euskal diaspora eta kultura
2012/10/26
Hemen da, iritsi da azkenean 2012ko Euskal Argentinar Aste Nazionaleko asteburua eta motorrak prest dira gaur eguerditik aurrera argentinar euskal egutegiko hitzordu nagusia den honetara herrialde osotik eta ondoko Uruguai, Brasil, Txile eta Paraguaitik, baita Euskal Herritik beretik ere, etorriko den jende saldoari ongietorria emateko. Rosarioko Zazpirak Bat-ek bere Mendeurrena ospatzeko ekitaldien barne kokatu du aurtengo Euskal Astea.
2012/10/26
New Yorkeko Euzko Etxea AEBetan sortu zen lehendabiziko euskal elkartea izan zen, 1913ko urriaren 13an. Datorren urtean beteko den Mendeurrena data gogoangarria da Ipar Ameriketako euskal komunitate osoarentzat, eta elkarteko kideak egitarau zabala prestatu dute 100 urteak ospatzeko. Adibidez, sarean da jada euskal etxeak sortu duen Mendeurreneko webgunea; bertan elkarteko argazki historikoak daude ikusgai eta Mendeurreneko ekitaldien eta albisteen berri ematen da. Horrez gain, euskal etxeak urtean zehar egingo dituzten ekitaldi nagusiak iragarri dizkio EuskalKultura.com-i.
2012/10/26
New Yorkeko Euzko Etxea buru belarri ari da elkartearen Mendeurreneko ospakizunak antolatzen. Iragan urriaren 22an abiatu ziren ekitaldiak, afari batekin, eta 2013ko urriaren 12an bukatuko dira, Mendeurreneko Galarekin. Elkarteak prestatu dituen ekitaldien artean bi argazki erakusketa izango dira ikusgai urte bukaera bitartean Euzko Etxean. Argazkilariak biak ala biak nafarrak dira: Koitz (Luis Foncillas) eta Antonio Castro. Koitzen erakusketa bihar inauguratuko da, larunbatean, eta urriak 4a arte egongo da. Antonio Castrorena, aldiz, abenduaren azken astean erakutsiko da euskal etxean. Aitzol Azurtza izan da bi erakusketen koordinatzailea.
2012/10/25
Rosario, Chascomus, Balcarce, Mar del Plata, Junin eta Macachingo bertako muslariek hartu zuten parte aurten Euzko Alkartasuna Euskal Etxeak antolatutako San Migel Mus Txapelketan. Irabazlea, ordea, bikote bakarra izan behar eta lehiaketaren 2012ko edizio honetan Luis Moreno eta Juan Mutuberria chascomustarrak geratu ziren lehenengo postuarekin. Iaz bezala, kartetan aritu ziren kideek Euzko Alkartasuna Hotelean hartu zuten ostatua. Txapelketa irailaren azken asteburuan izan zen eta elkarretaratzearen baitan erakundeko lehenengo dantza irakasle izandako Mikel Menayari eta Maria Julia Ercorecari omenaldia egin zitzaien.
2012/10/25
Independentistak sareko kide den Floren Aoizek Atlantikoa zeharkatu du berriro Uruguaiko zein Argentinako euskal diasporaren lagunekin elkartzeko. Rosarioko Euskal Aste Nazionalaren baitan, Aoizek “Nafarroaren konkista. Gernikako bonbardaketa. Euskal Herria, iraganetik independentziara” izeneko hitzaldia eskainiko du urriaren 26an, arratsaldeko 3etan, Zazpirak Bat euskal etxean. Rosariokoa, politikari eta idazle nafarra Hego Amerikan egiten ari den biraren hitzaldietako bat bino ez da izango. Euskal Astea bukatuta, Independentistak sareko ordezkariak Cordoba, Buenos Aires eta Viedma ere bisitatuko ditu. Hona hitzaldien egitaraua.
2012/10/25
Lauroba taldeak Passeig del Born-en emango duen kontzertuarekin hasiko da bihar Bartzelonako Euskal Etxeak antolatzen duen Euskal Herria Sona! musika jaialdiaren aurtengo edizioa. Abenduaren 1a bitartean makina bat talde eta bakarlari ekarriko ditu ekimenak kataluniar hiriburura: Doctor Deseo, SA, We are Standard, Lisabö, Ruper Ordorika, Jabier Muguruza... Ibilbide luzea du jaialdiak --hamabosgarren urtea aurten!-- eta Katalunian euskal musika eta kulturaren erakuslehio ezaguna bilakatu da jada. Arrakasta eta esperientzia hori oinarri, Euskal Etxeak pauso berri bat eman du eta Katalunian euskal musika eta kultura erakusteko eta programatzeko plataforma gisa ere ariko da aurrerantzean.
2012/10/24
Iragan urriaren 12an Nokak kontzertua eman zuen Stanford Unibertsitatean, talde euskal-amerikarrak AEBetako Oestean egin berri duen biraren barruan. Berezia izan zen emanaldia, izan ere, unibertsitateko kanpuseko Oregon Courtyard izeneko patioan abestu zuten Nokakoek, inguruan entzuleak sakabanatuta zituztela. Giro lasaia --chill out?-- izan zuen kontzertuak eta bertaratu zirenek adi-adi irakurri zituzten abestien letrak antolatzaileek banatu zituzten liburuxketan. Ekitaldia Stanford Unibertsitatean Etxepare Euskal Institutuak sustatzen duen Euskara eta Euskal Kultura ikastaroaren baitan antolatu zuen Iñaki Lopez de Luzuriaga irakurleak.
2012/10/24
Hamar abesti dauzka kaleratu berria den Maral-en ‘Herriz herri’ diskoak eta egileen esanetan, “jendeak abestea du helburu nagusia. Hori dela eta publikoa bera izan da berriz ere inspirazio-iturri nagusia”. Euskal Herriko kantutegiko klasikoen artean, proposamen berriak ere badaude taldearen laugarren lanean; besteak beste, ‘Aitormena’ abestia reggae estiloan bertsionatuta. Diskoaren aurkezpenari dagokionez, Arrecifeseko musikariek emanaldi berezi bat eskainiko dute ostiral iluntzean El Circulo antzoki Rosarioko Euskal Astean. Larunbatean ere joko du Maral-ek, gaueko erromerian.
2012/10/24
Eusko Indarra dantza talde euskal uruguaitarrak 30 urte bete ditu aurten eta urteurrena ospatzeko ikuskizun berezia eskaini zuen iragan urriaren 17an Montevideoko antzoki batean. Nahiz eta asteazkena izan, ikusle andana hurbildu zen bertara --400 lagundik gora-- Eusko Indarraren dantza erakustaldiaz gozatzeko. Taulagainean 56 dantzari aritu ziren, adin guztietakoak; eta Txindurri folk talde euskal-uruguaitarrak jarri zuen zuzeneko musika.
2012/10/23
Euskal literatura, zinea, bertsolaritza, dantza, gastronomia, historia, kantagintza edo arteari buruz gehiago jakin nahi duzu? Oraintxe duzu aukera gai horiek guztiak --eta gehiago-- jorratzen dituen liburu sorta eskuratzeko, EuskalKultura.com-ek abian jarri duen zozketa berri honekin. Etxepare Euskal Institutuak argitaratu duen Euskal Kultura Saila bilduma zozketatuko dugu gure irakurleen artean, eta irabazleak etxean jasoko du liburu sorta interesgarri hau (euskaraz, gaztelaniaz eta ingelesez, gainera!).
PUBLIZITATEA
PUBLIZITATEA
PUBLIZITATEA
PUBLIZITATEA
PUBLIZITATEA
© 2014 - 2019 Basque Heritage Elkartea
Bera Bera 73
20009 Donostia / San Sebastián
Tel: (+34) 943 316170
Email: info@euskalkultura.eus
