euskal diaspora eta kultura
2015/12/28
Euskal Kultur Erakundeak (EKE) eta Etxepare Institutuaren lankidetzari esker, sarean deskargatu daiteke "Euskal musika klasikoa" liburua bertsio hirueledunean: euskara, frantsesez eta ingelesez. Karlos Sánchez Ekiza Euskal Herriko Unibertsitateko musikaren historia irakasleak idatzia da lana, eta Kattalin Totorikak itzuli berri du frantsesera. Euskal Kultura Saila bildumako beste lanak ere doan deskargatu daitezke sarean.
2015/12/28
Euskal Herriko Agintaritzaren Aldizkariak (EHAA) abenduaren 24an eman ditu argitara munduko euskal etxeen eta euren federazioen jarduera, ekintzak eta azpiegitura gastuak finantziatzen laguntzeko dirulaguntzak. Data horren biharamunetik hasita, hilabeteko epea daukate interesatuek gora jotzeko. 782.307 dira esleitu direnak, gehiena IV. kapituluan (ohiko gastuak eta jardueren antolakuntza) eta kopuru sinboliko bat VII.ean (azpiegitura eta ekipamendu gastuak).
2015/12/24
Apurka apurka, emeki emeki, pixkanaka pixkana iritsi gara 2015aren bukaera aldera. Hemen da berriz ere Gabona eta Urte Berria ere bertan dugu. 15 urte beteko ditu 2016an interneten EuskalKultura proiektuak. Erraz esaten da eta badirudi atzo izan zela, baina hor dira 15 urte horiek. Izango dugu horri buruz hitz egiteko tarterik, eta nolabait ere ospatu beharko dugu, irakurle eta lagunekin, bistan da, bozkarioa partekatuz eta elkar lagunduz. Gaurkoan, ordea, mezu xinplea baino ez dakarzugu: Zorionak, eta gure agiantza onenak, irakurle!
2015/12/24
Musikarekin eta euskararekin harreman berezia du Erromako Associazione Culturale Euskara elkarteak eta bere ekimenetan biak uztartzea lortzen du askotan. Aurtengo ENE sariaren irabazleak sei urte daramatza dagoeneko Euskanta izeneko proiektua sustatzen, hau da, erromatarrei abestiak euskaraz sortu eta produzitzeko aukera ematen. Orain arte umeak izan dira protagonista; aurten, aldiz, Lanuvio herriko zentro okupazionaleko lagunak. Emaitza entzun nahi? Segi irakurtzen!
2015/12/24
Datorren asteartean, abenduaren 29an, hartuko du parte, lehenbiziko aldiz, Utah-ko Triskalariak dantza taldeak estatuko hiriburuko EVE WinterFest festibalean. Salt Lake Cityko Salt Palace-n izango da, arratsaldeko 20:00etan hasita, ordubetez. Jaialdi kultura anitzak hiru egun iraungo ditu eta Cirbie Sangroniz dantza taldeko irakasleak EuskalKultura.com-i esan dionez, “ohorea da guretzat bertan egotea, ilusio handiz arituko gara”.
2015/12/24
Urtean zehar elkarrekin buruz buru lan egiten duten euskal etxeetako lagunak urte zaharrari ‘agur’ esateko ere biltzen dira. Laster udako atseden garaia hasiko da Argentinan baina hori baino lehen badoan 2015 urtea behar bezala agurtzen ari dira euskal argentinarrak: ospatuz, euskal tradizioari eutsiz eta datorren urtean kulturaren alde lan egiten jarraituko dutela adieraziz.
2015/12/24
Madril eta Paris, euren baitan euskal biztanle eta bisitari asko biltzen dituzten hiriak dira. Biak dauzkate euskal etxe aktiboak, hiriko euskaldunei zerbitzatzea eta euskal kulturaren eta euskal errealitate eta ekarpenen ispilu eta erakusgarri izateko zereginean. Maria Gainzarain gasteiztarra Madrilen bizi da eta hiriburu espainiarreko kolaboratzaile da.
2015/12/23
Carmelo Urzak bizitza osoa darama unibertsitari amerikarrei atzerrian ikasteko aukerak ematen. Boise State unibertsitatean lizentziatua, Iowakoan Letretan doktore, 30 urtetik gora bete ditu USACen zuzendari, bulego nagusia Nevadako Unibertsitateko Renoko kanpusean, bertako egoitzako banderen artean ikurriña ere badagoela eta partzuergoaren logoa lauburua izanik, ekimen osoaren jatorri euskaldunaren adierazgarri.
2015/12/23
Iragan abenduaren 5ean Erresuma Batuko hegomendebaldean bizi diren euskaldunek Bristoleko Euskal Etxearen aurkezpen ofiziala egin zuten. Ekitaldian elkartearen zuzendaritza batzordea aukeratu zen eta euskal etxearen logoa aukeratzeko lehiaketan bi diseinu finalistak hautatu zituzten bazkideek. Euskal etxe berria martxan da dagoeneko eta ideia eta asmo berriekin bor bor dator.
2015/12/23
Eusko Jaurlaritzaren Gobernu Kontseiluak euskal etxe berri bat onartu zuen ofizialki atzoko Gobernu Kontseiluan euskal etxeen erregistroaren baitan: Marseillako euskal etxe gaztea "Marseillako Euskal Etxea-Maison Basque de Marseille" izenarekin onartua izan da euskal etxeen erregistro orokorrean.
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
