uruguaitar Elkarteen Federazioko) lehendakaria Enrique Poittevin Gilmet ere izan zen zeremonian eta hitz batzuk zuzendu zizkien bildutakoei. Ekintzaren baitan plaka oroigarria desestali eta Gernikako Haritzaren kimu bat landatu zuten agintariek.
2015/06/04
Igandean Diasporako entzuleek hitzordua dute 8 Herrialdeak Zuzenean irratsaioak egingo duen emankizun bereziarekin. Saioak hamar urte bete ditu eta Benoit Etcheverryk eta Robert Acheritogarayk gidaturiko lantaldeak sorpresaz beteriko emanaldia prestatu dute: Begiz Begi taldearen kontzertua, zuzeneko konexioa Petalumako Piknikarekin eta Viedmako euskal etxearekin... Zuk ere zuzenean entzun eta parte har dezakuzu internet bidez!
2015/06/03
Etxepare Euskal Institutuak "Excellence in Basque Studies" ikastaroa emango du aurten ere, UPV/EHUko Udako Ikastaroen barruan. Helburua Etxeparek munduko hainbat unibertsitatetan dituen euskara eta euskal kultura irakurletzetako irakasleak eta irakaslegaiak trebatzea da. Aurten ikastaroak Mariasun Landa omenduko du; haur eta gazte literatura idazlea. Landa euskal idazlerik itzuliena da, Atxagarekin batera!
2015/06/03
Kaliforniako euskal egutegian gorriz markatutako datetako bat da, aurten Maiatzaren 22an eta 23an ospatu den Bakersfield-eko Euskal Besta. Kern County Basque Club-ak antolatua, urtero bezala arrakastatsua baina berezia ere izan da aurtengoan, jende kopuru handia bildurik euskal etxearen instalazio zabaletara. Programan Herri Kirolak sartu izana --Kalifornia bertako eta Euskal Herriko pilotariez, eta AEBetako bi kostaldeetako herri-kirolariez-- ekarpen ederra izan dela esan dio EuskalKultura.com-i EEko lehendakari Louis Iturririak.
2015/06/03
Mugimendu handiko egunak bizi izan dituzte azken boladan Roldango euskal etxeko kideek, Argentinako Santa Fe probintzian. Batetik, Chivilcoyko Beti Aurrera-k antolatutako Dantzarien Topaketan parte hartuz; bestetik, Euskadiren Argentina-Mercosur-erako Ordezkaritza bisitatuz Puerto Maderon eta Sara Pagola ordezkariarekin bilduz. ‘Buenos Airesek EH ospagai’ jaialdian ez ziren egon baina euren oihal puska bai iritsi zen Mayo Etorbidean zabaldu zen ehunki erraldoira.
2015/06/02
Euskal Herriko Agintaritzaren Aldizkariak argitara eman du gaur Gaztemundu trebakuntza programaren 2015eko deialdia. Programa hau Diasporako eta euskal etxeetako gazteei zuzendua da eta bihartik aurrera bertan parte hartu nahi dutenek hilabeteko epea izango dute eskabideak bidaltzeko. Aurten programa irailaren 25etik urriaren 9a bitartean egingo da, eta 15 gaztek parte hartuko dute.
2015/06/02
Urriaren 26tik azaroaren 1aren bitartean izango da aurten Argentinako Euskal Aste Nazionala La Pampa probintzian eta irrika sumatzen da euskal gizataldean hogeita bat urteren ondotik Macachinera itzuliko delarik. EuskalKultura.com-ek Euzko Alkartasuna-ko arduradunekin hitz egin du eta informazioa pasatu digute zalantzak argitzeko. "Antolaketa ahalegin handi bat egiten ari gara, eta dudarik ez dugu etorriko den jende guztiari lekua egin, ostatua eman eta merezi duen tratu ona emango diogula", ziurtatu dute.
2015/06/02
Espainiako Gerra Zibila baino lehenago Hego zein Ipar Ameriketara migratu zuten Erro inguruko nafarrek beren jaioterrietara itzultzean eragin zituzten aldaketak ikertze bidean da Amaia Iraizoz historialari aritzuarra Nevada-Reno Unibertsitatean. “Eginda dauden ikerlan gehienek migrazio euskaldunak Ameriketan izandako eragina ikertzen dute, ez dago bueltatu zirenez lan askorik”, esan dio EuskalKultura.com-i.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
