euskal diaspora eta kultura
2015/06/11
Udaleko Turismo Zuzendaritzak eta San Francisco Gazteluaren Babes Batzordeak gonbidaturik, euskal erakustaldi bat gauzatu dute Rauch-eko Gure Txokoa-ko lagunek. Bi asteburutan zehar luzatutako jarduerak argazkiak, jantzi tradizionalak eta Euskal Herriari buruzko informazioa partekatu du euskal etxeak bere komunitatearekin.
2015/06/10
Iparraldeko ikastolen aldeko festa egin zuen Pariseko Eskual Etxeak iragan maiatzaren 30ean eta lagun asko bildu ziren bertara, egun ederra pasa eta aldi berean euskarazko irakaskuntza sustatzera. Elkarteak makina bat jarduera egin zituen: jolasak, musika eta dantza emanaldia, bazkaria... Bertan bildutako dirua Seaska ikastolen elkarteari helaraziko dio euskal etxeak. Asteburuan ere festa giroa izango da, Txikito de Cambo frontoian egingo den Euskal Jaiari esker.
2015/06/10
Gonbite bikoitza dauka Euskaltzaleak euskaltegiak larunbat honetarako. Arratsaldeko 6:30etan, Argentinako selekzioaren Amerikako Kopako lehenengo partida ikustera; 8:30etan, partida bukatu eta gero, erakundeak antolatuko duen laugarren Triki-Poteoan parte hartzera. Aurreko edizioetan bezala, San Telmo auzoan murgilduko dira Euskal Herriko musika zaleak trikitixa, pandero eta alboken erritmoetara.
2015/06/10
Gora Vasco!” dokumentalak Guillermo Larregui 'El Vasco de la Carretilla' (Eskorgaren Euskalduna) legez ezagutua zen iruinsemearen bizitza eta balentrien berri ematen du. Larreguik Patagoniatik Buenos Aireserako bidea oinez egin zuen 1935ean, 50 urte zeuzkala, gero beste hiru ibilbide gehiago egiteko. Bere bizitza dokumental bihurtu zuen beste euskal-argentinat batek, Roberto Arizmendik, eta filma hori erakutsiz bira egiten ari dira Euskal Herrian Chacabucoko Guillermo Larregui Euskal Etxeko Luis Aramburu eta Carlos Chinchurreta. Emanaldiak aste honetan, bihar Gasteizen eta larunbatean Iruñean.
2015/06/09
Iragan larunbatean bertso-bazkaria egin zuen Berlingo Euskal Etxeak On Egin jatetxe euskaldunean. Jatetxea jendez lepo bete zen, entzuleak Jon Maia eta Alaia Martin bertsolarien abileziaz gozatzeko irrikaz. "Euskaldunak zein alemaniarrak izan genituen, azken hauek gehienak euskara klaseetako ikasleak. Gainera, hemen jaiotako gaztetxoentzat oso interesgarria izan zen, lehengo aldiz bizi izan zutelako bertso saio bat aurrez aurre", esan dio EuskalKultura.com-i elkarteko presidente Ainhoa Añorgak.
2015/06/09
Euskal kultura zabaltzeko ekintza programa oparoa ari da garatzen General Villegasko euskal etxea bere egoitzan bertan eta Elordi herriko landa eskola batean. Joan den astean, ordea, etenaldia egin zuten Villegasko Euskaldunak instituzioko lagunek asteroko aktibitateetan ‘Ni una menos' (Ezta bat gutxiago ere) lelopean eta nazio mailan egin zen genero indarkeriaren kontrako manifestaldian parte hartzeko. Afixak euskaraz eta gaztelaniaz eraman zituzten.
2015/06/08
Maiatzaren 25ean, Seattle-ko Northwest Folklife jaialdian hartu zuen parte Boiseko Oinkari dantza taldeak. 44. edizioa zuen mundu osoko dantzari, musikari, ipuin kontalari eta abar luzea biltzen dituen festibal honek eta, antolatzaileen esanetan, 235.000 lagun baino gehiago hurbildu ziren aurtengo programaz gozatzera. “Ederra izan zen”, esan dio EuskalKultura.com-i Lael Uberuaga Oinkarien Harreman Publikoetarako zuzendariak.
2015/06/08
Euskal Herriko Agintaritzaren Aldizkariak ostiralean argitaratu zuen euskal etxeak dauden tokietara bira kulturalak egiteko diru-laguntzen ebazèna. Guztira hamar talde edo artistek jasoko dituzte laguntza hauek, 2015ean zehar proposatutako biren bidaia gastuak ordaintzeko.
2015/06/08
Txalaparta argitaletxe nafarrak kaleraturik, “euskal herritarren eta baita diasporako kideen artean ere Atahualpa Yupanqui folklorista argentinarrak euskal kulturarekin izan zuen lotura ezagutaraztea” finkatu du liburuak helburu. ‘Atahualpa Yupanqui, indio, criollo y vasco’ Euskal Herriko eta Espainiako liburudendetan eskura daiteke; Argentinan oraingoz, internet bidez soilik. Sergio Recarte egileak ez du baztertzen Argentinan ere aurkeztu ahal izateko aukera.
2015/06/05
Uztailean Euskal Herriko hainbat lagunek Boiserako bidea hartuko dute, Jaialdiz gozatzeko irrikaz. Horietako batzuk gidari izango dute Julian Iantzi aurkezlea, euskal artzainen semea eta Kalifornian jaioa. AEBetako euskal Diasporarekin biltzea esperientzia oso berezia izango dela dio berak: "Gure asmoa Diasporako euskaldunekin egotea eta gozatzea da. Eurekin jan, dantza egin, abestu...". Hara doazen bi bidaia beteta omen daude dagoeneko, baina badira oraindik 15 leku, Boisez gain Las Vegas eta Coloradoko Kainoi Handira doan bidaian.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
